ఆత్మవిశ్వాసపు మెరుపులు!

మీది ఆవకాయ్ – మాది గోంగూర” అంటూ ప్రేమగా ఒకరినొకరు ఆటపట్టించుకుంటూ సరదాపడే గుంటూరు, విజయవాడ నగరాలు నేడు ప్రపంచం గర్వించే ‘అమరావతి’గా రూపాంతరం చెందుతున్నాయి. గత ఐదేళ్ల ఆవేదనను కడిగేస్తూ, ఈ సంక్రాంతి వేళ ఈ జంట నగరాలు రెండు అద్భుతమైన పండుగలకు వేదికయ్యాయి. అటు వైపు ‘అమరావతి ఆవకాయ్ పండుగ’ మన సంస్కృతిని, రుచులను, పర్యాటక ప్రేమికులను బోట్‌హౌస్‌లకు ఆహ్వానిస్తుంటే.. ఇటు వైపు ‘సరస్’ (SARAS) మేళా మహిళా శక్తికి పట్టాభిషేకం చేస్తోంది.

ఆనాడు అంకురం.. నేడు అఖండ విప్లవం

వంటగది పొగల మధ్య, ఇంటి గడప దాటని ఆడబిడ్డల జీవితాల్లో ఒక చిన్న ‘పొదుపు’ విప్లవాన్ని చంద్రబాబు నాయుడు గారు మూడు దశాబ్దాల క్రితం ప్రారంభించారు.

నాడు బిల్ క్లింటన్, బిల్ గేట్స్ వంటి ప్రపంచ మేధావులను మన పల్లెటూళ్లకు రప్పించి, మన మహిళల ‘పొదుపు మంత్రాన్ని’ వారికి చూపించినప్పుడు ప్రపంచం ఆశ్చర్యపోయింది. ఆనాడు ఆయన కన్న కల, నేడు కోట్లాది కుటుంబాలకు నీడనిచ్చే వటవృక్షమైంది.
అప్పుల కోసం వడ్డీ వ్యాపారులను ఆశ్రయించే మహిళ, నేడు రూ. 26,000 కోట్ల సొంత నిధితో బ్యాంకులకు దిశా నిర్దేశం చేసే స్థాయికి ఎదిగింది.
గుంటూరు వేదికగా ముఖ్యమంత్రి గారు అందించిన రూ. 3,546 కోట్ల రుణాల చెక్కులు (స్త్రీ నిధి – 1,375 కోట్లు, సెర్ప్ – 2,171 కోట్లు) కేవలం సంఖ్యలు కావు. అవి లక్షలాది కుటుంబాల పేదరికాన్ని తుడిచిపెట్టే ఆయుధాలు.

డ్వాక్రా అంటే కేవలం పొదుపు సంఘం మాత్రమే కాదు, అదొక ‘బిజినెస్ ఇంక్యుబేటర్’. ఇప్పటికే 93 వేల మంది మహిళలు సూక్ష్మ, చిన్న తరహా పరిశ్రమలకు అధిపతులుగా (Entrepreneurs) మారడం ఒక అద్భుత పరిణామం.

“ప్రతి ఇంట్లో ఒక పారిశ్రామికవేత్త ఉండాలి” అన్న ముఖ్యమంత్రి విజన్, మహిళలను కేవలం కార్మికులుగా కాకుండా యజమానులుగా మారుస్తోంది.
సరస్ మేళాలో కనిపిస్తున్న హస్తకళలు, నోరూరించే పిండివంటలు కేవలం అమ్మకానికి పెట్టిన వస్తువులు కావు.. అవి మహిళల మేధస్సుకు, శ్రమకు దక్కిన గుర్తింపు.

అరకు కాఫీ నుంచి ఆత్రేయపురం పూతరేకుల దాకా అంతర్జాతీయ స్థాయిలో బ్రాండింగ్ కల్పించడం ద్వారా మన మహిళల ఉత్పత్తులు గ్లోబల్ మార్కెట్‌కు చేరుతున్నాయి.

గడప దాటడానికి సందేహించిన చేతులు, నేడు అంతర్జాతీయ వేదికలపై కరచాలనం చేస్తున్నాయి. ఇది కేవలం ఆర్థిక మార్పు మాత్రమే కాదు, ఒక సామాజిక గౌరవం.

అమరావతి ఆవకాయ్ పండుగ మన మూలాలను గుర్తుచేస్తుంటే, సరస్ మేళా మన ఉజ్వల భవిష్యత్తుకు బాటలు వేస్తోంది. చంద్రబాబు నాయుడు గారి మార్గదర్శకత్వంలో, ఆంధ్రప్రదేశ్ మహిళా లోకం తన అస్తిత్వాన్ని చాటుకుంటూ, నవ శకానికి నాంది పలుకుతోంది.

నిజమే.. భవిష్యత్తు అంతా మహిళలదే!