రవిచంద్ర శిరసు పై మరో ముళ్ల కిరీటం!

(భోగాది వేంకట రాయుడు)

ఆంధ్రప్రదేశ్ ముఖ్యమంత్రి కార్యాలయం లో ప్రభుత్వ ప్రధాన కార్యదర్శి హోదాలో ముఖ్య కార్యదర్శి గా పనిచేస్తున్న 1996 బ్యాచ్ ఐఏఎస్ అధికారి ముద్దాడ రవిచంద్ర శిరసు పై రాష్ట్ర ప్రభుత్వం మరో ముళ్ల కిరీటం పెట్టింది .

ఇప్పుడు నిర్వహిస్తున్న సిఎంఓ కార్యాలయం ముఖ్య అధికారి పదవి ఎంత సంక్లిష్టమైనదో … ఇప్పుడు అలంకరించిన “టీటీడీ ఈ ఓ అదనపు బాధ్యత” అనేది కూడా అంతే సంక్లిష్టమైనది . 2024 జూన్ 12 నా ముఖ్యమంత్రిగా ప్రమాణస్వీకారం చేసిన తరువాత , తీసుకున్న మొట్టమొదటి నిర్ణయం …. రవిచంద్రను సిఎంఓ కార్యాలయం ముఖ్య అధికారిగా నియమించడమే .

టీటీడీ నిర్వహణ వ్యవస్థ లో అనేక ముదురు జీవాలు …. పైకి కనిపించని మొసళ్లు , మెత్తగా కనిపిస్తూ దొరికితే కాటు వేసే మిన్నాగులు , ఎంత బడ్జెట్ ను అయినా సౌండ్ రాకుండా గుటుక్కున మింగేసే కొండచిలువలు , దేవ దేవుని నామాలు పెట్టుకుని , చక్కని తెలుగులో సుతారం గా మాట్టాడుతూ …అందీ అందగానే చప్పరించేసే కరుణాద్ర హృదయులు గా కనిపించే కాలనాగులు తిరునామాలు పెట్టుకుని …తిరుమల కొండమీద పాతుకు తిరుగుతుంటాయి .

ఇటీవలి కాలం లో దేవదేవుని పట్ల ఏ స్థాయిలో అపచారాలు చోటు చేసుకున్నాయో భక్తులు నిస్సహాయం గా చూస్తూ ఉండి పోయారు .
అధర్మారెడ్డి ఈఓ గా వెలగబెట్టిన “ ఆ” కాలం నుంచి చోటు చేసుకున్న అపచారాలు ఒక్కొక్కటే వెలుగు లోకి రావడం తో ; ప్రపంచ వ్యాప్తం గా శ్రీ వారి భక్తులు ఖిన్నులయ్యారు . వారికి ఊరటగానా అన్నట్టుగా … క్షుద్ర శక్తులు ప్రస్తుతానికి కలుగుల్లో దూరి …. సరైన తరుణం కోసం ఎదురు చూస్తున్న దశలో …. ఇప్పుడు ముద్దాడ రవిచంద్రకు టీటీడీ ఈ ఓ గా అదనపు బాధ్యతలను ముఖ్యమంత్రి చంద్రబాబు నాయుడు అప్పగించారు .

క్రైసిస్ మేనేజ్మెంట్ లో నిష్ణాతుడైన రవిచంద్ర ; వీలయినంత నిశ్శబ్దం గా తనకు అప్పగించిన పని పూర్తి చేసే అధికారి అని నెల్లూరు , చిత్తూరు , తూర్పు గోదావరి జిల్లాలలో ఇప్పటికీ పలువురు గుర్తు చేసుకుంటుంటారు .

2032 ఆగస్ట్ 31 వరకు ఐఏఎస్ అధికారిగా కొనసాగనున్న రవిచంద్రకు ; సీఎంఓ కార్యాలయ ముఖ్య అధికారిగా ఇప్పటికే టీటీడీ ‘వ్యవహారాల’ పై పూర్తి అవగాహన ఉంది . మాటకారి కాదుగానీ , సౌమ్యుడు ; నోటితో మృదువుగా …. పెన్ తో కఠినం గా వ్యవహరించే రవిచంద్ర టీటీడీ ని ఒక గాడిలో పెడతారని భావించవచ్చు .

ఈ నియామకం లో ఆయనకు రెండు ఫస్ట్ లు ఉన్నాయి .

ముఖ్యమంత్రి కార్యాలయ ముఖ్య కార్యదర్శి గా ఉన్న అధికారికి టీటీడీ ఈఓ బాధ్యతలు అప్పగించడం 1956 లో రాష్ట్రం ఏర్పడిన తర్వాత ఇది రెండవసారి. .