2020 లో రిపబ్లిక్ టివి ఎడిటర్ ఇన్ చీఫ్ ఆర్నాబ్ గోస్వామి అరెస్ట్ తరువాత శివసేన MPసంజయ్ రౌత్ చేసిన వ్యాఖ్య ఇది!
సరిగ్గా రెండేళ్ల తరువాత దృశ్యం తిరగబడింది. గత 40 రోజులుగా జైల్లో కాలం గడుపుతున్న సంజయ్ రౌత్ కి తాజాగా మరో 14 రోజుల ED కస్టడీ ని పొడిగిస్తూ ప్రత్యేక కోర్ట్ ఉత్తర్వులు ఇచ్చింది.
అంటే వచ్చే దీపావళి పండుగని సంజయ్ రౌత్ జైల్లో నే చేసుకోవాల్సి ఉంటుంది!
పత్రా చాల్[Patra Chawl] భూ కుంభకోణం కేసులో మరియు మనీ లాండరింగ్ కేసులో సిబిఐ, ED లు సంయుక్తంగా చేస్తున్న దర్యాప్తులో భాగంగా సంజయ్ రౌత్ ని ED అరెస్ట్ చేసింది. గత సంవత్సరం డిసెంబర్ నెల నుండి వరుసగా మూడు సార్లు దశల వారీగా తమ ముందు హాజరు కమ్మని ED ఇచ్చిన సమన్ల ని లెక్క చేయలేదు సంజయ్ రౌత్ సరి కదా అరెస్ట్ చేస్తారా? చేయండి చూద్దాం అంటూ సవాల్ విసిరాడు ED కి.
పత్రా చాల్ కుంభకోణం ఏమిటి?
పత్రా చాల్ అనే ప్రాంతం ముంబై సబ్ అర్బన్ ప్రాంతం అయిన గోరేగావ్ దగ్గర ఉంది. బ్రిటీష్ వారి కాలం నాడు పత్రా చాల్ లో షుమారుగా 42 ఎకరాల స్థలంలో 627 సింగిల్ రూమ్ ఫ్లాట్స్ కట్టి ఇచ్చింది అప్పటి బ్రిటీష్ ప్రభుత్వం. ఈ ఫ్లాట్ లలో బ్రిటీష్ వారి గుర్రాలని చూసుకునే పనివాళ్ళు ఉండేవారు. అప్పట్లో బ్రిటీష్ ప్రభుత్వం వీరికి శాశ్వత నివాస ప్రాతిపదికన ఈ 627 ఫ్లాట్స్ కట్టి ఇచ్చింది. స్వాతంత్ర్యం వచ్చిన తరువాత ఈ ప్రదేశం మహారాష్ట్ర హౌసింగ్ డెవలప్మెంట్ కిందకి వచ్చింది.
