– మాటల్లో ఫేకుడు, ఢిల్లీకి వెళ్లి జోకుడు ఇదేనా మీకు తెలిసింది రేవంత్ రెడ్డి
– నెల చివరకు వస్తున్నా హోం గార్డులకు జీతాలు చెల్లించక పోవడం సిగ్గుచేటు
– హోంగార్డులకు వెంటనే వేతనాలు చెల్లించాలని మాజీమంత్రి హరీష్ రావు డిమాండ్
హైదరాబాద్: ముఖ్యమంత్రి రేవంత్ రెడ్డి గారూ.. రాష్ట్రంలోని హోంగార్డు సోదరుల ఆవేదన వినండి. ‘‘సార్.. మేం హోగార్డులం. ఈరోజు వరకు మాకు జీతాలు పడలేదు. భద్రాది కొత్తగూడెం, మెదక్, మహబూబ్ నగర్, వనపర్తి, జగిత్యాల, వరంగల్, రామగుండం, వికారాబాద్ జిల్లాల్లో పని చేస్తున్నవారికి జీతాలు రాలేదు. చాలా ఇబ్బందులలో ఉన్నాము సార్. పిల్లల ఫీజు కట్టలేక ఇబ్బంది పడుతున్నాం. బ్యాంకులలో చెక్ బౌన్స్ అయి ప్రతి నెల ఇదే పరిస్థితి కొనసాగుతున్నది.’’
వీరి ఆవేదన మీకు ఎందుకు వినపడటం లేదు?
నెల మొదలై 22 రోజులు గడస్తున్నా హోంగార్డులకు జీతాలు చెల్లించకపోవడం సిగ్గుచేటు. చిన్న జీతాలపైనే ఆధారపడి జీవిస్తున్న హోంగార్డులు.. చేతిలో చిల్లిగవ్వలేక అనేక ఇబ్బందులు ఎదుర్కొంటున్నారు. ఇంటి అద్దెలు, పిల్లల స్కూల్ ఫీజులు, రోజువారీ ఖర్చుల కోసం అప్పులు చెయ్యాల్సిన దుస్థితి. ఈఎంఐలు చెల్లించకపోవడం వల్ల బ్యాంకు అధికారులు ఫోన్లు చేసి నిలదీస్తున్న పరిస్థితి.
కాంగ్రెస్ పార్టీ అధికారంలోకి వచ్చిన నాటి నుండి ప్రతి నెలా ఇదే తీరు కొనసాగుతున్నా పట్టించుకునే వారే లేరు. మాటలు కోటలు దాటితే, చేతలు గడప దాటని ముఖ్యమంత్రి రేవంత్ రెడ్డి గారు వీరికి ఏం సమాధానం చెబుతారు? మీరు మంత్రిగా ఉన్న హోంశాఖలోనే ఇలాంటి దుర్బర పరిస్థితులా? పథకాల్లో కోతలు, జీతాలు చెల్లించకుండా ఉద్యోగులకు వాతలు.
మాటల్లో ఫేకుడు, ఢిల్లీకి వెళ్లి జోకుడు ఇదేనా మీకు తెలిసింది. వెంటనే హోంగార్డులకు వేతనాలు చెల్లించాలని, ప్రతి నెలా సకాలంలో అందేలా చర్యలు తీసుకోవాలని రాష్ట్ర ప్రభుత్వాన్ని డిమాండ్ చేస్తున్నాం.
About the Author
