తెలుగంటే…
మాతృభాష మాత్రమే కాదు
నీ గుండె ఘోష..
అమ్మ నీకు నేర్పిన
మొదటి మాట
పదిలంగా దాచుకో నాన్నా
అంటూ నీకిచ్చిన వరాలమూట
కాస్తకాస్తగా..ఎప్పటికప్పుడు
కొత్తకొత్తగా రుచిచూస్తూ..
ఆస్వాదించరా అని మురిపెంగా
కట్టి ఇచ్చిన చద్దిమూట..!
అంతేనా..
అడ్డాలనాడు వచ్చీరాని మాటలతో నువ్వు నుడివిన
మొదటి సాహిత్యం..
నీ తొలి తేనె పలుకులు విని
అమ్మ మురిసిపోయిన
నీ పసితనపు పాండిత్యం
ఆజన్మాంతం నీ ఉన్నతిలో
ముందుండి నిను నడిపించే
సాన్నిహిత్యం..
ఒక్క తెలుగోడి నోటి నుంచి మాత్రమే వెలువడే
ఆణిముత్యం..
ప్రపంచభాషల్లోకెల్ల
స్వాతిముత్యం..!
తెలుగంటే..రామాయణం
ఇంటింటి రామాయణం..
కోపం వచ్చినపుడు
నీ నోటి నుంచి
వెలువడే రామబాణం..
నీ మొదటి ప్రేమలేఖాయణం
నీ గ్రామీణం..
ఆంధ్రదేశానికి అందంగా అమరిన వడ్డాణం..!
తెలుగంటే నీ భారతం..
చిన్ననాడు అమ్మ
ఆ భాషలోనే
పట్టలేదా నీ భరతం..
నువ్వు మర్చిపోలేని మధురమైన
నీ గతం..
నీ అవగతం..జీవితం!
ఇంకా..
తెలుగంటే నీ భాగవతం..
ఇంటింటి బాగోతం..
కృష్ణదేవరాయుని చరితం
అల్లసాని పెద్దన..
నంది తిమ్మన
కృష్ణశాస్త్రి..గురజాడ..గిడుగు
అందరూ కట్టగట్టి రాసిన
అందమైన కావ్యం..!
తెలుగంటే..
చందమామ..బాలమిత్ర..
బొమ్మరిల్లు..బామ్మసొల్లు..
భాషలందు గజకర్ణ..గోకర్ణ..
ఎన్టీవోడు తీసిన దానవీరశరకర్ణ
అందమైన శ్వేతస్వర్ణ..!
చివరగా..
తెలుగంటే..
పెద్దబాలశిక్ష..
వ్యాకరణం రాకపోతే బడిలో అయ్యోరు బెత్తంతో విధించిన మధురమైన శిక్ష..
నీ జీవితానికి రక్ష..
సాక్షాత్ వాగ్దేవి ప్రసాదించిన
అపురూప భిక్ష..!
ఎలిశెట్టి సురేష్ కుమార్
9948546286