2007 లో అప్పటి మహారాష్ట్ర కాంగ్రెస్ ముఖ్యమంత్రి విలాస్ రావ్ దేశముఖ్ హయాంలో పత్రా చాల్ కుంభకోణానికి తెర లేచింది. అయితే దీనిలో ప్రముఖ పాత్ర వహించింది మాత్రం సంజయ్ రౌత్, అతని ముఖ్య అనుచరుడు అయిన ప్రవీణ్ రౌత్. 2007 మహారాష్ట్ర హౌసింగ్ అండ్ ఏరియా డెవలప్మెంట్ ఆధారిటీ[Maharashtra Housing and Area Development Authority(MHADA)] పత్రా చాల్ కి సంబంధించి 42 ఎకరాల భూమిని స్వాధీనం చేసుకొని అప్పటికే అక్కడి ఫ్లాట్స్ లో ఉంటున్న ప్రజలకి కొత్తగా కట్టబోయే ఫ్లాట్స్ లో నివాసం కల్పిస్తామని హామీ ఇచ్చి వాళ్ళని ఖాళీ చేయించి పాత ఫ్లాట్స్ ని కూలగొట్టి భూమిని చదును చేసింది MHADA. ఈ తరుణంలో రంగంలోకి దిగిన సంజయ్ రౌత్ తన ముఖ్య అనుచరుడు డైరెక్టర్ గా ఉన్న ’గురుఆశిష్ కనస్ట్రక్షన్ ప్రైవేట్ లిమిటెడ్[Guru Ashish Construction Pvt Ltd] చేత MHADA తో 42 ఎకరాల స్థలాన్ని డెవలప్మెంట్ కోసం అగ్రిమెంట్ కుదుర్చుకునేలా పైరవీ చేశాడు. మొత్తం 3 వేల ఫ్లాట్స్ కట్టి MHADA అప్పచెప్పాలి గురు ఆశిష్ కనస్ట్రక్షన్ ప్రైవేట్ లిమిటెడ్. ఇందులో ఎప్పటి నుండో ఉంటున్న 672 ఫ్లాట్ లలోని ప్రజలకి కొత్తగా కట్టబోయే ఫ్లాట్స్ ని కేటాయించాల్సి ఉంటుంది. మిగతావి బయట వ్యక్తులకి అమ్ముకుంటుంది గురు ఆశిష్ కంపనీ.
672 ఫ్లాట్ల లో ఉంటున్న వారికి ఎలాంటి ఫ్లాట్స్ కట్టి ఇవ్వలేదు గురు ఆశిష్ కంపనీ. కాగా మొత్తం భూమిని మూడు భాగాలుగా విభజించి ముగ్గురు డెవలపర్ లకి 1000 కోట్ల కి అమ్మేసుకుంది. ఇందులో 100 కోట్ల రూపాయలు సంజయ్ రౌత్ అకౌంటు కి బదిలీ చేయబడ్డాయి. అక్కడ నుండి వివిధ బినామీ అక్కౌంట్లలోకి మొత్తం వెయ్యి కోట్ల రూపాయలు వెళ్లిపోయాయి. ఇక నగదు రూపంలో 84 లక్షల రూపాయలు సంజయ్ రౌత్ భార్య అయిన వర్ష రౌత్ కి ఇచ్చారు. ఈ డబ్బుతో వర్ష రౌత్ దాదర్ ప్రాంతంలో ఒక ఫ్లాట్ కొన్నది అపార్ట్మెంట్ లో. వర్ష రౌత్ కి 83 లక్షలు ఇచ్చింది ప్రవీణ్ రౌత్ భార్య అయిన మాధురి రౌత్.
2007 నుండి 2010 వరకు ఈ తతంగం నడిచింది!
ఆలీ బాగ్ దగ్గర ఉన్న కిహిం బీచ్[Kihim beach] ప్రాంతంలో మొత్తం 8 ప్లాట్స్[ఇళ్ల స్థలాలు] భార్య వర్ష రౌత్ పేరు మీద కొన్నాడు సంజయ్ రౌత్. అయితే సుజిత్ పాట్కర్[sujit patkar] అనే ఇంకొక ముఖ్య అనుచరుడి భార్య అయిన స్వప్న పాట్కర్ పేరు మీద బినామీ పేర్లతో స్థలాలు కొన్నాడు సంజయ్ రౌత్.
తమకేమీ సంబంధం లేకపోయినా సంజయ్ రౌత్ బలవంతంగా తమ పేర్ల మీద ఇళ్ల స్థలాలు కొన్నాడని ఇప్పుడు ఆ విషయంలో అనవసరంగా తాము జైలుకి వెళ్లాల్సి వస్తుంది అని సుజిత్ పాట్కర్ భార్య స్వప్న పాట్కర్ అసలు నిజాలు చెప్పేస్తానని ప్రకటించింది గతంలో. అయితే స్వప్న పాట్కర్ కి సంజయ్ రౌత్ ఫోన్ చేసి అసభ్యంగా తిట్టాడు. అది రికార్డ్ చేసి బహిరంగపరిచింది స్వప్న పాట్కర్ కానీ మీడియా ఈ విషయంలో నిశ్శబ్దంగా ఉండిపోయింది ఎందుకో? చివరికి స్వప్న పాట్కర్ ఇచ్చిన ఫిర్యాదు ఆధారంగా కోర్టు ఉత్తర్వులతో సిబిఐ విచారణ చేపట్టింది.
