– రంగంలోకి దిగిన ఐసీడీఎస్ అధికారులు, పోలీసులు
– బైపాస్ అండర్ బ్రిడ్జిల వద్ద పోస్టర్ల తొలగింపు
అమరావతి: గుంటూరు, విజయవాడ హైవే మార్గంలోని అండర్ బ్రిడ్జ్ ల వద్ద అశ్లీల పోస్టర్లు, హోర్డింగ్స్ పై ఆంధ్రప్రదేశ్ రాష్ట్ర మహిళా కమిషన్ సీరియస్ అయ్యింది. వాటిని ఏర్పాటు చేసేవారిపై చట్టపరమైన కఠిన చర్యలు తీసుకోవాలని మహిళా కమిషన్ చైర్ పర్సన్ వాసిరెడ్డి పద్మ ఐసీడీఎస్, జిల్లా పోలీసు ఉన్నతాధికారులను ఆదేశించారు.
ఆచార్య నాగార్జున విశ్వవిద్యాలయం ఎదురుగా ఉన్న అండర్ బ్రిడ్జ్ వద్దనూ అశ్లీల పోస్టర్లు ఉండటంపై యూనివర్సిటీ రిజిస్టార్ ని సైతం వాటిని తక్షణమే తొలగించాలని ఆదేశించారు. దీంతో, హుటాహుటిన గుంటూరు ఐసీడీఎస్ పీడి మనోరంజని ఆధ్వర్యంలో మంగళగిరి రూరల్, పెదకాకాని పోలీసులు రంగంలోకి దిగి అశ్లీల పోస్టర్లను శుక్రవారం తొలగించారు.
ఐసీడీఎస్ డీసీపీఓ విజయ్ తమ సిబ్బందితో పలుచోట్ల అశ్లీల సినీ పోస్టర్లను తొలగించారు. ఈ సందర్భంగా మహిళా కమిషన్ చైర్ పర్సన్ వాసిరెడ్డి పద్మ మాట్లాడుతూ ఇక మీదట అశ్లీల బొమ్మలతో వాణిజ్య ప్రకటనలుగానీ, సినిమాలకు సంబంధించిన పోస్టర్లు గానీ, హోర్డింగులు గానీ ఏర్పాటు చేయవద్దని చెప్పారు. రోడ్డు డివైడర్ల మీద, రోడ్డు జంక్షన్లలో, ట్రాఫిక్‌ ఐలాండ్ల చుట్టూ ఎటువంటి పోస్టర్లు అతికించరాదని, అతిక్రమించిన వారిపై చట్టపరమైన చర్యలుంటాయని హెచ్చరించారు. మహిళా శిశు సంక్షేమశాఖతో పాటు పోలీసు సిబ్బంది తమ పరిధిలో ప్రతి రోజూ పర్యటిస్తూ అశ్లీలకరంగా ఏర్పాటు చేసే హోర్డింగ్స్, పోస్టర్స్‌ అంటించే వారి వివరాలు తెలుసుకొని చట్టపర చర్యలు తీసుకోవాలని ఆదేశించారు.
