భారత ఉపరాష్ట్రపతి ఎన్నిక: ఫలితం తెలిసినా ప్రాధాన్యత తగ్గని పోరు

(నవీన్)

2024 ఎన్నికల తర్వాత మారిన రాజకీయ సమీకరణాలకు భారత ఉపరాష్ట్రపతి ఎన్నిక తొలి పరీక్షగా నిలుస్తోంది. జాతీయ ప్రజాస్వామ్య కూటమి (ఎన్డీయే) అభ్యర్థి విజయం సంఖ్యాపరంగా లాంఛనమే అయినప్పటికీ, ఈ పోరు అధికార, విపక్ష కూటముల మధ్య కొత్త బల సమీకరణాలకు, వ్యూహాత్మక చతురతకు అద్దం పడుతోంది.

అధికార ఎన్డీయే కూటమి తమ అభ్యర్థిగా బీజేపీ సీనియర్ నేత సి.పి. రాధాకృష్ణన్‌ను బరిలోకి దింపగా, విపక్ష ‘ఇండియా’ కూటమి ఉమ్మడి అభ్యర్థిగా సుప్రీంకోర్టు విశ్రాంత న్యాయమూర్తి జస్టిస్ బి. సుదర్శన్ రెడ్డిని ఎంపిక చేసింది. ఈ అభ్యర్థుల ఎంపిక కేవలం ఓట్ల లెక్కింపుగా కాకుండా, భవిష్యత్ రాజకీయాలకు ఒక సూచికగా నిలుస్తోంది.

ఉపరాష్ట్రపతిని ఉభయ సభల (లోక్‌సభ, రాజ్యసభ) సభ్యులు ఎన్నుకుంటారు. మొత్తం 781 మంది ఎంపీల ఎలక్టోరల్ కాలేజీలో గెలుపునకు 391 ఓట్లు అవసరం. ఎన్డీయే కూటమికి లోక్‌సభలో 293, రాజ్యసభలో 132 మంది సభ్యులతో కలిపి మొత్తం 425 ఓట్ల స్పష్టమైన ఆధిక్యం ఉంది.

వైఎస్ఆర్ కాంగ్రెస్ పార్టీ (వైసీపీ) తమ 7 మంది ఎంపీల మద్దతును ప్రకటించడంతో ఎన్డీయే బలం 432 కు చేరింది. మరోవైపు, ఇండియా కూటమి బలం 311 ఓట్లు మాత్రమే. ఈ అంకెలతో సి.పి. రాధాకృష్ణన్ విజయం ఖాయమని స్పష్టమవుతోంది.

ఓటమి ఖాయమని తెలిసినా, ఇండియా కూటమి పోటీకి దిగడం ఒక వ్యూహాత్మక ఎత్తుగడ. ఏకగ్రీవ ఎన్నికకు అవకాశం ఇచ్చి, ప్రభుత్వానికి నైతిక విజయం కట్టబెట్టకుండా, తమ ఐక్యతను చాటుతూ సైద్ధాంతిక పోరాటానికి తెరలేపాలని విపక్షం భావిస్తోంది. ఆరెస్సెస్ నేపథ్యం ఉన్న అభ్యర్థికి జేడీయూ, టీడీపీ వంటి లౌకికవాద పార్టీలు మద్దతు ఇవ్వాల్సిన పరిస్థితిని కల్పించడం ద్వారా, వాటిని ఇరకాటంలో పెట్టడం కూడా ఇందులో భాగమే.
ఈ ఎన్నిక ఇద్దరు వ్యక్తుల మధ్య పోటీ కాదు, రెండు విభిన్న తాత్విక భూమికల మధ్య ఘర్షణ. ఎన్ డి ఎ అభ్యర్థి సి.పి. రాధాకృష్ణన్ తన 17వ ఏటనే ఆరెస్సెస్, జనసంఘ్‌తో ప్రజా జీవితాన్ని ప్రారంభించి, నాలుగు దశాబ్దాలుగా బీజేపీ సిద్ధాంతాలకు కట్టుబడిన రాజకీయ యోధుడు. రెండుసార్లు ఎంపీగా, రాష్ట్ర బీజేపీ అధ్యక్షుడిగా, గవర్నర్‌గా అపార అనుభవం గడించారు. తమిళనాడుకు చెందిన రాధాకృష్ణన్‌ను ఎంపిక చేయడం ద్వారా, దక్షిణ భారతదేశంలో విస్తరించాలనే బీజేపీ ఆకాంక్ష కనిపిస్తోంది.