2007 నుండి 2010 వరకు మూడు సంవత్సరాల కాలంలో నడిచిన ఈ భూ దందా కి అప్పటి కాంగ్రెస్ ప్రభుత్వం మద్దతు ఉంది. అందుకే సంజయ్ రౌత్ గత అసెంబ్లీ ఎన్నికల తరువాత ఉద్ధవ్ ని ఏమార్చి మహా వికాస్ అఘాడీ పేరుతో కూటమిలో భాగంగా ఉండేట్లు చేశాడు. ఈ చర్య కేవలం తనని ఎవరూ అరెస్ట్ చేయకుండా తనని తాను కాపాడుకోవడానికే! ఉద్ధవ్ చేత మహారాష్ట్ర లో సిబిఐ కి అనుమతి రద్దు చేయించాడు సంజయ్ రౌత్. కానీ సుప్రీం కోర్ట్ ఉత్తర్వులతో సిబిఐ విచారణ చేపట్టింది.
పత్రా చాల్ భూ కుంభకోణం ఒక్కటే కాదు సంజయ్ రౌత్ మీద ఉన్న అభియోగం! పంజాబ్ మహారాష్ట్ర కో ఆపరేటివ్ బాంక్ ని 3 వేల కోట్ల రూపాయల మేరకు మోసం చేసిన కేసులో సంజయ్ తో పాటు అతని భార్య వర్ష రౌత్ కూడా నిందితురాలే! సుశాంత్ సింగ్ రాజ్ పుత్ మరణం కేసులో అప్పటి ముఖ్యమంత్రి ఉద్ధవ్ థాకరే పుత్ర రత్నం ఆదిత్య ఠాక్రె ని ఒక భాగంగా చేయడంలో శరద్ పవార్ తో కలిసి సంజయ్ రౌత్ కుట్ర పన్ని చివరికి ఉద్ధవ్ ఠాక్రె మౌనంగా ఉండడానికి కారణం అయ్యాడు సంజయ్ రౌత్.
పాల్ఘార్ సాధువుల హత్య విషయంలో బయటి ప్రపంచానికి తెలియాల్సింది చాలానే ఉంది. సంజయ్ రౌత్ పాల్ఘర్ పట్టణంలో చాలా భూములు ఆక్రమించుకోవడం మరియు బినామీ పేర్లతో కొనడం జరిగింది. కానీ పాల్ఘార్ అఘాడీ కి చెందిన భూముల మీద సంజయ్ రౌత్ కి ఎప్పటినుండో కన్ను ఉంది. ఎలాగయినా వాటిని ఏదో వంకతో తన అధీనంలోకి తెచ్చుకోవాలనే దురాశ ఉంది. దానిలో భాగంగానే సాధువుల హత్య జరిగింది. క్రమంగా సాధువల సంఖ్య తగ్గితే అఘాడీ బలహీన పడుతుంది. దాంతో తన పని సులువు అవుతుంది అని సంజయ్ రౌత్ ప్లాన్.
