తెలుసుకుని నమ్మితే.. అరుదుగా వచ్చే దశాబ్దాల అవకాశాలు ఇంటి తలుపు తడతాయి. నమ్మడం, నమ్మకపోవడం వ్యక్తిగతం కావచ్చు కానీ, ఆ పరిజ్ఞానాన్ని అందిపుచ్చుకోకపోవడం ఆ తరం అదృష్టాన్ని జారవిడుచుకోవడమే అవుతుంది. ప్రస్తుతం ప్రపంచ దేశాల శక్తి కేవలం సైనిక సంపత్తిపైనే కాదు, అది కలిగి ఉన్న ‘వ్యూహాత్మక స్వయంప్రతిపత్తి’ (స్ట్రాటజిక్ అటానమీ)పై ఆధారపడి ఉంటుంది. ఈ రేసులో భారత్ ఇప్పుడు ‘అనుసరించే’ స్థితి నుండి ‘శాసించే’ స్థితికి చేరుకుంటోంది.
గ్లోబల్ మేధో సంక్షోభం మరియు పరిపక్వత!
క్వాంటం రంగం ప్రపంచవ్యాప్తంగా పరుగులు పెడుతున్నా, దాని విస్తరణకు ప్రధాన ఆటంకం నైపుణ్యం కలిగిన మానవ వనరుల కొరత. రోబోలు, ఏఐలు కేవలం మనుషుల శ్రమను తగ్గించగలవు కానీ, క్వాంటం కంప్యూటింగ్ వంటి సంక్లిష్ట గణిత, భౌతిక శాస్త్ర సమ్మేళనాలకు కావాల్సింది అసాధారణ మేధస్సు. ప్రస్తుత విద్యా వ్యవస్థలు క్వాంటం మెకానిక్స్, లీనియర్ ఆల్జీబ్రా వంటి ప్రాథమిక అంశాల్లో లోతైన నైపుణ్యాన్ని అందించడంలో వెనుకబడి ఉండటం వల్ల, పరిశ్రమలు ఆర్ అండ్ డీ పై పెట్టుబడి పెట్టడానికి వెనుకాడుతున్నాయి. ఈ అంతర్జాతీయ సవాలే భారతదేశానికి ఒక సువర్ణావకాశం.
క్వాంటం కంప్యూటింగ్ ఇప్పుడు కేవలం ప్రయోగశాలల ముచ్చట కాదు. అది పారిశ్రామిక పరిపక్వత దిశగా అడుగులు వేస్తోంది. గతంలో కేవలం సైద్ధాంతిక పరిశోధనలకే పరిమితమైన ఈ రంగం, నేడు వాణిజ్యపరమైన క్వాంటం ప్రాసెసింగ్ యూనిట్ల (QPU) ఉత్పత్తి స్థాయికి చేరుకుంది. నిన్నటి వరకు ప్రభుత్వ గ్రాంట్లపై ఆధారపడిన ఈ రంగం, నేడు ప్రైవేట్ ఈక్విటీని మరియు పారిశ్రామిక మూలధనాన్ని ఆకర్షిస్తోంది. ఇది భారత్ను సాఫ్ట్వేర్ సేవల కేంద్రం నుండి హార్డ్వేర్ సృష్టికర్తగా మార్చే చారిత్రక పరిణామం.
మొబైల్, సెమీకండక్టర్ల కోసం దశాబ్దాలుగా దిగుమతులపై ఆధారపడ్డ భారత్, క్వాంటం విషయంలో తన పంథాను మార్చుకుంది. మనం ఇప్పుడు కేవలం ఇతర దేశాల ఉత్పత్తులను ‘అసెంబ్లీ’ చేయడం లేదు; సొంత మేధో సంపత్తితో (IP) క్వాంటం కంప్యూటర్ల తయారీని చేపడుతున్నాం. ప్రపంచ క్వాంటం ప్రమాణాలను నిర్దేశించే ‘బెంచ్ మార్క్’ స్థితికి చేరుకోవడం మన లక్ష్యం.
