ప్రీ బడ్జెట్ – మిషన్

– ఏపీ ప్రయోజనాలే పరమావధిగా ఢిల్లీలో బాబు పర్యటన!

సీఎం చంద్రబాబు మళ్లీ ఢిల్లీ వీధుల్లో తనదైన మార్క్ స్పీడ్‌ను చూపించారు. ఒక్క రోజులోనే దాదాపు అరడజనుకు పైగా కేంద్ర మంత్రులతో వరుస భేటీలు జరిపి, ఆంధ్రప్రదేశ్ అభివృద్ధికి కావాల్సిన నిధులు & అనుమతులు సమకూర్చుకునే పనిలో ఫుల్ బిజీగా గడిపారు.

1. నీటి కష్టాలకు చెక్: జలశక్తి మంత్రితో భేటీ
మొదట జల్ శక్తి మంత్రి సీఆర్ పాటిల్‌ను కలిసిన సీఎం, పోలవరం పనుల స్పీడ్ పెంచాలని, రెండో దశ నిధుల కోసం క్లియర్ కట్ ప్లాన్ ఇచ్చారు.
* ముఖ్యంగా వంశధార వివాదం, ఆల్మట్టి ఎత్తు పెంపు వల్ల ఏపీకి జరిగే నష్టాన్ని వివరించి, కేంద్రం జోక్యం చేసుకోవాలని కోరారు.
* గ్రామాల్లో ఇంటింటికి నీళ్లిచ్చే జల్ జీవన్ మిషన్ కోసం మరో రూ. 1,000 కోట్లు అడిగి సామాన్యుడి దాహార్తిపై తనకున్న శ్రద్ధను చాటుకున్నారు.

2. బడ్జెట్ బాటలో ఏపీ: నిర్మలమ్మతో చర్చలు
ఆర్థిక మంత్రి నిర్మలా సీతారామన్‌తో భేటీ పర్యటనలో హైలైట్.
* రాయలసీమ – హార్టికల్చర్ హబ్: రాయలసీమను ప్రపంచ స్థాయి పండ్ల తోటల కేంద్రంగా మార్చేందుకు రూ. 41 వేల కోట్ల భారీ ప్యాకేజీని ప్రతిపాదించారు.
* పోలవరం-నల్లమల సాగర్ లింక్: గోదావరి వరద నీటిని ఒడిసి పట్టి రాయలసీమ, ప్రకాశం జిల్లాలకు మళ్లించే బృహత్తర ప్రాజెక్టుకు సహకారం కోరారు. దీనివల్ల ఏపీలో కరువు అనే మాటే వినపడకూడదన్నది ఆయన విజన్.

3. కనెక్టివిటీనే కింగ్: గడ్కరీతో ప్లాన్
కేంద్ర మంత్రి నితిన్ గడ్కరీతో భేటీలో అమరావతి ఐకానిక్ బ్రిడ్జి సెంటర్ ఆఫ్ అట్రాక్షన్ అయ్యింది.
* కృష్ణా నదిపై 6 లేన్ల కేబుల్ బ్రిడ్జిని ప్రతిష్టాత్మకంగా నిర్మించాలని, అలాగే హైదరాబాద్-అమరావతి గ్రీన్ ఫీల్డ్ హైవేను పరుగులు పెట్టించాలని కోరారు. ఇది పూర్తయితే ఏపీ రాజధాని దేశంలోని మెట్రో నగరాలకు గట్టి పోటీ ఇస్తుంది.

4. షిప్పింగ్ & మెట్రో ముచ్చట్లు
విశాఖ, విజయవాడ ప్రజల కల అయిన మెట్రో రైలు కోసం కేంద్ర మంత్రి ఖట్టర్‌ను కలిశారు. అటు సర్బానంద సోనోవాల్‌తో మాట్లాడుతూ.. దుగరాజపట్నం లో మెగా షిప్ బిల్డింగ్ క్లస్టర్ గురించి చర్చించారు. ఇది వస్తే కోస్తా తీరం ఉద్యోగాలకు అడ్డాగా మారుతుంది.

5. సామాన్యుడికి సిలిండర్ ఊరట!
పెట్రోలియం మంత్రి హర్దీప్ సింగ్ పూరీతో మాట్లాడుతూ.. మన రాష్ట్రంలోని 65 లక్షల మంది లబ్ధిదారులను ఉజ్వల పథకం పరిధిలోకి తీసుకురావాలని కోరారు. ఇది సాధ్యమైతే ప్రతి సిలిండర్‌పై రూ. 300 రాయితీ వస్తుంది, ఇది పేద కుటుంబాలకు పెద్ద ఊరట.

ఢిల్లీ పర్యటన ఆఖర్లో అమిత్ షాతో భేటీ అయ్యి రాష్ట్ర రాజకీయ, ఆర్థిక పరిణామాలను చర్చించారు. మొత్తానికి ఈ పర్యటన చూస్తుంటే.. “రాష్ట్రానికి రావాల్సిన హక్కులను సాధించుకోవడంలో బాబు మార్క్ పట్టుదల” స్పష్టంగా కనిపిస్తోంది. ముఖ్యంగా కేంద్ర బడ్జెట్ అల్వా వండక ముందే మన అవసరాలను వినతుల రూపంలో ఇచ్చి వచ్చారు.