ఏపీ ముఖ్యమంత్రి జగన్మోహన్ రెడ్డిని ఉద్దేశించి అనుచిత వ్యాఖ్యలు చేసిన పోలీస్ కానిస్టేబుల్‌పై ఎట్టకేలకు వేటు పడింది. ఏపీ డీజీపీ కసిరెడ్డి రాజేంద్రనాథ్ దీనిపై స్పందించారు. నక్కపల్లి పోలీస్ స్టేషన్‌లో కానిస్టేబుల్‌గా పని చేస్తున్న నవీన్ కుమార్ శెట్టి వాట్సాప్ గ్రూపులో ఇటీవల సీఎం జగన్ పై అనుచిత వ్యాఖ్యలు పోస్ట్ చేసినందుకు అనకాపల్లి జిల్లా ఎస్పీ గౌతమిసాలి డీజీపీ ఆదేశాల మేరకు సస్పెండ్ చేశారు. అచ్యుతాపురం బ్రాండిక్స్‌లో అమ్మోనియం విషవాయువుల ప్రభావంతో అస్వస్థతకు గురైన అంశానికి సంబంధించిన పోస్టు చివరలో “అన్న వచ్చాడు. అస్వస్థత తెచ్చాడు” అంటూ క్యాప్షన్ పెట్టి పోలీస్ వ్యాట్సాప్‌లో గ్రూపు షేర్ చేసినట్టు నవీన్ కుమార్‌పై ప్రాథమిక ఆరోపణలు ఉన్నట్టు తెలుస్తోంది.
ఈ వ్యవహారంపై ఇన్‌స్పెక్టర్ స్థాయి అధికారితో అనకాపల్లి ఎస్పీ గౌతమిసాలి ఆదేశించారు. అయితే, ఏపీ ప్రభుత్వంపై కానీ సీఎ జగన్‌పై కానీ కించపరిచేవిధంగా పోస్టులు, వ్యాఖ్యలు చేసిన వారిపై పోలీసులు ప్రత్యేక దృష్టి సారించినట్టు కనిపిస్తోంది. గత కొన్ని రోజుల నుంచి సోషల్ మీడియాలో తప్పుడు ప్రచారం చేస్తున్న వారిపై ప్రత్యేక నిఘా పెట్టి వారిని అదుపులోకీ తీసుకుని విచారిస్తున్నారు.
