చంద్రబాబు నాయుడు సింగపూర్ పర్యటనలో భాగంగా సింగపూర్ అధ్యక్షుడు థర్మన్ షణ్ముగరత్నంతో సమావేశం అయ్యారు. ఎపిలో సింగపూర్ పెట్టుబడులు, వ్యాపార, అభివృద్ధి అవకాశాలపై ఈ సమావేశంలో ఇరువురు నేతలు విస్తృతంగా చర్చించారు.
ఈ సందర్భంగా ముఖ్యమంత్రి చంద్రబాబు నాయుడు, ఆంధ్రప్రదేశ్లో పరిశ్రమలకు, ముఖ్యంగా డిజిటల్, గ్రీన్ ఎనర్జీ రంగాలకు ఉన్న అపారమైన అవకాశాలను వివరించారు. రాష్ట్రంలో పెట్టుబడులకు గల సానుకూల వాతావరణాన్ని, నూతన పారిశ్రామిక విధానాలను ప్రెసిడెంట్ థర్మన్కు తెలియజేశారు. సింగపూర్ సంస్థలు ఏపీలో పెట్టుబడులు పెట్టడం ద్వారా ఇరు ప్రాంతాలు లబ్ధి పొందుతాయని పేర్కొన్నారు.
అధ్యక్షుడు థర్మన్ షణ్ముగరత్నం గత భాగస్వామ్యాన్ని గుర్తుచేసుకుంటూ, భవిష్యత్తులో కూడా పరస్పర సహకారాన్ని అందించడానికి సానుకూలంగా స్పందించినట్లు సమాచారం. ఈ భేటీ ద్వారా ఏపీ, సింగపూర్ మధ్య ఆర్థిక సంబంధాలు మరింత బలోపేతం అవుతాయని ఆశాభావం వ్యక్తమవుతోంది.
థర్మన్ షణ్ముగరత్నం సింగపూర్ రాజకీయాల్లో, ఆర్థిక రంగంలో అత్యంత ప్రభావవంతమైన వ్యక్తి. ఈయన సింగపూర్కు తొమ్మిదవ అధ్యక్షుడిగా 2023 సెప్టెంబర్ 1న బాధ్యతలు స్వీకరించారు. అధ్యక్ష పదవికి ముందు, థర్మన్ 2011 నుండి 2019 వరకు సింగపూర్ ఉప ప్రధానమంత్రిగా, 2019 నుండి 2023 వరకు సింగపూర్ సీనియర్ మంత్రిగా, సామాజిక విధానాల సమన్వయ మంత్రిగా పనిచేశారు. ఆర్థికవేత్తగా ఆయన అంతర్జాతీయంగా విస్తృత గుర్తింపు పొందారు. అంతర్జాతీయ ద్రవ్య నిధి (IMF)కి చెందిన అంతర్జాతీయ ద్రవ్య, ఆర్థిక కమిటీ (IMFC)కి ఛైర్మన్గా కూడా పనిచేశారు.
చంద్రబాబు నాయుడు, థర్మన్ షణ్ముగరత్నం గతంలో అనేక సందర్భాలలో సమావేశమయ్యారు. ముఖ్యంగా చంద్రబాబు నాయుడు ముఖ్యమంత్రిగా ఉన్న తొలి పదవీకాలం (2014-2019)లో అమరావతి రాజధాని నిర్మాణం, ఇతర మౌలిక సదుపాయాల అభివృద్ధిలో సింగపూర్ కీలక భాగస్వామిగా ఉన్నప్పుడు వీరిద్దరి మధ్య బంధం మరింత బలపడింది.
థర్మన్ అప్పటి సింగపూర్ ఉప ప్రధానమంత్రిగా ఉన్నప్పుడు, అమరావతి మాస్టర్ప్లాన్ రూపకల్పన, నైపుణ్యాభివృద్ధి, పట్టణాభివృద్ధిలో సింగపూర్ సహకారం అందించింది. ఈ సందర్భంలో చంద్రబాబు నాయుడు బృందం, సింగపూర్ నేతలు తరచుగా సమావేశమయ్యేవారు.
గతంలోనూ చంద్రబాబు నాయుడు సింగపూర్ పర్యటనలకు వెళ్ళినప్పుడు, థర్మన్తో సహా సింగపూర్ ప్రభుత్వంలోని కీలక మంత్రులు, అధికారులతో సమావేశమై ఆంధ్రప్రదేశ్లో పెట్టుబడులను ఆకర్షించే ప్రయత్నాలు చేశారు. ఆ పర్యటనల్లో థర్మన్ ఏపీ అభివృద్ధి ప్రణాళికలపై ఆసక్తి కనబరిచారు.
ఈ పూర్వ పరిచయాలు, బలమైన నేపథ్యం తాజా భేటీకి మరింత ప్రాధాన్యతను సంతరించుకుంది. ఏపీలో సింగపూర్ పెట్టుబడుల పునరుద్ధరణకు ఈ సమావేశం ఒక వేదికగా నిలిచిందని విశ్లేషకులు అభిప్రాయపడుతున్నారు.
About the Author
