– వీడియోలు తీసి శారీరకంగా లొంగదీసుకున్న లాయర్
– మల్కాజ్‌గిరి పోలీసులకు బాధితురాలి ఫిర్యాదు
భర్తతో మనస్పర్థల కారణంగా పెళ్లైన రెండేళ్లకే విడాకులు తీసుకోవాలని అనుకుందో మహిళ. ఈ క్రమంలోనే ఓ లాయర్‌ను ఆశ్రయించింది. ఆమె పరిస్థితిని గమనించిన న్యాయవాది ఆ మహిళపై కన్నేశాడు. కట్టుకథలు అల్లి, ఆమెకు తెలియకుండానే వీడియోలు తీసి బాధితురాలిని లోబరుచుకున్నాడు. అతడి వేధింపులు ఎక్కువ కావడంతో బాధితురాలు చివరికి పోలీసులను ఆశ్రయించింది.
మల్కాజిగిరి సీఐ జగదీశ్వరరావు కథనం ప్రకారం.. ఓ ప్రైవేట్ సంస్థలో పనిచేసే మహిళ(25)కు రెండేళ్ల క్రితం వివాహమైంది. భర్తతో గొడవలు జరుగుతుండటంతో విడాకులు తీసుకునేందుకు గతేడాది జూన్‌లో ఓ న్యాయవాదిని కలిసింది. ఈ క్రమంలోనే పలుమార్లు తన కార్యాలయానికి రప్పించుకున్న లాయర్ ఆమెతో చనువు పెంచుకున్నాడు. బాధితురాలు అద్దెకు ఇల్లు వెతుకుతోందని తెలుసుకున్న న్యాయవాది తాను నివసించే ప్రాంతంలోనే ఒక ఫ్లాట్‌ చూపించాడు.
అందులో ఆమెకు తెలియకుండా సీసీ కెమెరాలను ఏర్పాటు చేశాడు. బాధితురాలు దుస్తులు మార్చుకునే సమయంలో వీడియోలు చిత్రీకరించాడు.ఆ వీడియోలను బాధితురాలికి చూపించి బ్లాక్‌మెయిల్ చేసి శారీరకంగా లోబరుచుకున్నాడు. తనను వదిలేయాలని ఆమె వేడుకున్న లాయర్ మనసు కరగలేదు. పైగా అతడి వేధింపులు మరింత తీవ్రతరం కావడంతో విసిగిపోయిన బాధితురాలు ఈ నెల 13న మల్కాజ్‌గిరి పోలీసులకు ఫిర్యాదు చేసింది. దీనిపై కేసు నమోదు చేసిన పోలీసులు దర్యాప్తు చేస్తున్నారు.
