అంచనావేసినట్లుగానే.. సింగపూర్ పర్యటన విశేషాలతో ఢిల్లీలో కేంద్ర మంత్రి జైశంకర్ తో లోకేష్ భేటీ బోణీ చేశారు!
సింగపూర్ పర్యటన అనంతరం రాష్ట్ర ఐటీ, ఎలక్ట్రానిక్స్ శాఖల మంత్రి నారా లోకేష్ ఢిల్లీలో కేంద్ర విదేశాంగశాఖ మంత్రి జైశంకర్ తో భేటీ అయ్యారు. ఈ సందర్భంగా ఆయన ఆంధ్రప్రదేశ్ భవిష్యత్తు, ముఖ్యంగా ఐటీ, నైపుణ్యాభివృద్ధి రంగాల బలోపేతంపై పలు కీలక అంశాలను చర్చించారు.
డేటా సిటీ, ఏఐ సెంటర్ ఏర్పాటుకు కేంద్రం సహకారం
విశాఖపట్నంలో ఎఐ సెంటర్ ఆఫ్ ఎక్సలెన్స్ మరియు డేటా సిటీని ఏర్పాటు చేయడానికి సహకరించాలని లోకేష్ కేంద్ర ప్రభుత్వాన్ని కోరారు. ఇది రాష్ట్ర యువతకు సాఫ్ట్ స్కిల్స్ లో శిక్షణ ఇచ్చి, మెరుగైన ఉపాధి అవకాశాలను కల్పిస్తుందని, భవిష్యత్తులో ఆంధ్రప్రదేశ్ను ఒక టెక్నాలజీ హబ్గా మారుస్తుందని ఆయన ఆశాభావం వ్యక్తం చేశారు.
వలస కార్మికుల సంక్షేమం, భద్రత కోసం ప్రవాస భారతీయ బీమా యోజన వంటి పథకాలను విస్తరించాలని, వారి సమస్యల పరిష్కారానికి ప్రత్యేక విభాగాన్ని ఏర్పాటు చేస్తున్న ఏపీకి సహకారం కోసం విజ్ఞప్తి చేశారు.
ప్రవాసాంధ్రుల బలం – నైపుణ్య రాజధానిగా ఏపీ
ప్రపంచవ్యాప్తంగా దాదాపు 35 లక్షల మంది ప్రవాసాంధ్రులు ఉన్నారని లోకేష్ వివరించారు. అమెరికాలో వారి తలసరి ఆదాయం ($1,26,000 డాలర్లు) అక్కడి ప్రజల సగటు ఆదాయం ($70,000 డాలర్లు) కంటే దాదాపు రెట్టింపుగా ఉండటం గమనార్హం. ప్రపంచ నైపుణ్య రాజధానిగా భారతదేశాన్ని తీర్చిదిద్దే కేంద్ర లక్ష్యానికి ఆంధ్రప్రదేశ్ పూర్తి మద్దతు ఇస్తుందని ఆయన స్పష్టం చేశారు. వలస కార్మికుల భద్రత, సాంకేతిక పరిజ్ఞానం బదిలీ, మరియు పెట్టుబడుల కోసం వివిధ దేశాలతో కుదుర్చుకునే ఒప్పందాలను (MMPA) అమలు చేయడంలో ఏపీ ముందుంటుందని హామీ ఇచ్చారు.
సింగపూర్ పర్యటన ఫలవంతం: పెట్టుబడుల కోసం కేంద్రం సహకారం
ముఖ్యమంత్రి చంద్రబాబు నాయుడు నేతృత్వంలో ఆంధ్రప్రదేశ్ ప్రభుత్వ బృందం ఇటీవల జరిపిన సింగపూర్ పర్యటన వివరాలను లోకేష్ కేంద్ర మంత్రి జైశంకర్ కు వివరించారు. రాష్ట్ర అభివృద్ధి కోసం సింగపూర్ ప్రభుత్వంతో జరిగిన చర్చలకు కేంద్రం పూర్తి సహకారం అందించాలని కోరారు.
నైపుణ్య పోర్టల్ ప్రారంభం, జపాన్, కొరియా, తైవాన్ వంటి దేశాలతో ఉమ్మడి ప్రాజెక్టులు, మరియు ప్రపంచ డయాస్పోరా ద్వారా పెట్టుబడులు, సాంకేతిక ఆవిష్కరణలను ఆహ్వానించడం వంటి ప్రణాళికలను కూడా లోకేష్ పంచుకున్నారు. ఈ లక్ష్యాలను సాధించడానికి కేంద్రం నుంచి డేటా షేరింగ్ సహకారాన్ని అందించాల్సిందిగా విజ్ఞప్తి చేశారు.
About the Author