ఇటీవలే ఒక్కో విషయం బయటికి రావడం తన పార్టీని నిలువునా ముంచిన సంజయ్ రౌత్ మీద ఆగ్రహంగా ఉన్న ఉద్ధవ్ ఠాక్రె రెండు రోజుల క్రితం సంజయ్ రౌత్ ని జైల్లో కలవడానికి ప్రయత్నించగా అనుమతి ఇవ్వలేదు ED కోర్టు. అయితే జైలు నుండి ఉద్ధవ్ ఠాక్రె కి సంజయ్ రౌత్ ఒక సందేశం పంపించాడు: శివసేన అధికార పత్రిక అయిన ‘సామ్నా‘ ఆఫీసులో ఉన్న కొన్ని వస్తువులని తన అనుచరులకి అప్పచెప్పాల్సిందిగా కోరాడు సంజయ్ రౌత్ ఉద్ధవ్ ఠాక్రె ని, కానీ అసలే కోపంగా ఉన్న ఉద్ధవ్ సామ్నా ఆఫీసులో ఉన్న సంజయ్ రౌత్ కి చెందిన అన్నిటినీ తన ఆధీనం లోకి తీసుకొని ఆఫీసుకి తాళం వేశాడు ఉద్ధవ్.
ఇక తాను శిక్ష నుండి తప్పించుకునే అవకాశం లేదనీ కాబట్టి తనతో పాటు ఉద్ధవ్ ఠాక్రె ని కూడా తన నేరాలలో భాగం చేయాలనే ఉద్దేశ్యంలో ఉన్నాడు సంజయ్ రౌత్. అప్రూవర్ గా మారి ఎవరెవరు ఎంత డబ్బుని ఎలాంటి నేరాలలో దండుకున్నారో తెలపడానికి సిద్ధంగా ఉన్నట్లు తెలుస్తున్నది. బహుశా సామ్నా పత్రిక ఆఫీసులో వాటికి సంబంధించిన ఆధారాలు ఉండి ఉండవచ్చు. కానీ వాటిని ఇప్పుడు ఉద్ధవ్ ఠాక్రె తన అధీనంలోకి తీసుకున్నాడు.
నూతన ముఖ్యమంత్రిగా ప్రమాణ స్వీకారం చేసిన వెంటనే ఏకనాథ్ షిండే సుశాంత్ సింగ్ రాజ్పుత్ హత్య కేసుని మళ్ళీ ఓపెన్ చేసి విచారణ చేయాలని ఆదేశాలు ఇచ్చాడు. ఇప్పుడు ఆ కేసు మళ్ళీ విచారణలో ఉంది. అలాగే పాల్ఘార్ సాధువుల హత్య కేసుని కూడా మళ్ళీ విచారణ చేయమని ఆదేశాలు ఇచ్చాడు ఏకనాథ్ షిండే!
తాజాగా జరిగిన మహా రాష్ట్ర పంచాయితీ ఎన్నికలలో ఉద్ధవ్ ఠాక్రె కి 5 వ స్థానాన్ని ఇచ్చారు ప్రజలు. ప్రజల తీర్పు స్పష్టంగా ఉంది. శరద్ పవార్, సంజయ్ రౌత్ ల కుట్ర వల్ల శివసేన చావు బతుకుల్లో ఉంది.
కర్ణుడు దాన కర్ణుడిగా ఖ్యాతి గడించినా దుష్టులతో చేరి చెడ్డాడు! అందుకే మన పూర్వీకులు ఊరికే చెప్పలేదు ‘’పొగిడే వాళ్ళకి దూరంగా ఉండాలి‘’ అని.
చట్టం ని చులకన చేస్తే పరిణామాలు ఎలా ఉంటాయో సంజయ్ రౌత్ ఒక ఉదాహరణ. మూడు సార్లు సమన్లు ఇచ్చి హాజరు అవ్వాలని కోరినా నేను రాను ఏం చేసుకుంటారో చేసుకోండి అని ప్రెస్ మీట్ పెట్టి మరీ వాగాడు. ఇప్పుడు బెయిల్ కోసం అడిగితే గతంలో అన్న వ్యాఖ్యలని చూపెట్టి తిరస్కరిస్తున్నది కోర్ట్!
జైహింద్!
– పార్ధసారధి పోట్లూరి
