– ఆ దిశలో కేసిఆర్ విజయం సాధించేలా ఆశీర్వదించాలని శ్రీ వేంకేశ్వరస్వామికి మొక్కుకున్నా
-రాష్ట్ర ప్రణాళికా సంఘం వైస్ చైర్మన్ బోయినపల్లి వినోద్ కుమార్
-తిరుమల ఏడుకొండల స్వామి వారిని కుటుంబ సభ్యులతో కలిసి దర్శించుకున్న వినోద్ కుమార్
తిరుమల :దేశ రాజకీయాల్లో తెలంగాణ రాష్ట్ర ముఖ్యమంత్రి కేసీఆర్ కీలక పాత్ర పోషించే విధంగా ఆశీర్వదించాలని శ్రీ వేంటేశ్వరస్వామి వారిని ప్రార్ధించినట్లు తెలంగాణ రాష్ట్ర ప్రనాలికా సంఘం వైస్ ఛైర్మన్ బోయినపల్లి వినోద్ కుమార్ అన్నారు.సోమవారం తిరుమలలో వెంకటేశ్వర స్వామి వారి నైవేద్య విరామ సమయంలో బోయినపల్లి వినోద్ కుమార్ కుటుంబ సభ్యులతో కలిసి స్వామి వారి సేవలో పాల్గొని మొక్కులు చెల్లించుకున్నారు.
అనంతరం రంగనాయకుల మండపంలో వేద పండితులు వేద ఆశీర్వాదం అందించగా, ఆలయ అధికారులు పట్టు వస్త్రంతో సత్కరించి స్వామి వారి తీర్ధ ప్రసాదాలు అందజేశారు. అనంతరం ఆలయ వెలుపలకు వచ్చిన బోయినపల్లి వినోద్ కుమార్ మీడియాతో మాట్లాడుతూ… సీఎం కేసిఆర్ దేశ రాజకీయాల్లో క్రియాశీలక పాత్ర పోషిస్తారని, దేశ రాజకీయాల్లో కేసిఆర్ ప్రభంజనం సృష్టించడం ఖాయం అని వినోద్ కుమార్ తెలిపారు.
తెలంగాణ రాష్ట్రానికి కేసీఆర్ సీఎం అయిన తరువాత అనేక పథకాలు ప్రజలకు అందుబాటులో తీసుకుని వచ్చి, తెలంగాణ రాష్ట్రాన్ని అభివృద్ధి పథంలో నడిపిస్తున్నారని, తెలంగాణ రాష్ట్రాన్ని అభివృద్ధి, సంక్షేమ కార్యక్రమాలతో దేశంలోనే అగ్రస్థానంలో నిలిపారని వినోద్ కుమార్ అన్నారు. దేశ రాజకీయాల్లో కేసీఆర్ మంచి పాత్ర ఉండాలని స్వామి వారిని ప్రార్ధించినట్లు వినోద్ కుమార్ పేర్కొన్నారు.
చాలా కాలం తరువాత కుటుంబ సభ్యులతో కలిసి స్వామి వారిని దర్శించుకోవడం చాలా సంతోషంగా ఉందని, కోవిడ్ కారణంగా గత రెండేళ్ళుగా స్వామి వారిని దర్శించుకోలేక పోయామని చెప్పారు.
ప్రపంచంలో చాలా దేశాలను నేను సందర్శించానని, అయితే టిటిడి శుభ్రత కలిగిన దేవస్ధానం గొప్పగా ఉందని ఆయన కొనియాడారు. తెలంగాణ రాష్ట్రం ఏర్పాటు అయ్యే సందర్భంలో గానీ, ఉద్యమం సందర్భంలో గానీ కేసీఆర్ స్వామి వారి ఆశీస్సులు పొంది కానుకలు కూడా సమర్పించారని వినోద్ కుమార్ తెలిపారు.
