ఘంటసాల.. తొలి దక్షిణాది సినిమా గాన విప్లవం

దక్షిణాది సినిమా గానంలో తొలి విప్లవం ఘంటసాల గానం!

దక్షిణాది సినిమాల్లో సంస్కరించబడిన గానం చేసిన తొలి గాయకుడు ఘంటసాల; దక్షిణభారతదేశ సినిమా‌‌ నేపథ్య గాయకుల్లో‌ నక్షత్ర స్థాయిని అందుకున్న‌ తొలి గాయకుడు ఘంటసాల వెంకటేశ్వరరావు. సాహిత్యాన్ని సరిగ్గా‌ ఎలా పాడాలి‌ అన్నది ఆయన ద్వారా దక్షిణాది‌ సినిమాల్లో తెలియవచ్చింది. ఆయన గాత్రంతో కన్నా ఎక్కువగా మెదడుతో‌ పాడారు!‌ తన గాత్రంతో కన్నా తన ఆలోచనా‌సరళితో‌ గొప్పగా పాడారు. ఎంత గొప్ప‌ గాయకుడో అంతకన్నా గొప్ప సంగీతదర్శకుడు ఘంటసాల.‌ ఆయన తొలి‌ హిట్ పాట ఆయన స్వరకల్పనలోనే అమరింది. రెండు దశాబ్దుల క్రితం ఘంటసాల గుఱించి వామనన్ తమిళ్ష్‌లో రాసినప్పుడు ఆయనపై నా అవగాహనను‌ కొంత తమిళ్ష్‌లో నమోదు‌ చెయ్యగలిగాను.

ఘంటసాలపై‌ తెలుగులో‌‌ తొలిపుస్తకం “భువనవిజయం”. వీ.ఎ.కె.రంగారావు దాన్ని తీసుకొచ్చారు. ముఖ్యంగా పద్య గానానికి ఒరవడి ఘంటసాల! పద్యాలు గానం చెయ్యడానికి ఆయన ఎన్నుకున్న రాగాలు ఘంటసాల విజ్ఞతా వైశేష్యాన్ని తెలియ జేస్తాయి. పద్యాల్లో పదవిరుపుల పరంగానూ, గురు, లఘువుల ఉచ్చారణ పరంగానూ, పద్య గానానికి యుక్తమైన సంగీతజ్ఞత పరంగానూ ఘంటసాల ఆదర్శం.

ఐదేళ్ల క్రితం ఘంటసాలపై ఆంధ్రజ్యోతిలో‌ వచ్చిన నా మాట: * * * దక్షిణ భారతదేశ‌ చలన చిత్ర నేపథ్యగానంలో తొలిసారి సంస్కరించబడిన గానం‌ చేసినవారు ఘంటసాల వెంకటేశ్వరరావు‌. సాహిత్యాన్ని సాహిత్యంగా పాడడం దక్షిణభారత చలనచిత్రాలలో ఘంటసాలతోనే మొదలయింది. భావంతో పాడడమూ దక్షిణాదిన ఆయనతోనే మొదలయింది. ఏదో ఒప్పచెప్పినట్లుండే చలనచిత్రగానం ఘంటసాలవల్ల గానం అన్న స్థితిని పొందింది. పౌరాణిక చిత్రాలలో పద్యాల పాడాడానికి ఒక ఒరవడి పెట్టారు ఘంటసాల.

దక్షిణ భారత చలన చిత్రాలలో మొదటి గొప్ప గాయకుడు ఘంటసాల. అభినయానికి అనువైన‌ గానం ఘంటసాలది‌.‌ దక్షిణాది చలనచిత్రాలలో గానంపై సరైన అవగాహన ఉన్న తొలిగాయకుడు ఘంటసాల. తన గాత్రధర్మంపై ఆయనకు సరైన అవగాహన ఉండేది. ఘంటసాలది metalic timbre. ఆ గాత్రాన్ని ఎంత గొప్పగా పలికించవచ్చో అంత గొప్పగానూ పలికించారు తెలుగుకు విలువైన గానాన్నిచ్చారు‌. స్వర్గసీమ చిత్రంలో గాయకుడుగా పరిచయమయ్యారు ఘంటసాల. ప్రజాదరణ పొందిన ఆయన తొలి పాట కీలుగుఱ్ఱం చిత్రంలోని “ఎవరు చేసిన కర్మ…” పాట. ఆ చిత్రంలో వక్కలంక సరళతో కలిసి పాడిన “కాదు సుమా కలకాదు సుమా…” అన్న యుగళగీతమూ ప్రజాదరణ పొందింది. అప్పటి నుంచీ ఆయన గాన యానం 1974లో స్వర్గస్థుడయ్యేదాకా విజయవంతంగా‌ కొనసాగుతూనే ఉంది.

