– ఏ2గా ఐఏఎస్ అధికారి అరవింద్ కుమార్.. ఏ3గా హెచ్ఎండీఏ చీఫ్ ఇంజినీర్ బీఎల్ఎన్ రెడ్డి
– కేటీఆర్ పై ఏసీబీ కేసు నమోదు
– 13 (1) ఏ, 13 (2) పీసీ యాక్ట్, 409, 102 బీ సెక్షన్ల కింద కేసు నమోదు
– ఎలాంటి అనుమతులు లేకుండానే విదేశీ కంపెనీకి రూ. 55 కోట్లు చెల్లించారనే ఆరోపణ
– రెండు, మూడు రోజులలో కేటీఆర్ కు నోటీసులు జారీ
– విచారణలో కేటీఆర్ అరెస్టు తప్పదా?
హైదరాబాద్: అనుకున్నదే జరిగింది. ఫార్ములా ఈ – కార్ రేసు కుంభకోణంలో బీఆర్ఎస్ వర్కింగ్ ప్రెసిడెంట్ కేటీఆర్కు ఉచ్చు బిగిస్తున్నారని, అందులో భాగంగా ఆయనపై ఏసీబీ కేసు నమోదు చేయడం ఖాయమంటూ వస్తున్న కథనాలు నిజమయింది.
పదేళ్లు తెలంగాణను శాసించిన బీఆర్ఎస్లో పెను కుదుపు. ఏ-1 ముద్దాయిగా మాజీ మంత్రి, బీఆర్ఎస్ ఉత్తరాధిపతి కేటీఆర్పై తెలంగాణ ప్రభుత్వం కేసు నమోదు చేయడం సంచలనం సృష్టించింది. బీఆర్ఎస్ వర్కింగ్ ప్రెసిడెంట్ కేటీఆర్ పై ఏసీబీ అధికారులు కేసు నమోదు చేశారు.
ఫార్ములా ఈ-కార్ రేసింగ్ లో కేటీఆర్ పై కేసు నమోదయింది. ఈ కేసులో ఏ1గా కేటీఆర్, ఏ2గా ఐఏఎస్ అధికారి అరవింద్ కుమార్, ఏ3గా హెచ్ఎండీఏ చీఫ్ ఇంజినీర్ బీఎల్ఎన్ రెడ్డిని చేర్చారు. విదేశీ కంపెనీకి ఎలాంటి అనుమతులు లేకుండానే రూ. 55కోట్లు చెల్లించారనే ఆరోపణలతో కేసు నమోదయింది.
కేటీఆర్ పై కేసు నమోదు చేయడానికి అనుమతించాలని గత నెల గవర్నర్ కు రాష్ట్ర ప్రభుత్వం లేఖ రాసింది. దీంతో కేటీఆర్ పై కేసు నమోదు చేయడానికి రాష్ట్ర గవర్నర్ జిష్ణుదేవ్ వర్మ నాలుగు రోజుల క్రితం అనుమతి ఇచ్చిన సంగతి తెలిసిందే. ఈ క్రమంలో కేసు నమోదు చేయాలంటూ, మూడు రోజుల క్రితం ఏసీబీకి ప్రభుత్వ ప్రధాన కార్యదర్శి శాంతి కుమారి లేఖ రాశారు. గవర్నర్ అనుమతిని కూడా లేఖకు జత చేశారు.
ఈ క్రమంలో కేటీఆర్ పై ఏసీబీ కేసు నమోదు చేసింది. నాన్ బెయిలబుల్ సెక్షన్ల కింద కేసు నమోదు చేశారు. 13 (1) ఏ, 13 (2) పీసీ యాక్ట్, 409, 102 బీ సెక్షన్ల కింద కేసు నమోదు చేశారు. కేబినెస్ అనుమతి, ఫైనాన్స్ క్లియరెన్స్ లేకుండా నిధులు చెల్లించారని ఎఫ్ఐఆర్ లో పేర్కొన్నారు. కేటీఆర్ పై కేసు నమోదు కావడంతో, ఆయనను అరెస్ట్ చేస్తారని బీఆర్ఎస్ శ్రేణులు ఆందోళన చెందుతున్నాయి. రెండు, మూడు రోజులలో కేటీఆర్ కు నోటీసులు జారీ చేసి, విచారణకు పిలిచే అవకాశం ఉంది. కాగా విచారణ దశలోనే కేటీఆర్ను అరెస్టు చేసే అవకాశం లేకపోలేదని బీఆర్ఎస్ వర్గాలు భావిస్తున్నాయి. తాజా పరిణామాలు బీఆర్ఎస్లో కలకలం రేపుతున్నాయి.
