సికింద్రాబాద్‌ శ్రీనివాసనగర్‌లోని అత్యంత ప్రతిష్ఠాత్మకమైన శ్రీ ప్రసన్న వెంకటేశ్వర స్వామి ఆలయ ఆవరణలో శ్రీ కుబేర జ్ఞాన దక్షిణామూర్తి ఆలయానికి శంకుస్థాపన జరిగింది. పుష్పగిరి పీఠాథిపతి శ్రీశ్రీశ్రీ అభినవోద్దండ విద్యాశంకరభారతి స్వామి, ఈ ఆలయానికి శంకుస్థాపన చేశారు.
ఆరు దశాబ్దాల ఆధ్మాత్మిక చరిత్ర ఉన్న శ్రీ ప్రసన్న వెంకటేశ్వరస్వామి దేవాలయంలో, ప్రస్తుతం పునర్మిర్మాణ కార్యక్రమాలు శరవేగంతో జరుగుతున్నాయి. శ్రీశైలంలో కొలువుదీరిన కంచి పరమాచార్య శ్రీ చంద్రశేఖరేంద్ర సరస్వతి, పాదయాత్రగా ఇక్కడికి వచ్చి ఈ ఆలయ ప్రతిష్ఠ చేశారు. ఈ క్రమంలో ఆలయ ఆవరణలో శ్రీ కుబేర జ్ఞాన దక్షిణామూర్తి ఆలయానికి శంకుస్థాపన జరగడం విశేషం.
ఈ కార్యక్రమానికి ఆలయ చైర్మన్‌ బస్వరాజు శ్రీనివాస్‌, కార్యదర్శి ఆత్మారామ సూర్య సుబ్రహ్మణ్యం, స్థానిక కార్పొరేటర్‌ సామల హేమ, ఈఓ కె.రాజేష్‌కుమార్‌, వైస్‌ చైర్మన్‌ వేణుగోపాలరావు, సభ్యులు చివుకుల బాలభాస్కర్‌, నారాయణ తదితరులు పాల్గొన్నారు.