మన దేశంలో కడదాకా ప్రభ తగ్గకుండా చలనచిత్ర నేపథ్య గాయకుడుగా కొనసాగినది బహుశా ఒక్క ఘంటసాల మాత్రమేనేమో? ఘంటసాల దేవదాసు చిత్రంలో పాడిన “కుడి ఎడమైతే పొరబాటులేదోయ్…” పాట సంపూర్ణమైన గానానికి సరైన ఉదాహరణ. ఎన్నో పాటల్ని ఘంటసాల ఎంతో గొప్పగా పాడారు. నిజానికి చలనచిత్రాలకు, లలిత సంగీతానికి పొసగని metalic tone ఆయనది. ఆ metalic tone qualityతో గొప్ప చలనచిత్ర గానాన్ని చేశారు ఘంటసాల. ఇది ఆయన తన మేధతో సాధించినది. ఆయనది మంచి సంగీత మస్తిష్కం. మనసుతో పాడడం తెలిసిన గాయకుడు ఘంటసాల.‌ చలనచిత్రాలలో నక్షత్రస్థాయిని‌ అందుకున్న తొలి దక్షిణాది గాయకుడు ఘంటసాల. 1953 కల్లా ఆయన ఒక నక్షత్ర చలనచిత్ర నేపథ్య గాయకుడయ్యారు.

చలనచిత్ర గాయకుడుగా‌ రాణిస్తున్న‌‌ ఘంటసాల‌ 1958లో విజయనగరంలో ఒక‌సారి‌ కర్ణాటక‌‌ శాస్త్రీయ సంగీత‌ కచేరి చేశారు. ఆ కచేరిలో ఘంటసాల గాన ప్రతిభకు తోటి కళకారులు, అభిమానులు విస్మయం చేందారట. ఘంటసాలకు కర్ణాటక‌ సంగీతంపై పట్టు ఉండేది. ఆ పట్టుతో‌‌‌‌ ఆయన చలనచిత్రాలలో కొన్ని‌‌‌ గొప్ప పాటలు పాడారు. ఆ పట్టుతో‌ ఆయన జయదేవుడి అష్టపదుల్ని చాల గొప్పగా పాడారు. ఆ పట్టుతో‌ “దినకరా శుభకరా…” వంటి గొప్ప పాటల్ని స్వరపఱిచారు. ఘంటసాల‌ ఎంత గొప్పగాయకుడో అంతకన్నా గొప్ప సంగీత దర్శకుడు. తన సంగీత‌ దర్శకత్వంలో ఎన్నో గొప్ప పాటల్ని చేశారు.

వారసత్వం చిత్రంలో “ప్రేయసీ మనోహరి వరించి చేరరా…” , చిరంజీవులు చిత్రంలో “కనుపాప కరువైన కనులెందుకో…”, పాతళభైరవి చిత్రంలో “ఓ జాబిలీ, ఓ తారకా, ఓ మలయానిలమా…” వంటి ఎన్నో గొప్ప పాటలు ఘంటసాల సంగీత దర్శకత్వంలో రూపొందాయి. షావుకారు చిత్రంలో ఆయన చేసిన సంగీతం‌ ఉన్నతమైంది. అప్పటికి అలాంటి సంగీతం చెయ్యడం గొప్ప విషయం. పెండ్యాల, ఆదినారాయణరావు, కె.వీ. మహాదేవన్ వంటి సంగీత దర్శకులకు ఘంటసాల ఎంతో గొప్ప గానాన్ని అందించారు‌.

పెండ్యాలకు “రాగమయి రావే…”, “శివశంకరీ శివానంద లహరి…”, “పో పోయే పోయే చినదానా…” వంటి‌ ఎన్నో పాటల్ని గొప్పగా పాడారు. ఆదినారాయణరావుకు “హాయిహాయిగా ఆమని పాడే..”, ” ఘనా ఘనా సుందరా…” వంటి‌ ఎన్నో పాటల్ని‌ గొప్పగా పాడారు. కె.వీ. మహాదేవన్ కు “ముద్దబంతి పూవులో మూగకళ్ల ఊసులు…”, ” శిలలపై శిల్పాలు చెక్కినారు…”, “గోరొంక గూటికే చేరావు చిలక…” వంటి‌ ఎన్నో పాటల్ని గొప్పగా పాడారు. ఇంకా ఎన్నో ఎన్నో పాటల్ని గొప్పగా‌ పాడారు. తన గానంతో తెలుగు చలనచిత్ర గానానికి గొప్పతనాన్ని‌ తెచ్చిచ్చారు. ఘంటసాల ఇంగ్లిష్ సంగీత‌‌ ధోరణిలో‌ “ఊహలు గుసగుసలాడే‌ …” పాటను చేశారు. ఆయనపై పాశ్చాత్య ధోరణో, మఱో ధోరణో పెద్దగా లేదు‌. ఘంటసాలకు ఉర్దూ గజల్‌ తరహా గానం అంటే నచ్చదని ఆయన సతీమణి సావిత్రి గారు ఈ రచయితతో చెప్పారు. “గానానికి తెలుగుతనం ఘంటసాల.‌ తెలుగుతనానికి గానం ఘంటసాల.” పాడుతా తీయగా చల్లగా అంటూ‌ పాడి తీయని చల్లని తెలుగు పాటగా ఘంటసాల నిలిచి ఉన్నారు; నిలిచి ఉంటారు.