మధ్య ప్రాచ్య దేశాలు టర్కీ, సిరియాలను ఈ ఉదయం 7.8 తీవ్రతతో భారీ భూకంపం అతలాకుతలం చేసిన సంగతి తెలిసిందే. వేలాది భవనాలు నేలమట్టం కాగా, 1200 మందికి పైగా ప్రాణాలు విడిచారు. కాగా, టర్కీని ఈ మధ్యాహ్నం మరో భారీ భూకంపం కుదిపేసింది. రిక్టర్ స్కేలుపై దీని తీవ్రత 7.5గా నమోదైంది.
స్థానిక కాలమానం ప్రకారం ఈ మధ్యాహ్నం 1.24 గంటలకు రెండో భూకంపం సంభవించినట్టు యూఎస్ జియోలాజికల్ సర్వే (యూఎస్ జీఎస్) వెల్లడించింది. ఈ భూకంప కేంద్రం ఎకినోజు పట్టణానికి దక్షిణ ఆగ్నేయంగా 4 కిలోమీటర్ల దూరంలో ఉన్నట్టు గుర్తించారు. తాజా భూకంపంతో జరిగిన నష్టం వివరాలు ఇంకా తెలియాల్సి ఉంది. ఒక్క టర్కీలోనే మృతుల సంఖ్య వేలల్లో ఉండొచ్చని భావిస్తున్నారు.