ఇండియా కూటమి అభ్యర్ధి జస్టిస్ బి. సుదర్శన్ రెడ్డి రాజకీయాలకు దూరంగా న్యాయవ్యవస్థలో అత్యున్నత స్థాయికి ఎదిగిన న్యాయకోవిదుడు. సల్వాజుడుం వంటి కేసులలో రాజ్యాంగ హక్కుల పరిరక్షణకు ఆయన ఇచ్చిన తీర్పులు ప్రసిద్ధి. ఆయన అభ్యర్థిత్వం ద్వారా ఈ ఎన్నికను రాజ్యాంగ పరిరక్షణ కోసం చేస్తున్న సైద్ధాంతిక పోరాటంగా మలచాలని విపక్షం ప్రయత్నిస్తోంది.

ఈ ఎన్నిక దక్షిణ భారతదేశాన్ని కేంద్రంగా చేసుకుని సాగుతున్న రాజకీయ చదరంగంలా మారింది. ఎన్డీయే, సి.పి. రాధాకృష్ణన్‌ను ఎంపిక చేసి “తమిళ ఆత్మగౌరవం” అనే అస్త్రాన్ని ప్రయోగించి, ఇండియా కూటమిలోని డీఎంకేను ఇరకాటంలో పెట్టాలని చూసింది.

దీనికి ప్రతిగా ఇండియా కూటమి తెలంగాణకు చెందిన జస్టిస్ సుదర్శన్ రెడ్డిని ఎంపిక చేసి, ఎన్డీయే వ్యూహాన్ని తిప్పికొట్టింది. ఇది ఎన్డీయేలోని తెలుగుదేశం పార్టీని (టీడీపీ) ఇబ్బందికరమైన స్థితిలోకి నెట్టింది. ఒక తెలుగు వ్యక్తికి వ్యతిరేకంగా ఓటు వేయాల్సిన పరిస్థితి టీడీపీకి రాజకీయంగా సవాలుగా మారింది.

ఈ ఎన్నిక ఇద్దరు తటస్థుల వైఖరిలో మార్పును స్పష్టం చేసింది. వైసీపీ ఎప్పటిలాగే ఎన్డీయేకు మద్దతు పలికింది. అయితే, అత్యంత కీలకమైన మలుపు బిజూ జనతా దళ్ (బీజేడీ) వైఖరి. ఎన్డీయే అభ్యర్థికి మద్దతు ఇవ్వకూడదని బీజేడీ నిర్ణయించుకుంది. ఒడిశా ఎన్నికల్లో బీజేపీ చేతిలో ఓటమి తర్వాత, ఆ పార్టీ జాతీయ స్థాయిలో స్పష్టమైన ప్రతిపక్ష పాత్ర పోషించాలని నిర్ణయించుకున్నట్లు కనిపిస్తోంది. ఇది రాజ్యసభలో ప్రభుత్వానికి కీలకంగా మారవచ్చు.

ఈ ఎన్నికల ఫలితం ముందుగానే తెలిసినా, దాని ప్రాముఖ్యత గెలుపోటములకు అతీతమైంది. రాధాకృష్ణన్ విజయంతో, బలమైన సైద్ధాంతిక నేపథ్యం ఉన్న వ్యక్తి రాజ్యసభకు అధ్యక్షత వహించబోతున్నారు. ఈ ఎన్నిక ఒక ముగింపు కాదు, రాబోయే ఐదేళ్లలో దేశ పాలనను నిర్దేశించబోయే రాజకీయ, సైద్ధాంతిక పోరాటాలకు ఒక కొత్త ఆరంభం.

( రచయిత సీనియర్ జర్నలిస్టు)