– బైజూస్ తో ఒప్పందం కూడా వరల్డ్ బ్యాంక్ షరతులలో భాగమే
– ఇది జాతీయ విద్యా విధానం స్ఫూర్తికి పూర్తి వ్యతిరేకం
రాష్ట్రంలో నూతన జాతీయ విద్యా విధానం ( NEP ) అమలు ముసుగులో ప్రపంచ బ్యాంక్ నిర్దేశిత షరతులకు అనుగుణంగా తెస్తున్న సంస్కరణలు విద్యా వ్యవస్థకే పెను ప్రమాదంగా పరిణమిస్తున్నాయి. విద్యా రంగంలో ప్రభుత్వం తెచ్చిన జీవో లు 117, 172 జాతీయ విద్యా విధానం 2020 లో పేర్కొన్న అనేక అంశాలకు పూర్తి విరుద్ధంగా, సరికొత్త సమస్యలు రేకెత్తించేవిగా ఉన్నాయి. భారతదేశం ప్రపంచంలోని మూడు అతిపెద్ద ఆర్థిక వ్యవస్థలలో ఒకటిగా ఎదుగుతున్న క్రమంలో మానవ విజ్ఞాన శాస్త్రాలకు, కళలకు ఎంతో డిమాండ్ ఏర్పడుతోంది. నిజానికి వేగంగా మారుతున్న ఉపాధి రంగం, ప్రపంచ జీవావరణ వ్యవస్థల వల్ల పిల్లలు కేవలం నేర్చుకుంటే సరిపోదు.
అందువల్ల విద్యతో పాటు, తార్కికంగా ఎలా ఆలోచించాలి, సమస్యలను ఎలా పరిష్కరించాలి, సృజనాత్మకంగా ఎలా ఉండాలి, బహు శాస్త్ర విషయాలను ఎలా నేర్చుకోవాలి, పరిశోధనాత్మకంగా ఎలా ఉండాలి, నూతన విధానాలను ఎలా అవగాహన చేసుకోవాలి అనే దిశలో బోధన సాగాలని జాతీయ విద్యా విధానం నిర్దేశించింది. ఇప్పటి వరకు అమలులో ఉన్న 10+2 పాఠశాల విద్యా పద్ధతి స్థానంలో 3 నుంచి 18 వయసు విద్యార్థుల కోసం 5+3+3+4 పద్ధతిని ప్రవేశ పెడుతున్నారు. ఇది ఈక్రింది విధంగా అమలు చేయబడుతుంది.
పునాది దశ: ఇది రెండు భాగాలుగా విభజించబడింది. 3 సంవత్సరాల ప్రీస్కూల్ లేదా అంగన్‌వాడీ , తరువాత ప్రాథమిక పాఠశాలలో 1 మరియు 2 తరగతులు. ఇది 3-8 సంవత్సరాల వయస్సు పిల్లలకు వర్తిస్తుంది.
ప్రిపరేటరీ దశ: 3 నుండి 5 తరగతులు, ఇది 8-10 సంవత్సరాల వయస్సు వరకు ఉంటుంది. ఇది క్రమంగా మాట్లాడటం, చదవడం, రాయడం, శారీరక విద్య, భాషలు, కళ, సైన్స్ మరియు గణితం వంటి విషయాలను పరిచయం చేస్తుంది.
మధ్య దశ: 6 నుండి 8 తరగతులు, 11 మరియు 13 సంవత్సరాల మధ్య వయస్సు గల విద్యార్థులకు గణితం, శాస్త్రాలు, సాంఘిక శాస్త్రాలు, కళలు మరియు మానవీయ శాస్త్రాలలో మరింత వియుక్త భావనలను పరిచయం చేస్తుంది.
