-కూటమి ప్రభుత్వం కీలక నిర్ణయం
– 1.63 కోట్ల కుటుంబాలకు లబ్ధి
విజయవాడ: రాష్ట్రంలో ప్రజలందరికీ వైద్యం అందుబాటులో ఉండాలని కూటమి ప్రభుత్వం కృషి చేస్తోంది. అందులో భాగంగా పేద, ధనిక తేడా లేకుండా అందరికీ ఉచిత ఆరోగ్య బీమా అందించేలా యూనివర్సల్ హెల్త్ పాలసీకి ప్రభుత్వం శ్రీకారం చుట్టిన సంగతి తెలిసిందే. తాజాగా ఆ విధానం అమలుకు చర్యలు చేపట్టింది. ఈ మేరకు ఎన్టీఆర్ వైద్య సేవ- ఏబీపీఎంజేఏవై కేంద్ర పథకాన్ని హైబ్రిడ్ మోడ్లో అమలు చేయడానికి టెండర్లు పిలిచింది. అందులో ఆర్ఎఫ్పీ, డీసీఏలో కొన్ని సవరణలను ఆమోదించింది. అంతేకాకుండా ప్రీబిడ్ సమావేశాల ద్వారా చిన్నచిన్న సవరణలకు టెండరు కమిటీకి అనుమతి ఇచ్చింది. రూ. 25 లక్షల ఉచిత వైద్య సేవలు.. ఆంధ్రప్రదేశ్ వైద్యారోగ్య- కుటుంబ సంక్షేమ శాఖ కార్యదర్శి సౌరభ్ గౌర్ గురువారం (డిసెంబర్ 4) జారీ చేసిన ఉత్తర్వుల ప్రకారం.. ప్రతి సంవత్సరం రూ. 5 లక్షల వరకు ఆదాయం ఉన్న (దారిద్ర్య రేఖ దిగువన) పేదవర్గాలకు చెందిన కుటుంబాలకు.. రూ.2.50 లక్షల వరకు ఇన్సూరెన్స్ మోడ్లో అందించనున్నారు.
ఒకవేళ అంతకంటే ఎక్కువ అవసరమైతే, రూ. 25 లక్షల వరకు ఎన్టీఆర్ వైద్యసేవ ట్రస్ట్ ద్వారా ఉచిత వైద్య సేవలు అందిస్తామని ప్రభుత్వం తెలిపింది. ఏపీఎల్ (దారిద్ర్య రేఖ ఎగువన) కుటుంబాలకు.. రూ. 2.50 లక్షల వరకు ఇన్సూరెన్స్ వర్తిస్తుందని పేర్కొంది. ఈ మేరకు ఇన్సూరెన్స్ కంపెనీలను.. సెప్టెంబరు 9న ప్రభుత్వం టెండర్లకు ఆహ్వానించింది. తాజాగా టెండరు నిబంధనల్లో మార్పులతో ఆదేశాలు జారీ అయ్యాయి. కాగా, ఈహెచ్ఎస్ (ఎంప్లాయీస్ హెల్త్ స్కీమ్), వర్కింగ్ జర్నలిస్ట్ స్కీమ్ మినహాయించి.. మిగిలిన అన్ని కుటుంబాలకు యూనివర్సల్ హెల్త్ పాలసీ వర్తిస్తుంది.
కేంద్ర ప్రభుత్వం పథకం పీఎంజేఏవై (ప్రధానమంత్రి జన ఆరోగ్య యోజన), ఎన్టీఆర్ వైద్యసేవ ద్వారా లబ్ధి పొందుతున్న కుటుంబాల్లోని సభ్యులు.. ఈ యూనివర్సల్ హెల్త్ పాలసీ పొందడానికి అర్హులు.ఈ పాలసీ కింద ఏడాది పొడవునా ఆసుపత్రుల దరఖాస్తులు తీసుకుంటాయి. ఇన్సూరెన్స్ క్లెయిమ్ రేషియో 120 శాతం దాటితే.. ప్రీమియం ధరకు మించి అదనపు ఖర్చులు ఎంతయ్యాయో.. అందులో 50 శాతం ట్రస్ట్, 50 శాతం బీమా కంపెనీలు భరిస్తాయి. ఇక ప్రభుత్వ ఆసుపత్రులు 521 వ్యాధులకు ప్రత్యేకంగా అందిస్తున్న సేవల ఖర్చును మొదట బీమా కంపెనీ భరిస్తుంది. బిల్లులు పరిశీలించి ట్రస్ట్ ఆ సొమ్మును ఇన్సూరెన్స్ కంపెనీలకు చెల్లిస్తుంది. ఈ యూనివర్సల్ హెల్త్ పాలసీ ద్వారా రాష్ట్రంలోని 1.63 కోట్ల కుటుంబాలకు లబ్ధి చేకూరనుంది.
About the Author
