– తెలుగు తెలియకుండా అసెంబ్లీలో ఏం మాట్లాడుతున్నారో నీకేం అర్ధమవుతుంది?
– తెలుగురాకపోతే మీకు రాష్ట్రంలో ఏం సమస్యలు తెలుస్తాయి?
– ప్రసంగం దంచేసి వెళితే సరిపోతుందా? అంత పొగరైతే ఎలా?
– మజ్లిస్ నేత అక్బరుద్దీన్ ఒవైసీకి ఆకునూరి మురళి ఘాటు జవాబు
హైదరాబాద్: మంత్రి సీతక్కకు హిందీ రాదు. ఇంగ్లీషు తెలియదు.తనకు తెలుగు తెలయదంటూ మజ్లిస్ శాసనసభాపక్ష నేత అక్బరుద్దీన్ ఒవైసీ చేసిన వ్యాఖ్యలపై తెలంగాణ విద్యాకమిషన్ చైర్మన్ ఆకునూరి మురళి విరుచుకుపడ్డారు. ‘ఇక్కడే పుట్టి పెరిగిన నీకెందుకు తెలుగు రాలేదు? తెలుగు నేర్చుకోవాలనే సామాజిక బాధ్యత లేదా? హిందీ, ఇంగ్లీషు రాకపోతే నీకెందుకు అంత చిన్నచూపు? పొగరు కాకపోతే..’ అంటూ ఎక్స్ వేదికగా ధ్వజమెత్తారు.
“మంత్రి సీతక్క గారికి హిందీ రాదు సరే, మరి నీకు తెలుగు ఎందుకు రాదు బాబు? హైదరాబాద్‌లోనే పుట్టి పెరిగినవు కదా? రాష్ట్రంలో మెజారిటీ ప్రజలు మాట్లాడే మొదటి అధికార భాషా తెలుగు నేర్చుకోవాలనే సామాజిక బాధ్యత నీకు ఉండాలి కదా” అంటూ తెలంగాణ విద్యా కమిషన్ చైర్మన్ ఆకునూరి మురళి.. మజ్లిస్ పార్టీ శాసనసభాపక్ష నేత అక్బరుద్దీన్ ఒవైసీకి చురక అంటించారు.
అసెంబ్లీలో అందరు సభ్యులు, మంత్రులు తెలుగులోనే మాట్లాడుతున్నప్పుడు మీకు ఏం అర్థమవుతుందని ప్రశ్నించారు. ఏదో ఒకటి అసెంబ్లీలో ప్రసంగం దంచేసి వెళ్లిపోతే సరిపోతుందా? తెలుగు రాకపోతే రాష్ట్రంలోని సమస్యలు మీకెలా అర్థమవుతాయని ప్రశ్నించారు. హిందీ, ఇంగ్లీష్ రాకపోతే నీకు అంత చిన్నచూపా? పొగరు కాకపోతే! అంటూ ఆకునూరి మురళి ఆగ్రహం వ్యక్తం చేశారు.
మంత్రి సీతక్కకు ఇంగ్లీష్, హిందీ రాదని, తనకు తెలుగు రాదని వ్యాఖ్యానించిన మజ్లిస్ పార్టీ శాసనసభాపక్ష నేత అక్బరుద్దీన్ ఒవైసీకి.. తెలంగాణ విద్యా కమిషన్ చైర్మన్ ఆకునూరి మురళి ‘ఎక్స్’ వేదికగా కౌంటర్ ఇచ్చారు. మంత్రికి హిందీ రాదు సరే, హైదరాబాద్‌లోనే పుట్టిన మీకు తెలుగు ఎందుకు రాదని ప్రశ్నించారు.