సెకండరీ స్టేజ్: 9 నుండి 12 తరగతులు, 14-18 సంవత్సరాల వయస్సు. ఇది మళ్లీ రెండు భాగాలుగా విభజించబడింది: 9 మరియు 10 తరగతులు మొదటి దశను కలిగి ఉండగా, 11 మరియు 12 తరగతులు రెండవ దశ. ఈ 4 సంవత్సరాల అధ్యయనం లోతైన క్రిటికల్ థింకింగ్‌తో పాటు మల్టీడిసిప్లినరీ స్టడీని పెంపొందించడానికి ఉద్దేశించబడింది. సబ్జెక్టుల యొక్క బహుళ ఎంపికలు అందించబడతాయి. ప్రతి విద్యాసంవత్సరం పరీక్షలకు బదులుగా , పాఠశాల విద్యార్థులు 2, 5 మరియు 8 తరగతులలో మూడు పరీక్షలకు మాత్రమే హాజరవుతారు
నూతన విద్యా విధానంలో పాఠశాల విద్యకు అత్యంత ప్రాధాన్యత ఇస్తే, దాని అమలు ముసుగులో, ప్రపంచ బ్యాంక్ నిబంధనల ప్రకారం ఆంధ్రప్రదేశ్ ప్రభుత్వం పాఠశాలల విలీనం, ఉపాధ్యాయుల రేషనలైజేషన్ విధానాలను అవలంబిస్తూ పాఠశాల విద్యను సామాన్యులకు దూరం చేస్తోంది. ప్రపంచ బ్యాంక్ 250 మిలియన్ యుఎస్ డాలర్ల రుణానికి సంబంధించి ఆంధ్రప్రదేశ్ ప్రభుత్వం విడుదల చేసిన రాజపత్రం ( గజెట్ నెం 143 ) పరిశీలిస్తే ప్రభుత్వంలోని రాజకీయ పెద్దలు చెబుతున్న అనేక అవాస్తవాలు తేటతెల్లం అవుతాయి.
దీనిలో ఉపాధ్యాయుల నియామకంపై ఆంక్షలు, పాఠశాల విద్యలో ఆంగ్ల మాధ్యమం ప్రవేశపెట్టాలనే నిబంధన, పబ్లిక్, ప్రైవేట్ భాగస్వామ్యంతో అభివృద్ధి పనులు చేపట్టాలనే షరతులు వున్నాయి. పాఠశాలలో చేరే విద్యార్థుల సంఖ్య తగ్గటం, డ్రాపవుట్ సంఖ్య పెరగడం .. 2021 సం.లో మాధ్యమిక విద్యలో బడి మానివేసిన వారి సంఖ్య 16.7 శాతానికి పెరగడం .. వివిధ స్థాయిలలో దాదాపు 2.80 లక్షల విద్యార్థులు పై చదువులకు నమోదు చేసుకోకపోవడం ఆందోళన కలిగిస్తోంది.
నూతన జాతీయ విద్యా విధానం ఉద్దేశ్యమైన సంపూర్ణ అక్షరాస్యత సాధించాలంటే విద్య అందుబాటులో ఉండాలి. ప్రస్తుతం ప్రాథమిక స్కూళ్ల‌లో ఉన్న 3, 4, 5 తరగతులను ద‌గ్గ‌ర‌ల్లోని యూపీ స్కూల్‌ లేదా హైస్కూళ్లకు తరిలించాలని, 3 కిలోమీటర్ల పరిధిలోపు ఉన్న ప్రాథమిక పాఠశాలల విద్యార్థులనే ఇలా తరలింపు చేయాలని ప్రభుత్వం నిర్ణయించింది. ఎన్ ఈ పి అమలు చేసినా ఎక్క‌డా ఒక్క అంగన్‌వాడీ కేంద్రంగానీ, స్కూలు గానీ మూతపడ కూడదని స్పష్టంగా పేర్కొన్నారు.
దీనికి విరుద్ధంగా తరగతులను తరలించడం, పాఠశాలలను విలీనం చేయడం, ఏకైక ఆంగ్ల మాధ్యమాన్ని అమలు,చేయడం వల్ల సంపూర్ణ అక్షరాస్యత లక్ష్యం మరింత దూరం అవుతుంది. రాష్ట్రంలో 34000 ప్రాథమిక పాఠశాలలు, 6400 ప్రాథమికోన్నత పాఠశాలలు, 6400 జిల్లా పరిషత్ పాఠశాలలు ఉంటే, తరగతులు మరియు పాఠశాలల విలీనం వల్ల దాదాపు 10 వేల పాఠశాలలు మూతబడ్డాయి. అందుబాటులో పాఠశాలలు లేనందువల్ల విద్యార్థులు, ముఖ్యంగా బాలికలు విద్యకు దూరమయ్యే ప్రమాదం ఉంది. ప్రభుత్వం ఆందోళనకరంగా గుర్తించిన విషయమైన పాఠశాలలో చేరే విద్యార్థుల సంఖ్య తగ్గటం, డ్రాపవుట్ సంఖ్య పెరగడం మరింతగా పెరిగే అవకాశం ఉంటుంది.
బైజూస్ తో ఒప్పందం కూడా వరల్డ్ బ్యాంక్ షరతులలో భాగమే. అదేవిధంగా ప్రపంచ బ్యాంకు నిర్దేశించిన విధంగా పబ్లిక్, ప్రైవేట్ భాగస్వామ్యం ( పి పి పి ) అమలు చేయడం వలన విద్య క్రమంగా కార్పొరేట్ సంస్థల అధీనంలోకి వెళ్లి, పేదలకు నాణ్యమైన విద్య లభించడం గగన మౌతుంది. మరి ఈవిధానం అమలు వల్ల జరిగే నష్టాన్ని ప్రభుత్వం అంచనా వేయలేక పోయిందా లేక అంచనా వేసినా ప్రపంచ బ్యాంక్ షరతులకు లొంగిందా?
