గర్భిణీ జర్నలిస్టును నెట్టి పారేసిన రాహుల్ గాంధీ?
- ఆసుపత్రిలో చికిత్స పొందుతున్న మహిళా జర్నలిస్టు
ఢిల్లీ: కేంద్ర ఎన్నికల సంఘం ప్రధానాధికారి తీరును నిరసిస్తూ విపక్ష ‘ఇండియా’ కూటమి ఆధ్వర్యంలో జరిగిన నిరసన ప్రదర్శనల సమయంలో తీవ్ర ఉద్రిక్తత నెలకొంది.
ఈ నిరసనను కవర్ చేయడానికి వెళ్లిన ‘వన్‌ఇండియా’ వార్తా వెబ్‌సైట్ జర్నలిస్ట్, మూడు నెలల గర్భిణి అయిన రిచా పరాశర్‌పై కాంగ్రెస్ సీనియర్ నేత, లోక్‌సభలో ప్రతిపక్ష నాయకుడు రాహుల్ గాంధీ దురుసుగా ప్రవర్తించారంటూ తీవ్ర ఆరోపణలు గుప్పించారు.
ప్ర‌స్తుతం ఆమె ఢిల్లీలోని ఆస్ప‌త్రిలో చికిత్స పొందుతున్నారు. రాహుల్ గాంధీ తన చేయిని లాగి కింద‌ప‌డేలా చేశాడ‌ని ఆమె తన ఇన్‌స్టాలో పోస్టు చేసిన వీడియోలో చెప్పారు. త‌మ కెమెరామ‌న్‌ను కూడా రాహుల్ కింద‌ప‌డేలా లాగిన‌ట్లు ఆమె పేర్కొన్నారు. తన చేయి పట్టుకుని బలంగా లాగడం వల్ల కిందపడిపోయానని, ఈ ఘటనలో తన మోకాళ్లు, కడుపునకు తీవ్ర గాయాలు అయ్యాయని తెలిపారు. ఆస్పత్రి బెడ్ మీద పడుకునే ఆమె ఈ విషయాలను తెలపగా, కాంగ్రెస్ తీవ్రంగా ఖండిస్తోంది.
సుప్రీం కోర్టు ప్రాంగణంలోని ఒక గేటు వద్ద రాహుల్ గాంధీ బయటకు వచ్చే క్షణం కోసం తాను మైక్ పట్టుకుని ఎదురు చూస్తున్నట్లు రిచా పరాశర్ తెలిపారు. రాహుల్ గాంధీ రాగానే తాను సౌండ్‌బైట్ కోసం మైక్ ముందుకు పెట్టానని, ఆయన దానిని పక్కకు జరపమని సైగ చేయడంతో అలాగే వెనక్కి తగ్గానని పేర్కొన్నారు. అయితే అకస్మాత్తుగా ఇతర జర్నలిస్టులు కూడా మైకులు ముందుకు తోయడంతో వృత్తిపరమైన బాధ్యతలో భాగంగా తాను కూడా తన మైక్‌ను మళ్లీ ముందుకు పెట్టానని ఆమె వివరించారు.
ఆ సమయంలో రాహుల్ గాంధీ అత్యంత అసహ్యకరంగా ముఖాన్ని పెట్టి, తన చేతిని బలంగా పట్టుకుని లాగారని ఆమె ఆరోపించారు. అంతటితో ఆగకుండా ఆయన సెక్యూరిటీ సిబ్బంది తనను పక్కకు తోసేయడంతో కోర్టు ప్రవేశ ద్వారం వద్ద ఉన్న మెట్లపై తాను బోర్లా పడిపోయానని తెలిపారు. తన వెనుక ఉన్న కెమెరామెన్ కూడా తనపై పడిపోవడంతో తన ఫోన్ పూర్తిగా ధ్వంసమైందని, మైక్ రిసీవర్ ఊడిపోయిందని ఆరోపించారు. ఈ ఊహించని పరిణామంతో తనకు శ్వాస ఆడలేదని, దేశంలోనే ఒక ప్రముఖ ప్రతిపక్ష నేత నుంచి ఇలాంటి ప్రవర్తనను తాను ఊహించలేదని ఆమె వాపోయారు.
అయితే, ఇదంతా బీజేపీ పార్టీ ఆడుతున్న ఒక డ్రామా అని, కేవలం రాజకీయ ప్రచారం కోసమే సృష్టించిన అబద్ధమని కాంగ్రెస్ నేత అల్కా లాంబా కొట్టిపారేశారు. గర్భవతిగా ఉన్న సమయంలో నిరసనల్లో పాల్గొనడమే ప్రమాదకరమని, రాహుల్ గాంధీ మధ్యాహ్నం 3 నుంచి 4 గంటల మధ్య తనను నెట్టేశారని చెబుతున్న బాధితురాలు రాత్రి 8.30 గంటలకు ఆసుపత్రిలో చేరడం వెనుక అనుమానాలు ఉన్నాయని ఎక్స్ వేదికగా ప్రశ్నించారు.
