జగన్ రెడ్డి హయాంలో రెవెన్యూ లోటు 4 రెట్లు, ద్రవ్యలోటు 2 రెట్లు పెరిగింది.
సుస్థిరాభివృద్ధి సూచీలో 13 వ స్థానంకు, మానవాభివృద్ధి సూచీలో 21 వ స్థానంకు పడిపోయింది.
– శాసనమండలి ప్రతిపక్షనేత యనమల రామకృష్ణుడు
2024-25 ఆర్ధిక సంవత్సరం రెండవ రోజునే ఆర్.బి.ఐ నుంచి ప్రభుత్వ సెక్యురిటీల వేలంలో రూ.4 వేల కోట్లు అప్పులు తెచ్చిన జగన్ రెడ్డి తిరిగి అధికారంకు వస్తే రాష్ట్రానికి అధోగతేనని తెలుగుదేశం పార్టీ పొలిట్బ్యూరో సభ్యులు, ప్రస్తుత శాసనమండలి ప్రతిపక్షనేత యనమల రామకృష్ణుడు తీవ్రంగా విమర్శించారు.
2023-24 లో ఆర్.బి.ఐ నుంచే కేవలం మంగళవారం అప్పులే రూ.70 వేల కోట్లు చేసిన జగన్ రెడ్డి రాష్ట్రాన్ని ఐదేళ్లలో 13 లక్షల కోట్ల అప్పుల్లో ముంచాడన్నారు. కాగ్ లెక్కల ప్రకారమే గత ఆర్ధిక సంవత్సరం జగన్ రెడ్డి ప్రభుత్వం రోజుకు రూ.257 కోట్లు చొప్పున మొత్తం రూ.93,805 కోట్లు అప్పు చేసిందన్నారు. బడ్జెట్లో శాసనసభకు చెప్పి చేస్తామన్న అప్పుల, ఎఫ్.ఆర్.బి.ఎం పరిమితుల కంటే ఇది రెండింతలు ఎక్కువన్నారు. ఇది చాలక రాబోయే ప్రభుత్వాలు తీసుకోవాల్సిన అప్పులను సైతం జగన్ రెడ్డే చేసేయడం దుర్మార్గం.
అధికారంలో రానని తెలుసుకున్న జగన్ రెడ్డి ఎన్నికల కోడ్ ఉండగానే 2024-25 ఆర్ధిక సంవత్సరం అప్పులలో రూ.20 వేల కోట్లు జూన్ 4 లోపే చేసేయాలని కేంద్రం నుంచి అప్పుల సమీకరణకు అనుమతులు తీసుకుంది. ఏడాది మొత్తానికి తీసుకోవాల్సిన అప్పుల్లో మూడోవంతు అప్పు మొదటి రెండు నెలల్లోనే తీసుకుని కొత్త ప్రభుత్వంపై శఠగపం పెట్టాలని చూస్తున్నాడు.
2019 లో తెలుగుదేశం ప్రభుత్వం దిగిపోయే నాటికి రూ.13 వేల కోట్లు ఉన్న రెవెన్యూ లోటు 2024 ఫిబ్రవరి నాటికి రూ.53 వేల కోట్లకు, ద్రవ్యలోటు రూ.35 వేల కోట్లు నుంచి రూ.77 వేల కోట్లకు చేరుకుంది. ఇది తెదేపా హయాం కంటే రెవెన్యూ లోటులో నాలుగు రెట్లు, ద్రవ్యలోటులో రెండు రెట్లు అధికం. రాష్ట్రానికి ఆస్తులు కల్పన చేసే మూలధన వ్యయంపై స్థూల ఉత్పత్తిలో 0.5 శాతం కూడా ఖర్చు చేయడం లేదు. ఇది ఆర్ధికపరంగా చాలా ప్రమాదకరమైన పరిస్థితి.
రాష్ట్రంలో పారిశ్రామిక ప్రగతి శూన్యం. టిడిపి ఐదేళ్ల హయాంలో పరిశ్రమల ద్వారా కల్పించబడిన ఉద్యోగాలు 13,88,733 అయితే.. జగన్ రెడ్డి ఐదేళ్ల పాలనలో అవి కేవలం 9,158 మాత్రమే. రాష్ట్రంలో ప్రధాన రంగాలైన వ్యవసాయం, పరిశ్రమలు, సేవల రంగాలు దెబ్బతిన్నాయి. వివిధ రంగాలకు బడ్జెట్ లో కేటాయించిన మొత్తాలలో సగానికి కన్న తక్కువ ఖర్చు చేశారు. కానీ,రాష్ట్ర స్థూల ఉత్పత్తి పెరిగిందని తప్పుడు లెక్కలు చెబుతున్నారు. రాష్ట్ర స్థూల ఉత్పత్తిపై వైకాపా ప్రభుత్వం చెప్పేవన్నీ దొంగ లెక్కలే.
జగన్ రెడ్డి పాలనలో పేదలు మరింత పేదలయ్యారు. సుస్థిరాభివృద్ధి లక్ష్యాల సూచీలో మన రాష్ట్రం 13 వ స్థానంకు పడిపోయింది. హ్యూమన్ డెవలప్మెంట్ ఇండెక్స్లో మనది 21 వ స్థానంకు పడిపోయింది. దక్షిణాధి రాష్ట్రాలైన కేరళ, తమిళనాడు, కర్ణాటక లు పేదరిక నిర్మూలనలో మనకంటే ఎంతో మెరుగైన స్థానాల్లో ఉన్నాయి. మన కంటే వనరులు తక్కువ ఉన్న తెలంగాణ ఏపీ కంటే మెరుగ్గా 21 స్థానంలో నిలిచింది.
రాష్ట్రాన్ని ఆర్ధిక అధోగతి పాలుకాకుండా కాపాడుకోవాలంటే జగన్ రెడ్డిని ఓడించాల్సిందే. అప్పులతో కొనసాగే సంక్షేమ రాజ్యం ఎప్పటికైనా కూలిపోక తప్పదు. పేదలను సుస్థిరాభివృద్ధి వైపు నడిపించాలంటే అభివృద్ధితో కూడిన సంక్షేమం అందించే కూటమిని గెలిపించాలి.
