– కేటాయింపులో కేంద్రం కోత విధించలేదు
– ఎరువులు అవసరానికి తగినంత అందుబాటులో ఉన్నాయి
– తప్పుడు సమాచారం నమ్మవద్దు
– బేషుగ్గా వ్యవసాయ కార్యకలాపాలు
– వ్యవసాయ శాఖ స్పష్టం
అమరావతి: ఆంధ్రప్రదేశ్ లో ఎరువులు పుష్కలంగా లభ్యమవుతున్నాయని, ఎరువుల కేటాయింపులో కేంద్ర ప్రభుత్వం ఇప్పటి వరకు ఎటువంటి కోత విధించలేదని వ్యవసాయ శాఖ స్పష్టం చేసింది. ఈ మేరకు గురువారం ఒక ప్రకటన విడుదల చేసింది. ప్రస్తుత ఖరీఫ్ సీజన్కు రాష్ట్రానికి 16.76 లక్షల మెట్రిక్ టన్నుల ఎరువులు కేటాయించగా, జూన్ చివరి నాటికి 5.64 లక్షల మెట్రిక్ టన్నులు రాష్ట్రానికి చేరాయి. వీటిని ప్రైవేటు, సహకార మార్గాల ద్వారా రైతులకు పంపిణీ చేస్తున్నారు.
కేంద్రం ఎరువుల కేటాయింపులను తగ్గించిందని, రాష్ట్రం దానిని అంగీకరించిందని, తద్వారా రైతులకు అసౌకర్యం కలిగిందని జరుగుతున్న ప్రచారాలను తీవ్రంగా ఖండించింది. ఈ వాదనలు పూర్తిగా నిరాధారమైనవి. అవాస్తవమని తేల్చింది. రైతులు తప్పుడు సమాచారం నమ్మవద్దని, వ్యవసాయ కార్యకలాపాలు పూర్తి స్థాయిలో జరుగుతున్నాయని, ఎరువులు అవసరానికి తగినంత అందుబాటులో ఉన్నాయని వివరణ ఇచ్చింది.
ఎరువుల వినియోగంలో మారుతున్న విధానాలను వివరిస్తూ, ప్రస్తుత మెరుగైన నేల ఆరోగ్యం, పోషకాల లభ్యతతో తక్కువ ఎరువుల వినియోగంతో కూడా అదే దిగుబడిని సాధించడం సాధ్యమేనని వ్యవసాయ శాఖ తెలిపింది. అధిక ఎరువుల వినియోగాన్ని తగ్గించడానికి, సేంద్రియ, జీవ ఎరువుల వాడకాన్ని ప్రోత్సహించడం, రసాయన ఎరువులపై ఆధారపడటాన్ని తగ్గించడం, పర్యావరణ నష్టాన్ని తగ్గించుకుంటూ దిగుబడులను మెరుగుపరచడం వంటి అనేక ప్రత్యామ్నాయ పద్ధతులను ప్రవేశపెట్టారు. పచ్చిరొట్టె పంటలు, నేల ఆరోగ్య పరీక్షల ఆధారంగా ఎరువుల వాడకం, నానో-ఎరువులు, పప్పుధాన్యాల సాగు వంటివి నేల సారవంతాన్ని పెంచి, ఖర్చులను తగ్గించి, ఎరువులపై ఆధారపడటాన్ని తగ్గిస్తాయని పేర్కొన్నారు.
అందుబాటులో 8.73 లక్షల మెట్రిక్ టన్నులు
రాష్ట్రవ్యాప్తంగా మొత్తం 8.73 లక్షల మెట్రిక్ టన్నుల ఎరువులు అందుబాటులో ఉన్నాయి. ఇందులో యూరియా – 3.07 లక్షల మెట్రిక్ టన్నులు, డీఏపీ – 0.86 లక్షల మెట్రిక్ టన్నులు, ఎంఓపీ – 0.57 లక్షల మెట్రిక్ టన్నులు, ఎస్ఎస్పీ – 0.59 లక్షల మెట్రిక్ టన్నులు, కాంప్లెక్స్ ఎరువులు – 3.63 లక్షల మెట్రిక్ టన్నులు ఉన్నాయి. ఈ నిల్వలు సహకార సంఘాలు, రైతు సేవా కేంద్రాలు, మార్క్ఫెడ్ గోదాములు, వివిధ రిటైల్/హోల్సేల్/కంపెనీ గోదాములలో రైతులకు అందుబాటులో ఉన్నాయి.
పంటల సరళిని బట్టి ఎరువులను సకాలంలో సరఫరా చేయడానికి రాష్ట్ర ప్రభుత్వం పూర్తిగా సిద్ధంగా ఉందని వ్యవసాయ శాఖ హామీ ఇచ్చింది. ఎరువుల కొరత గురించి తప్పుడు ప్రచారాలను నమ్మవద్దని లేదా భయాందోళనలతో కొనుగోలు చేయవద్దని రైతులకు విజ్ఞప్తి చేసింది.
About the Author
