మానవునకు రోగం కలిగించేది- పాపం!
మానవునకు భోగం కలిగించేది- పుణ్యం!
మానవుని భవిష్యత్తు నిర్ణయించేది- కర్మ!
మానవునకు లాభం కలిగించేది- సేవ!
మానవునకు సంపాదన నిలిపేది- పొదుపు!
మానవుని విలువ పెంచేది – దానం!
మానవునకు నష్టం కలిగించేది – హింస!
మానవునకు అశాంతి కలిగించేది- ఆశ!
మానవునకు శాంతి కలిగించేది- తృప్తి!
మానవునకు దుఃఖం కలిగించేది- ‘కామం!
మానవుని పతనం చేసేది – అహంకారం !
మానవునకు అందరిని దగ్గర చేసేది- ప్రేమ !
మానవునకు అందరినీ దూరం చేసేది- అసూయ !
మానవుని స్థితిని సూచించేది-గుణం !
మానవుని దైవంగా మార్చేది- దయ !
మానవుని ఆత్మస్థితి తెలిపేది- వాక్కు !
మానవునకు విజయం చేకూర్చేది- ధర్మం !
మానవుని గొప్పవాడిగా చేసేది- జ్ఞానం !
మానవునకు- ముక్తి’ని ఇచ్చేది- సత్యం !
మానవుని అన్ని రకాలుగా సంస్కరించేది- జపం / ధ్యానం !
అందుకే జపం / ధ్యానం అన్నింటికంటే గొప్పవి.
ఒకనాడు శ్రీకృష్ణుడు పొద్దున పొద్దున్నే కర్ణుని భవనానికి వెళ్ళాడట . అప్పుడు కర్ణుడు అభ్యంగన స్నానానికి తయారవుతున్నాడు. తలకు నూనె రాసుకుంటున్నాడు. కర్ణునికి ఎడమ వైపు రత్నాలు పొదిగిన బహువిలువైన గిన్నె నూనెతో వున్నది.కృష్ణుడు వస్తూనే కర్ణా ఆ గిన్నె చాలా బాహున్నది నాకిస్తావా? అని అడిగాడు. వెంటనే కర్ణుడు తీసుకో కృష్ణా అంటూ ఎడమ చేత్తో ఆ గిన్నె యిచ్చాడు. కృష్ణుడు అదేమిటి కర్ణా ఎడమచేత్తో యిస్తున్నావు? కుడిచేత్తో యీయరాదా? అన్నాడు.అందుకు కర్ణుడు
క్షణం చిత్తం క్షణం విత్తం క్షణం జీవిత మావయో:
యమస్య కరుణా నాస్తి ధర్మస్య త్వరితా గతి:
అర్థము:— కృష్ణా!ఎడమ చేతిలోని గిన్నె కుడిచేతి లోకి తీసుకునే లోపే ఏమవుతుందో తెలియదు. లక్ష్మి
చంచల మైనది. యముడా దయలేనివాడు. మనస్సా మరు క్షణం లో ఎలా మారుతుందో తెలియదు. కనుక గిన్నె ఈ చేతినుంచు ఆ చేతికి పోయే లోపలే ఏ మార్పైనా రావచ్చు.
అందుకే ధర్మ కార్యాన్ని ఆ క్షణమే
చెయ్యాలనే హితోక్తి ననుసరించి యిలా చేశాను.అన్నాడు.
అప్పుడు కృష్ణుడు కర్ణుని వివేచనకు సంతోషించి ఏదైనా వరం కోరుకోమన్నాడు.
అందుకు కర్ణుడు
దేహేతి వచనం కష్టం నాస్తీతి వచనం తదా
దేహీ నాస్తీతి మద్వాక్యం మా భూజ్జన్మ జన్మనీ
అర్థము:- కృష్ణా! యాచించడం ఎంత కష్టమో, లేదని చెప్పడం కూడా అంతే కష్టం.అంతే కాదు నీచం కూడా కనుక ఏ జన్మ లోనూ దేహీ(అని యాచించే) , నాస్తి(లేదు) అనే మాటలు నా నోటివెంట రాకుండు నట్లు అనుగ్రహించు. అని కోరాడు.దీన్ని బట్టి కర్ణుడి వ్యక్తిత్వం ఎంతటి మహోన్నత మైనదో అర్థమవుతుంది.దానం విషయంలో సదా సాత్వికమే ప్రధానం చెయ్యాలనే సంకల్పం కలుగ గానే ఆదరణ తో భగవ దర్పణ బుద్ధితో ఎలాంటి ఫలాపేక్ష లేకుండా రెండవ చేతికి కూడా తెలియనంత రహస్యంగా దానం చెయ్యాలి.దానం చేసి నేను చేశాననె అహం కూడదు.
ఏదైనా మంచి పని చెయ్యాలని అనిపించిన వెంటనే చేసెయ్యాలి ఆలస్యం విషం లాంటిది. అంటారు జ్ఞానులు.మనము కర్ణుడి లాగా వ్యవహరించ లేకపోయినా మన శక్త్యానుసారం “సత్పాత్ర” దానం చేయడం అలవరుచుకోవాలి.
