– ఆసియాలోని అత్యంత కలుషిత నగరాలు ఎక్కువగా భారత్ లోనే
– ఆసియాలోని కలుషిత నగరాల జాబితాలో టాప్ టెన్ లో ఎనిమిది భారతీయ నగరాలే
-అందులో గురుగ్రామ్ టాప్
-ధారుహెర నగరంలోనూ కాలుష్యం ఎక్కువే
-గాలినాణ్యత మెరుగ్గా ఉన్న నగరాల జాబితాలో రాజమహేంద్రవరం
( మార్తి సుబ్రహ్మణ్యం)
మన దేశం ఐటీలో తోపు కావచ్చు. కుబేరుల్లో మన వారి సంఖ్య టాప్‌లో ఉండవచ్చు. ప్రపంచమంతా మనవైపు చూడవచ్చు. మన దేశ సంస్కృతి, సంప్రదాయాలు గొప్పవే కావచ్చు. బట్.. ఆసియాలో మన దేశంలోని నగరాలంత బేకార్ సిటీలు మరెక్కడా లేవట. అత్యంత కలుషిత నగరాలు ఆసియాలో ఇంకెక్కడా లేవట. అసలు ఆసియా ఖండంలోని కలుషిత నగరాలకు సంబంధించిన టాప్‌టెన్ జాబితాలో, మన దేశంలోని ఎనిమిది నగరాలున్నాయట.
ఇదేదో కాకి లెక్కలు కాదు. ఎక్కడో కూర్చుని చేసిన సర్వే అంతకంటే కాదు. వరల్డ్ ఎయిర్ క్వాలిటీ ఇండిక్స్ నివేదిక ఇచ్చిన నివేదిక ఇది. సదరు సంస్థ.. ప్రపంచంలో ఏయే నగరాల్లో వాయు-శబ్ద కాలుష్యం ఉంటుంది? అది ఏ మోతాదులో ఉంటుంది? ఏయే దేశాలు, నగరాల్లో కాలుష్యం ఉండదని పరిశీలించి.. నివేదికలివ్వడమే ఈ సంస్థ పని. మరి అంతలావు సంస్థ ఇచ్చిన సర్వేను, వీజీగా కొట్టేయలేం కదా? ఇంతకూ ఈ వరల్డ్ ఎయిర్ క్వాలిటీ ఇండిక్స్ నివేదిక ఏం ఇచ్చిందో ఓ లుక్కేద్దాం రండి.
గాలి కాలుష్యం విషయంలో భారత దేశ నగరాల్లో పరిస్థితులు ఏమంత మెరుగ్గాలేవని వరల్డ్ ఎయిర్ క్వాలిటీ ఇండెక్స్ నివేదిక తేల్చి చెప్పింది. ఆసియాలోని అత్యంత కలుషిత నగరాలు ఎక్కువగా భారత్ లోనే ఉన్నాయని వెల్లడించింది. గాలి నాణ్యత విషయంలో ఏయే నగరాలు మెరుగ్గా ఉన్నాయి, ఏయే నగరాలు అధ్వాన్నంగా ఉన్నాయని పరిశీలించి ఓ నివేదికను విడుదల చేసింది.
ఆసియాలోని కలుషిత నగరాల జాబితాలో టాప్ టెన్ లో ఎనిమిది భారతీయ నగరాలే.. అందులో గురుగ్రామ్ టాప్ లో ఉంది. ఆదివారం ఉదయం గురుగ్రామ్ లో గాలి నాణ్యత సూచి(ఏక్యూఐ) 679 పాయింట్లుగా ఉంది. రేవారి దగ్గర్లోని ధారుహెర నగరంలోనూ కాలుష్యం ఎక్కువే. ఇక్కడ ఏక్యూఐ 543 పాయింట్లుగా నమోదైంది.
బీహార్ లోని ముజఫర్ నగర్ లో ఏక్యూఐ 316 పాయింట్లు, లక్నో దగ్గర్లోని తాల్కోర్ ఏక్యూఐ 298 పాయింట్లు, డీఆర్ సీసీ ఆనంద్ పూర్ (బెగుసరాయ్) లో 269 పాయింట్లు, భోపాల్ ఛౌరాహా(దేవాస్) లో 266 పాయింట్లు, ఖడక్ పాడ(కళ్యాణ్)లో 256 పాయింట్లు, దర్శన్ నగర్(చప్రా)లో 239 పాయింట్లుగా ఏక్యూఐ నమోదైందని వెల్లడించింది.
పక్కనే ఉన్న చైనాలోని క్సియోషియాంగ్ సిటీతో పాటు మంగోలియాలోని ఉలాన్ బాటా నగరం కూడా టాప్ టెన్ లో ఉంది. మరోవైపు, ఆసియాలో గాలినాణ్యత మెరుగ్గా ఉన్న నగరాల జాబితాలో ఆంధ్రప్రదేశ్ లోని రాజమహేంద్రవరం చోటు దక్కించుకుంది. ఆసియాలోని టాప్ టెన్ నగరాల్లో భారత్ నుంచి, టాప్ టెన్ లో నిలిచిన ఒకే ఒక నగరం రాజమహేంద్రవరం కావడం విశేషం. పోనీలెండి. కనీసం ఆంధ్రా అయినా ఇండియా పరువు నిలబెట్టింది. హలో రాజమండ్రేరియన్స్.. వింటున్నారా?