సంక్లిష్ట గణిత సమస్యలను ఛేదించడం భారతీయుల జన్యువులలోనే ఉంది. క్వాంటం ఎర్రర్ కరెక్షన్, చిప్ ఫ్యాబ్రికేషన్లో ఈ సహజ సిద్ధమైన ప్రతిభే మనల్ని గ్లోబల్ సప్లై చైన్లో అనివార్య శక్తిగా మారుస్తోంది. తక్కువ వ్యయంతో అత్యుత్తమ ఫలితాలను సాధించే మన ఆర్ అండ్ డీ సామర్థ్యం ప్రపంచ వేదికపై మనల్ని అగ్రగామిగా నిలబెడుతోంది.
మూడు దశాబ్దాల క్రితం ఐటీ విప్లవాన్ని పసిగట్టినట్లే, ఇప్పుడు క్వాంటం విప్లవాన్ని చంద్రబాబు నాయుడు అత్యంత వేగంగా ఒడిసిపట్టారు. జాతీయ క్వాంటం లక్ష్యాలకు అనుగుణంగా రాష్ట్రంలో ప్రత్యేక ఎకోసిస్టమ్ను నిర్మించడం ఒక సాహసోపేతమైన, దార్శనికతతో కూడిన అడుగు.
విశ్వవిద్యాలయాల్లో ప్రత్యేక క్వాంటం కోర్సులు, పరిశోధనా ల్యాబ్ల ఏర్పాటు ద్వారా అకాడెమియా మరియు పరిశ్రమల మధ్య వారధిని నిర్మించి, ఒక ప్రాంతీయ శక్తి అంతర్జాతీయ ప్రమాణాలను ఎలా శాసించగలదో ఆంధ్రప్రదేశ్ నిరూపిస్తోంది.
సాంకేతిక ఆధిపత్యమే దేశాల బలానికి కొలమానంగా మారిన ఈ కాలంలో, భారతదేశం క్వాంటం బెంచ్మార్కర్గా ఎదగడం ఒక చారిత్రక అవసరం. విద్యార్థులు మరియు యువ నిపుణులు గుర్తించాల్సింది ఏంటంటే.. ఇకపై సర్టిఫికెట్లు మాత్రమే సరిపోవు; ప్రాక్టికల్ క్వాంటం ఇంజనీరింగ్ నైపుణ్యమే మిమ్మల్ని అంతర్జాతీయంగా నిలబెడుతుంది.
మనం కేవలం సాంకేతికతను వినియోగించే వారిగా ఉండకూడదు, దానిని సృష్టించే ‘ఆర్కిటెక్ట్స్’గా ఎదగాలి. క్వాంటం రంగం ప్రతి నిమిషం మారుతోంది, ఆ మార్పుకు అనుగుణంగా మనల్ని మనం మలుచుకోవడమే అసలైన సార్వభౌమత్వం. దిగుమతిదారుగా ఉన్న గతం నుండి, గ్లోబల్ లీడర్గా మారబోయే భవిష్యత్తు వైపు భారతదేశం వేస్తున్న ఈ అడుగులు భవిష్యత్ తరాల సాంకేతిక స్వేచ్ఛకు గ్యారంటీ!
ఇంటిపట్టున మొబైల్ చూస్తూ చెడిపోతారనో, ఐఐటీ ఆశలతోనో ఇంటర్లో విద్యార్థులను ఒత్తిడికి గురిచేస్తున్న మాట వాస్తవం. జేఈఈ మెయిన్స్, అడ్వాన్స్డ్ క్వాలిఫై అయ్యి ఐఐటీలో సీట్లు కొట్టాలంటే దేశంతో పోటీపడాలి. అతి తక్కువ సంఖ్యలో ఉన్న ఆ అవకాశాలు అందరికీ రాకపోవచ్చు. కానీ ఇంటర్ సబ్జెక్టులలో మాత్రం వారు నిష్ణాతులై ఉంటారు. మూడు ఉద్యోగాలకు ఒకరు మాత్రమే లభ్యమవుతున్న ఈ రంగంలో అవకాశాలు మన ముందున్నాయి. మూడు దశాబ్దాల తరువాత వచ్చిన ఈ మలుపులో విజేతలుగా నిలిచే అదృష్టవంతులు ఎవరో మరి!
About the Author
