గుంటూరు జిల్లా పిడుగురాళ్ల నివాసి ప్రముఖ చరిత్రకారులు, బహుగ్రంధ రచయిత, సీనియర్ పాత్రికేయులు సయ్యద్ నశీర్ అహమ్మద్ కు ఆంధ్రప్రదేశ్ రచయితల సంఘం ” జ్ఞాన జ్యోతి ” పురస్కారం ప్రకటించింది. ఈ మేరకు సంఘం రాష్ట్ర ప్రధాన కార్యదర్శి చలపాక ప్రకాష్ ఒక ప్రకటనలో వెల్లడించారు..
ఆంధ్రప్రదేశ్ గ్రంధాలయ వారోత్సవాల సందర్భంగా ఆంధ్రప్రదేశ్ రచయితల సంఘం ప్రతి ఏటా ప్రకటించే ” జ్ఞాన జ్యోతి” పురస్కారం 2021 ఏడాదికి నశీర్ అహమ్మద్ కు అందజేయనున్నట్లు ఆయన తెలిపారు. భారత స్వాతంత్ర్య సమరంలో పాల్గొన్న ముస్లిం యోధుల మహత్తర పాత్రను వివరిస్తూ నశీర్ 23 పరిశోధనాత్మక గ్రంధాలు రాసి ప్రచురించారని ఆయన చెప్పారు. ఈ గ్రంథాలలో కొన్ని ఆంగ్లం, హిందీ, ఉర్దూ, తమిళం, కన్నడ భాషల్లో అనువాదమయ్యాయిని, మరికొన్ని ఇతర భాషల్లో వెలువడనున్నాయి ఆయన పేర్కొన్నారు.
చరిత్రకారులు నశీర్ కేవలం గ్రంథ రచనతో సరిపెట్టు కోవడం మాత్రమే కాకుండా విస్మరణకు గురైన భారత స్వాతంత్ర్య సమర యోధుల సాహసోపేత చరిత్రలను ప్రజలకు పరిచయం చేస్తూ గత 23 ఎండ్లుగా ప్రసంగాలు చేస్తున్నారని, సమరయోధుల చిత్రాల ప్రదర్శనలు నిర్వహిస్తున్నారని ఆయన వివరించారు. పరిశోధనాత్మక రచన, ప్రచురణ, పంపిణీ, ప్రచారం కార్యక్రమాలను నశీర్ వ్యాపార దృష్టితో వదాన్యుల సహకారంతో తాము ప్రచురించిన పుస్తకాలు ఎంపిక చేసిన గ్రంధాలయాలు, సంస్థలు, వ్యక్తులకు వితరణశీలుర చిరుకానుకగా పంపిణీ చేస్తున్నారని చలపాక పేర్కొన్నారు.
జాతీయంగా – అంతర్జాతీయంగా చరిత్ర పండితుల ప్రశంసలు అందుకుంటున్న తెలుగు రచయిత, సుప్రసిద్ధ పరిశోధకుడు, చరిత్రకారుడు, పాత్రికేయుడు సయ్యద్ నశీర్ అహమ్మద్ ను “జ్ఞాన జ్యోతి” పురస్కారంతో ఆంధ్రప్రదేశ్ రచయితల సంఘం గౌరవిస్తున్నందుకు తమకు సంతోషంగా ఉందని ఆయన అన్నారు.ఈ నెల 15 సాయంత్రం విజయవాడ లోని ఠాగూరు గ్రంధాలయంలో జరుగు పురస్కార ప్రదానోత్సవ కార్యక్రమంలో నశీర్ అహమ్మద్ కు ” జ్ఞాన జ్యోతి ” అవార్డు క్రింద మూడు వేల రూపాయల నగదు, జ్ఞాపిక, దుస్సాలువతో ఘనంగా సత్కరించంనున్నామని చలపాక ప్రకాష్ వెల్లడించారు
