నిన్నటి వరకు “టీఆర్పీలలో మేమే తోపులు అంటూ”, “బ్రేకింగ్ న్యూస్ అంటే మాదే” అని కాలర్ ఎగరేసిన ఛానల్… ఇప్పుడు తోక ముడిచి ఒక ‘విచారం’ అనే పదాలు స్క్రీన్ మీద పెట్టింది. ఇవి చూస్తుంటే జాలి కలగడం లేదు కానీ, నేటి మీడియా నైతికత ఎంత దిగజారిందో చూసి నవ్వు వస్తోంది.
స్క్రిప్ట్ రైటర్ల జర్నలిజం!
జనవరి 7న ‘ఆఫ్ ది రికార్డ్’ పేరుతో ఒక కల్పిత కథనాన్ని వండి వడ్డించారు. ఇప్పుడు పోలీసులు అరెస్టులు మొదలుపెట్టగానే, “అది ఎవరినీ ఉద్దేశించినది కాదు” అంటూ సన్నాయి నొక్కులు నొక్కుతున్నారు. ఒక అధికారిణి వ్యక్తిత్వాన్ని బజారున పడేసి, ఇప్పుడు అది ‘ఫాంటసీ’ కథ అని బుకాయిస్తారా? వార్త అంటే వాస్తవం ఉండాలి కానీ, మీ ఛానల్ టీఆర్పీ కోసం ఒక మహిళా ఐఏఎస్ అధికారి జీవితంతో “సినిమా స్క్రిప్ట్” రాస్తారా?
మీరు తీసింది ఏమన్నా సినిమానా.. ఇది ఎవరినీ ఉద్దేశించి తీసింది కాదు అని చెప్పడానికి. మీడియా అనే పేరున తోచింది చూపిస్తూ పరువు తీసే హక్కు ఎవడు ఇచ్చాడు? ఏ రాజ్యాంగం ఇచ్చింది?
గౌరవం… అప్పుడు ఏమైంది?
“ఆల్ ఇండియా సర్వీసెస్ అధికారుల పట్ల మాకు గౌరవం ఉంది” అని డిస్క్లైమర్లో రాశారు. మరి ఆ గౌరవం జనవరి 8న ఆ పచ్చి అబద్ధాల వార్తను టెలికాస్ట్ చేస్తున్నప్పుడు ఏ గూటిలో దాక్కుంది?. ఐఏఎస్ అధికారుల సంఘం ఫిర్యాదు చేసి, పోలీసులు బ్యాంకాక్ ఫ్లైట్ ఆపి మరి ఇన్పుట్ ఎడిటర్ని కటకటాల వెనక్కి నెట్టేసరికి, సడన్గా ‘గౌరవం’ అనే పదం గుర్తుకు వచ్చిందా?
అయ్యో పాపం… విచారం!
“మనోభావాలు దెబ్బతిని ఉంటే విచారం వ్యక్తం చేస్తున్నాం”. ఇదొక క్లాసిక్ ఎస్కేప్ రూట్. ఒకరి పరువు తీసి, ఊరంతా ప్రచారం చేశాక, ఒక ‘విచారం’ బోర్డు పెట్టేస్తే సరిపోతుందా? జర్నలిజం అంటే సామాజిక బాధ్యత అనుకున్నాం, కానీ ఇది కేవలం ‘కేసులు పడనంత వరకు మాత్రమే మగాళ్లం’ అనే టైపు జర్నలిజంలా కనిపిస్తోంది.
అధ్యక్షా… ఎన్టీవీ చైర్మన్, సీఈఓ కింద పని చేసే ఎడిటర్ల తో ఇలాంటి ‘విచారకరమైన’ ప్రకటనలు ఇప్పించడం చూస్తుంటే ముచ్చటేస్తోంది. తప్పు చేశామని ఒప్పుకోవడానికి కూడా ధైర్యం లేని ఈ నయా జర్నలిస్టులు, వ్యవస్థలకు నీతులు చెప్పడం ఈ శతాబ్దపు అతి పెద్ద జోక్!
బహుశా ఈ డిస్క్లైమర్ కింద ఇలా రాసుంటే బాగుండేదేమో: “మాకు దొరికినంత కాలం వార్తలు, ఎవరైనా ధైర్యంగా ముందుకు వచ్చి కంప్లైంట్ ఇచ్చి పోలీసులకు దొరికినప్పుడు మాత్రం ఇది మా విచారం!” అని. తుపుక్.
-చాకిరేవు
About the Author