గర్భవతిగా ఉన్నప్పుడు సాధారణంగా ఎక్స్‌రే తీయించరని, కానీ ఆమె విషయంలో నిబంధనలు పాటించలేదని ఆరోపించారు. కాంగ్రెస్ నాయకులు విడుదల చేసిన కొన్ని వీడియో క్లిప్పింగ్‌లలో రాహుల్ గాంధీ జర్నలిస్టును నెట్టినట్లు స్పష్టంగా ఎక్కడా లేదని, కేవలం రద్దీ, గందరగోళం మాత్రమే కనిపిస్తోందని వారు స్పష్టం చేశారు.
“నన్ను కిందకు లాగడానికి ప్రయత్నించడం ద్వారా కాంగ్రెస్ సిగ్గుచేటైన పని చేస్తోంది. వారికి సిగ్గుండాలి. వారు నా నోరు మూయించలేరు. వారు వచ్చి నన్ను చూసి, సహాయం అందించాలి. ఎటువంటి ఎక్స్-రే తీయలేదు,” అని పరాశర్ ఎన్డీటీవీతో పేర్కొన్నారు. జనసందోహంలో రాహుల్ గాంధీ, పరాశర్ కనిపించే ఆ అస్పష్టమైన వీడియోలో, ఆయన ఆమెను నెట్టడం లేదా లాగడం అనేది స్పష్టంగా రుజువు కావడం లేదని కాంగ్రెస్ పేర్కొంది.
అది వాస్తవం కాదని పరాశర్ చెబుతూ “వీడియోలో అది చాలా స్పష్టంగా కనిపిస్తోంది,” అని స్పష్టం చేశారు. “ఆయన నన్ను నెట్టి, గట్టిగా లాగిన వెంటనే, నా కెమెరాపర్సన్‌ను బలంగా కొట్టారు. వీడియోలో మీరంతా అది స్పష్టంగా చూసే ఉంటారు. పసుపు రంగు టోపీ ధరించిన వ్యక్తి నా కెమెరాపర్సన్; అతన్ని నెట్టివేశారు,” అని ఆమె చెప్పారు.
“ఆయన నన్ను నెట్టడం వల్ల నేను కింద పడిపోయాక, నా గొంతు బయటకు వినిపించకుండా ఉండేందుకు రాహుల్ గాంధీ అనుచరులు ‘రాహుల్ గాంధీ జిందాబాద్’ అని నినాదాలు చేయడం మొదలుపెట్టారు. నా పరిస్థితి ఎలా ఉందో అడగడం లేదా కనీసం కాస్త నీళ్లు ఇచ్చి సహాయం చేయడం వంటివి చేయకుండా, వారు నన్ను అబద్ధాలకోరు అని పిలుస్తూ వాదనకు దిగారు,” అని పరాశర్ ఆగ్రహం వ్యక్తం చేశారు.
ఈ ఘటనపై బీజేపీ అధికార ప్రతినిధి ప్రదీప్ భండారీ తీవ్రంగా స్పందించారు. ఆసుపత్రిలో చికిత్స పొందుతున్న జర్నలిస్టును పరామర్శించిన ఆయన మహిళా సాధికారత గురించి మాట్లాడే రాహుల్ గాంధీ ఒక గుండాలా ప్రవర్తించారని మండిపడ్డారు. కాంగ్రెస్ పార్టీ తీరును దేశంలోని మహిళలందరూ గమనించాలని హితవు పలికారు. ఆ గర్భిణీ జర్నలిస్టుకు సహాయం చేయడానికి ఏ ఒక్క కాంగ్రెస్ కార్యకర్తా ముందుకు రాలేదని, పైగా ఆమెపై “అపవాదులు మోపే” ప్రయత్నం చేశారని ఆయన మండిపడ్డారు.
రాహుల్ గాంధీ తన మోచేతితో జర్నలిస్టును నెట్టడం, ఆమెను పట్టుకోవడం వల్ల ఆమె కింద పడిపోవడం ఒక వీడియోలో కనిపిస్తోందని భండారి పేర్కొన్నారు. ఆసుపత్రిలో కలిసినప్పుడు, గాంధీ తన భుజం పట్టుకుని కిందకు లాగారని ఆ జర్నలిస్ట్ బీజేపీ నాయకులతో చెప్పారని ఆయన తెలిపారు. “ఆమె ఆయనను ఏమీ ప్రశ్నించడం లేదు; కేవలం నిరసన కార్యక్రమాన్ని కవర్ చేస్తోంది,” అని భండారి గుర్తు చేశారు.