– కిలోమీటర్ రోడ్డుకు రూ.53 కోట్ల రూపాయలా?
– 8 అనుకూల సంస్థలకే రూ.28,210 కోట్ల విలువైన పనులు
– మొబిలైజేషన్ అడ్వాన్స్‌ల నుంచి 8 శాతం కమీషన్లు
– రివర్స్‌ టెండరింగ్ అమలు చేస్తే రూ.3000 కోట్లు ఆదా అయ్యేవి
– రాజధాని పేరుతో నిర్మాణ పనుల్లో భారీ అక్రమాలు
– అధిక రేట్లకు పనులను కట్టబెడుతున్న చంద్రబాబు
– ప్రతిగా వారి నుంచి కమీషన్లు దండుకుంటున్నారు
– కూటమి పాలనలో అవినీతి వ్యవస్థీకృతం
-నెల్లూరు వైయస్‌ఆర్‌సీపీ కార్యాలయంలో మీడియాతో మాట్లాడిన నెల్లూరు జిల్లా పార్టీ అధ్యక్షులు, మాజీ మంత్రి కాకాణి గోవర్థన్‌రెడ్డి
నెల్లూరు: అమరావతి రాజధానిలో జరుగుతున్న పనుల్లో కూటమి సర్కార్ భారీ అవినీతికి తెర తీసిందని వైయస్‌ఆర్‌సీపీ నెల్లూరు జిల్లా అధ్యక్షుడు, మాజీ మంత్రి కాకాణి గోవర్థన్‌రెడ్డి ఆగ్రహం వ్యక్తం చేశారు. నెల్లూరు వైయస్‌ఆర్‌సీపీ కార్యాలయంలో సోమవారం మీడియాతో మాట్లాడుతూ చంద్రబాబు తనకు అనుకూలమైన ఎనిమిది సంస్థలకే 59 ప్యాకేజీల కింద మొత్తం రూ.28,210 కోట్ల విలువైన పనులను కట్టబెట్టారని అన్నారు.
వీటికి మొబిలైజేషన్ అడ్వాన్స్‌ల కింద ఇచ్చే రూ.2821 కోట్ల నుంచే 8 శాతం కమిషన్లుగా దండుకుంటున్నారని మండిపడ్డారు. తన అవినీతికి అడ్డం వస్తాయనే ఉద్దేశంతోనే గత ప్రభుత్వంలో వైయస్ జగన్ తీసుకువచ్చిన రివర్స్‌ టెండరింగ్, జ్యుడీషియల్ ప్రివ్యూ విధానాలను పూర్తిగా తొలగించారని అన్నారు.
రాజధాని అమరావతి పనుల్లో వేల కోట్ల రూపాయల దోపిడీకి చంద్రబాబు శ్రీకారం చుట్టారు. తమకు అనుకూలమైన సంస్థలను ఎంపిక చేసుకుని, వాటికి అధిక రేట్లకు టెండర్లను కట్టబెట్టడం, వారికే మొబిలైజేషన్ అడ్వాన్స్‌ల కింద పెద్ద ఎత్తున నిధులను విడుదల చేయడం, దాని నుంచి తిరిగి కమీషన్లను దండుకోవడంను ఒక వ్యవస్తీకృత విధానంలాగా కూటమి ప్రభుత్వం అమలు చేస్తోంది. ఒకచేత్తో అడ్వాన్‌లను ఇవ్వడం, మరోచేత్తో వారి నుంచి కమీషన్లను అందుకోవడం కూటమి ప్రభుత్వ కొత్త పాలసీగా కనిపిస్తోంది.
ఇప్పుడు భూముల విలువ వందరెట్లు పెరిగాయి. చంద్రబాబు, ఆయన బినామీలు అపర కుబేరులుగా మారారు. అలాగే అమరావతి నిర్మాణం అంటూ 2014-19 మధ్యన చంద్రబాబు షాపూర్జీ-పల్లోంజీ సంస్థకు వేల కోట్ల రూపాయల పనులు అప్పగించారు. ఈ సంస్థ నుంచి కమిషన్లు వసూలు చేసిన చంద్రబాబుకు అత్యంత సన్నిహితుడైన వ్యక్తిని సాక్ష్యాధారాలతో సహా ఆదాయపన్ను అధికారులు పట్టుకున్నారు. ఇప్పుడు అదే వ్యక్తి కూటమి ప్రభుత్వంలో రాజధాని పనుల్లో చక్రం తిప్పుతున్నాడు.