జాతీయ విద్యా విధానం ప్రకారం టీచర్, విద్యార్థుల నిష్పత్తి ప్రాథమిక స్థాయిలో 1:30, మాధ్యమిక స్థాయిలో 1:35, సెకండరీ స్థాయిలో 1:40 ఉండేలా చూడాలి. పైన పేర్కొన్న రాజపత్రం లో విద్యార్థుల ఉపాధ్యాయుల నిష్పత్తి (పి టి ఆర్ ) ప్రతికూలంగా ఉన్న ప్రాథమిక పాఠశాలలు 47.56 శాతం, మాధ్యమిక పాఠశాలలు 17.93 శాతంగా పేర్కొన్నారు. ప్రాథమిక పాఠశాలల్లో 39000, మాధ్యమిక పాఠశాలల్లో 11888 మొత్తం 50888 టీచర్ పోస్టులు ఖాళీగా ఉన్నాయని కూడా ప్రభుత్వం తెలిపింది. కానీ సంస్కరణల పేరుతో, ఉపాధ్యాయ, విద్యార్థుల నిష్పత్తి పెంచుకుంటూ పోయి రాష్ట్రంలో 36 వేల మందిని మిగులు టీచర్లుగా చూపుతోంది ప్రభుత్వం. అంటే జనవరి 2022 లో 50888 టీచర్ పోస్టులు ఖాళీ ఉన్నాయని తెలిపిన ప్రభుత్వం ప్రస్తుతం 36 వేల టీచర్ పోస్టులు మిగులు చూపడం జిమ్మిక్కులు తప్ప వేరేమీ కాదు.
2 నుండి 8 ఏళ్ల వయసు పిల్లలు చాలా వేగంగా భాషలను నేర్చుకుంటారని పరిశోధనలు స్పష్టం చేస్తున్నాయి. మాతృ భాషకు ప్రాధాన్యతనిస్తూ, త్రిభాషా సూత్రం అమలు చేస్తూ, పిల్లలకు వివిధ భాషలను పునాది స్థాయి నుండే తప్పనిసరిగా నేర్పించాలని జాతీయ విద్యా విధానం 2020 సూచించింది. అయితే 8వ తరగతి మరియు ఆ తర్వాత దాని కొనసాగింపును సిఫార్సు చేసింది. విద్యార్థులందరూ తమ పాఠశాలలో మూడు భాషలను నేర్చుకోవాలని పాలసీ సిఫార్సు చేస్తోంది. మూడు భాషల్లో కనీసం రెండైనా భారతీయ భాషలై ఉండాలి. విద్యార్థులపై నిర్బంధంగా ఎలాంటి భాషా ప్రయోగించ కూడదు. కానీ మన రాష్ట్రంలో ఒకటవ తరగతి నుండి ఎనిమిదవ తరగతి వరకు ఆంగ్లంలో బోధనను తప్పనిసరి చేశారు, మాతృభాషలో బోధన లేదని తేల్చేశారు. ఇది జాతీయ విద్యా విధానం స్ఫూర్తికి పూర్తి వ్యతిరేకం మరియు ప్రపంచ బ్యాంకు షరతులకు అనుకూలం.
రాజ్యాంగం కల్పించిన నిర్భంధ ఉచిత విద్యను అటకెక్కించి, విద్యను వ్యాపారీకరణ చేసి, కార్పొరేట్ సంస్థలకు, బహుళ జాతి సంస్థలకు మేలు కలిగించే సంస్కరణలను ఇప్పటికైనా రాష్ట్ర ప్రభుత్వం మానుకోవాలి. కేవలం రూ. 6800 కోట్ల ఋణం కోసం నూతన జాతీయ విద్యా విధానం అమలు చేస్తున్నామని నమ్మబలుకుతూ, ఆ విద్యా విధానానికి వ్యతిరేకంగా, ప్రపంచ బ్యాంక్ షరతులను పాటిస్తూ విద్యా రంగంలో జగన్మోహన్ రెడ్డి ప్రభుత్వం తెస్తున్న వినాశకర సంస్కరణలు భవిష్యత్తులో విద్యారంగానికి శాపంగా పరిణమించే అవకాశం ఉంది. మేధావులు, విజ్ఞులు, ప్రజాస్వామ్య వాదులు స్పందించక పోతే భవిష్యత్ తరాలు నష్ట పోతాయి.
