– స్వేచ్ఛా హరణం, ప్రజాస్వామ్య విలువలకు వ్యతిరేకం
– బీఆర్‌ఎస్ సీనియర్ నేత, ఎమ్మెల్సీ డా. శ్రవణ్ దాసోజు
హైదరాబాద్: బీఆర్‌ఎస్ ఎమ్మెల్యే జగదీశ్ రెడ్డి ని మొత్తం బడ్జెట్ సమావేశానికి సస్పెండ్ చేయడం పూర్తిగా అక్రమం, అన్యాయమైన నిర్ణయం. ఇది అసెంబ్లీ బిజినెస్ రూల్స్‌ను మొత్తంగా ఉల్లంఘించడం మాత్రమే కాకుండా, ప్రతిపక్ష స్వరాలను నిర్బంధించే, ప్రజాస్వామ్యాన్ని అణగదొక్కే ఒక ధోరణిగా కనబడుతోంది. తెలంగాణ ప్రభుత్వంలోని అధికార పార్టీ ప్రతిపక్షం మాట వినకుండా, విమర్శలను అణచివేసే తలంపుతో వ్యవహరిస్తోందని ఇది స్పష్టంగా చూపుతోంది.
ఈ విషయంలో బీఆర్‌ఎస్ సీనియర్ నేత డా. శ్రవణ్ దాసోజు తీవ్రంగా ఖండిస్తూ, ప్రభుత్వం అసెంబ్లీలో ప్రజాస్వామ్య చర్చలను అడ్డుకోవడానికి ప్రయత్నిస్తోందని ఆక్షేపించారు. అసెంబ్లీ అంటే ప్రజల సమస్యలను చర్చించి, పరిష్కార మార్గాలు కనుగొనే ప్లాట్‌ఫాం, కానీ ఇప్పుడు ప్రభుత్వ వైఫల్యాలను ఎత్తిచూపే ప్రతిపక్ష స్వరాలను మూయించడానికి ఒక సాధనంగా మారుతోందని ఆయన విమర్శించారు.
తెలంగాణ భాషా సంస్కృతిని ప్రతిబింబించే విధంగా మాట్లాడటానికి సస్పెన్షన్ వేయడం ప్రజాస్వామ్య హంతకత్వమే! తెలంగాణ భాష, సంస్కృతి అనేవి ప్రజల ఆత్మగౌరవానికి, మనసుపై ముద్ర వేసిన విలువలకు ప్రతిరూపం అని అన్నారు. స్థానిక భాషలో మాట్లాడటం కారణంగా సస్పెండ్ చేయడం అనేది ప్రజాస్వామ్య విలువలను తుంగలో తొక్కినట్లే. ఒక ప్రజాప్రతినిధి తన భావాలను తెలంగాణ ప్రజలకు అంతరార్థంగా అర్థమయ్యే భాషలో వ్యక్తపరచడం సహజం, కానీ దానికి శిక్ష విధించడం అనేది పాలకుల అసహనాన్ని స్పష్టంగా చూపుతోంది.
సస్పెన్షన్ పై ప్రధాన అభ్యంతరాలు:
అసెంబ్లీ నియమాల ఉల్లంఘన: అసెంబ్లీలో భారీ అవ్యవస్థ జరిగితే మాత్రమే సస్పెన్షన్ పెట్టాలి, కానీ తెలంగాణ భాషలో మాట్లాడడం లేదా అభిప్రాయాలను వ్యక్తీకరించడం సస్పెన్షన్‌కు కారణం కావడం అసెంబ్లీ నియమాలకు వ్యతిరేకం.
ప్రతిపక్షాన్ని అణగదొక్కే కుట్ర: అసెంబ్లీలో ప్రభుత్వ వైఫల్యాలను ప్రశ్నించే ప్రతిపక్షాన్ని నోరు మూయించేందుకు ఈ తప్పుడు నిర్ణయం తీసుకున్నారు. ప్రజాస్వామ్యంలో ఇదెంత ప్రమాదకరమో ఆలోచించాలి.
ప్రజాస్వామ్యంపై తూట్లు: ప్రభుత్వంపై స్పష్టమైన విమర్శలు, తెలంగాణ సంస్కృతి, భాష ప్రతిబింబించే భాషణం సస్పెన్షన్‌కు దారి తీస్తే, ఇక ప్రజాస్వామ్యానికి అర్థమేంటీ?
తక్షణమే జగన్ రెడ్డి గారి సస్పెన్షన్‌ను ఎత్తివేయాలి! ప్రభుత్వం ప్రజాస్వామ్యాన్ని అణచివేసే తన నియంతృత్వ ధోరణిని మానుకోవాలి!