ఆ ఎనిమిది సంస్థలకే ఎందుకు?
చంద్రబాబుకు సన్నిహితమైన ఎనిమిది సంస్థలకే మొత్తం పనులను కట్టబెట్టారు. మెగా కృష్ణారెడ్డి, ఈనాడు పత్రిక అధినేత చెరుకూరి కిరణ్ బంధువు రాయల్ రఘుకు చెందిన ఆర్‌విఆర్‌ ప్రాజెక్ట్‌, చంద్రబాబు సన్నిహితుడు బీఎస్ఆర్ ఇన్ఫ్రా వ్యవస్థాపకుడు బలుసు శ్రీనివాస్‌, ఏవీ రంగరాజుకు చెందిన ఎన్‌సీపీ, మంత్రి నారా లోకేష్‌కు సన్నిహితుడు కనకమేడ వరప్రసాద్‌కు చెందిన కెఎంయు, ఎల్‌అండ్‌టీ వంటి సంస్థలకే ఈ పనులు కట్టబెట్టారు. వాటిల్లో ఎన్‌సీసీ సంస్థకు రూ.6124 కోట్లు, బీఎస్ఆర్ కు రూ.6214 కోట్లు, ఆర్వీఆర్ సంస్థకు రూ.6031 కోట్లు, మెగా సంస్థకు రూ.7022 కోట్లు, ఎంవీఆర్ సంస్థకు రూ.796 కోట్లు, ఎల్‌అండ్‌టీ కి రూ.809 కోట్లు, కెఎంవి సంస్థకు రూ.429 కోట్లు, బిఎస్పిసీఎల్ సంస్థకు రూ.779 కోట్ల విలువైన పనులను అప్పగించారు.
కిలోమీటర్ రోడ్డుకు రూ.53 కోట్ల రూపాయలా?
ఒక కిలోమీటర్ రోడ్డుకు రూ.53 కోట్లు రూపాయలు ఆమోదించిన రోజులు ఎప్పుడైనా చరిత్రలో ఉన్నాయా? తారుతో వేస్తున్నారా? బంగారంతో వేస్తున్నారా? అనే అనుమానం కలుగుతోంది. చంద్రబాబు పాలనతో ఏదైనా సాధ్యం అనేందుకు ఇది నిదర్శనం. తాజాగా రాజధాని ముంపు నివారణ, రహదారుల నిర్మాణానికి ఏడీసీఎల్ ద్వారా 37 ప్యాకేజీలకు రూ.10,696 కోట్లకు టెండర్లు పిలిచారు. రూ.16,463 కోట్ల వ్యయంతో 22 ప్యాకేజీల కింద 34 వేల ఎకరాల్లో ప్లాట్ల అభివృద్ధి, ఎమ్మెల్యేలు, ఎమ్మెల్సీలు, మంత్రులు, జడ్జ్‌ల భవనాల కోసం సీఆర్‌డీఏ ద్వారా టెండర్‌ లను పిలిచారు. మొత్తం 59 ప్యాకేజీలకు గానూ రూ.27,160 కోట్లు విలువైన పనులకు టెండర్లు పిలిచారు.
వీటికి 3.94 నుంచి 4.34 శాతం అధికంగా దాదాపు 1,049 కోట్ల భారం మోపుతూ రూ. 28,210 కోట్లుకు ఆ కాంట్రాక్ట్‌లను ఖరారు చేయడం జరిగింది. రివర్స్‌ టెండరింగ్‌కు బదులు అధిక రేట్లకు ఈ టెండర్లను ఖరారు చేశారు. అదే రివర్స్‌ టెండరింగ్ అమలు చేసి ఉంటే గతంలో ఉన్న లెక్కల ప్రకారం సగటున 8 శాతం ఆదా అయ్యేది. అంటే దాదాపు రూ.3000 కోట్లు ఆదా అయ్యేవి. రాజధానిలో రైతుల నుంచి 34 వేల ఎకరాల్లో ప్లాట్ల అభివృద్ధికి 18 ప్యాకేజీల కింద సీఆర్‌డీఏ టెండర్లు పిలిచింది. రూ. 14887 కోట్లకు పనులను కాంట్రాక్టర్‌లకు అప్పగించింది. జీఎస్ట్ఈ, సీనరేజీ, న్యాక్ లను అదనంగా చెల్లిస్తామని చెప్పింది. ఈ మూడింటిని కలుపుకుంటే దాదాపు రూ. 17000 కోట్లకు పనుల విలువ పెరుగుతుంది.
