తిరుపతి, జూలై 28: ఈ నెల 29 న అంతర్జాతీయ పులుల దినోత్సవం సందర్భంగా తిరుపతి శ్రీ వెంకటేశ్వర జంతు ప్రదర్శన శాల నందు రాష్ట్ర స్థాయి ప్రత్యేక కార్యక్రమం నిర్వహించటం జరుగుతుందని రాష్ట్ర అటవీ శాఖ మంత్రి క్యాంప్ కార్యాలయం నుండి ఒక ప్రకటన లో తెలిపారు. ఈ కార్యక్రమానికి రాష్ట్ర అటవీ, మైనింగ్ , విద్యుత్ శాఖా మాత్యులు పెద్ది రెడ్డి రామచంద్రా రెడ్డి , రాష్ట్ర అటవీ దళాల అధిపతి వై.మధుసూధన్ రెడ్డి , ఐ.ఎఫ్.ఎస్. లు ముఖ్య అతిధిలుగా హాజరు కానున్నారని, ప్రతి ఏటా జూలై 29 వ తేదీన అంతర్జాతీయ పులుల దినోత్సవాన్ని జరుపుకోవటం ఒక ఆనవాతీగా వస్తోంది. పర్యావరణ పరిరక్షణలో పులుల ప్రాముఖ్యత ను గుర్తించిన ఆంధ్ర ప్రదేశ్ ప్రభుత్వం ముఖ్యంగా ముఖ్యమంత్రి వై.ఎస్.జగన్ మోహన్ రెడ్డి ఆంధ్రప్రదేశ్ లో పులుల సంతతిని పెంచడానికి, వాటి సంరక్షణ కు రాష్ట్ర అటవీ శాఖకు ప్రత్యేక ఆదేశాలు ఇవ్వడమే కాకుండా అవసరమైన అన్ని సౌకర్యాలు కల్పిస్తూ వస్తున్నారు. అటవీ శాఖా మంత్రి పెద్ది రెడ్డి రామచంద్రా రెడ్డి చొరవతో రాష్ట్ర స్థాయి పులుల దినోత్సవ కార్యక్రమాన్ని తిరుపతి జూ పార్క్ లో ఏర్పాటు చేయడం జరిగింది. శుక్రవారం ఉదయం ఈ కార్యక్రమం జరగనుంది.
