తెలంగాణ అయినా తెలుగు వ్యక్తే కదా?

• విశాఖ వేదికగా సీఐఐ సదస్సు లో పీవీకి చంద్రబాబు నీరాజనం

ప్రాంతాలు వేరైనా, రాజకీయాలు వేరైనా తెలుగు జాతి ఆత్మగౌరవం, సంస్కృతి విషయంలో తెలుగుదేశం పార్టీ, సీఎం చంద్రబాబు ఎప్పుడూ ముందుంటారనే విషయాన్ని మరోసారి నిరూపించారు. విశాఖపట్నంలో ఘనంగా జరుగుతున్న సీఐఐ భాగస్వామ్య సదస్సులో భాగంగా ఏర్పాటు చేసిన ప్రత్యేక కార్యక్రమంలో మాజీ ప్రధాని, తెలుగు తేజం భారతరత్న పాములపర్తి వెంకట నరసింహారావు ఫోటోను ప్రదర్శించడం ప్రస్తుతం రాజకీయ వర్గాలలో తీవ్ర చర్చనీయాంశంగా, అభినందనీయంగా మారింది.

గతంలో తెలంగాణలో దివంగత గానగంధర్వుడు ఎస్పీ బాలసుబ్రమణ్యం విగ్రహం ఏర్పాటు సమయంలో కొన్ని ప్రాంతీయ ఉద్రిక్తతలు చోటుచేసుకున్న ఉదంతాలను ఈ సందర్భంగా రాజకీయ విశ్లేషకులు గుర్తుచేస్తున్నారు. కానీ, ఏ ఆంధ్రప్రదేశ్ గడ్డపై అయితేనేమి, ఏ వేదికపై అయితేనేమి…తెలుగు జాతి గర్వించదగ్గ గొప్ప వ్యక్తి పీవీ నరసింహారావును చంద్రబాబు నాయుడు అత్యంత గౌరవప్రదంగా విశాఖ సదస్సులో స్మరించుకోవడం తెలుగు జాతి గొప్పతనాన్ని చాటుతోంది. తెలంగాణ వ్యక్తి అయినా.. తెలుగు కమ్యూనిటీ కదా! తెలుగు వారందరినీ మనం గౌరవిస్తాం అంటూ సీఎం చంద్రబాబు చేసిన వ్యాప్తులు సదస్సులో ఉన్న ప్రతి ఒక్కరినీ ఆకట్టుకున్నాయి.

కేంద్ర మంత్రి పీయూష్ గోయల్ సమక్షంలో జరిగిన ఈ కార్యక్రమంలో, దేశ ఆర్థిక ప్రగతికి పీవీ అందించిన సంస్కరణలను, తెలుగు జాతికి ఆయన తెచ్చిన ఖ్యాతిని ఈ సందర్భంగా కొనియాడారు. ప్రాంతీయ విభజనలకంటే తెలుగువారంతా ఒక్కటే అనే భావనను, ఇతర ప్రాంతాల తెలుగు ప్రముఖులకు ఇచ్చే సముచిత గౌరవాన్ని చంద్రబాబు మరోసారి ఆచరించి చూపించారు. ఇప్పుడు ఈ వీడియో సోషల్ మీడియాలో వైరల్ అవుతుండటంతో, ఇది కదా అసలైన నాయకత్వ లక్షణం, తెలుగు జాతిపై చంద్రబాబుకు ఉన్న మమకారం అంటూ నెటిజన్లు, తెలుగు ప్రజలు ఆయన సంస్కారాన్ని ప్రశంసిస్తున్నారు.

నిజానికి, తెలుగు జాతి సంస్కృతి, భాషాభిమానం విషయంలో సీఎం చంద్రబాబు, తెలుగుదేశం పార్టీ ఎప్పుడూ విశాల దృక్పథంతో వ్యవహరిస్తారనేందుకు ఈ ఘటనే ప్రత్యక్ష నిదర్శనం. ప్రాంతీయ విభజనలకంటే తెలుగువారంతా ఒక్కటే అనే సత్యానికి పెద్దపీట వేస్తూ, ఏపీ గడ్డపై తెలంగాణ బిడ్డ అయిన పీవీ నరసింహారావుకు ఘనమైన గౌరవం దక్కేలా చేయడం వారి విశాల మనస్తత్వానికి ప్రతీకగా నిలుస్తోంది.