Home » పీఎఫ్‌ అకౌంట్‌ డబ్బు ఇక ఆటోమేటిక్‌గా బదిలీ

పీఎఫ్‌ అకౌంట్‌ డబ్బు ఇక ఆటోమేటిక్‌గా బదిలీ

2024-25 ఆర్థిక సంవత్సరం ప్రారంభమై వారం రోజులు దాటింది. EPFOకి సంబంధించి కొత్త నిబంధనలు అమల్లోకి వచ్చాయి. అయితే మీరు ఉద్యోగం చేస్తున్నట్లయితే మీకు ఖచ్చితంగా EPFO ఖాతా ఉంటుంది. అటువంటి పరిస్థితిలో ఈ వార్త మీకు ఉపయోగకరంగా ఉంటుంది. మీరు ఉద్యోగాలు మారినప్పుడల్లా మీ ఈపీఎఫ్‌వో బ్యాలెన్స్‌ను దానితో పాటు బదిలీ చేయడానికి మీరు కష్టపడాల్సి ఉంటుంది.

చాలా సార్లు ఈపీఎఫ్‌వో బ్యాలెన్స్ నెలల తరబడి బదిలీ కాదు. ఇప్పుడు ఈపీఎఫ్‌వో ఖాతాదారులు ఉద్యోగాలు మారినప్పుడు మాన్యువల్‌గా పీఎఫ్‌ అకౌంట్‌ బదిలీ కోసం అభ్యర్థించాల్సిన అవసరం లేదు. ఈపీఎఫ్‌వో ఆటోమేటిక్ ఫండ్ ట్రాన్స్‌ఫర్ సౌకర్యాన్ని ప్రారంభించింది. ఏప్రిల్ 1 నుంచి ఈ సదుపాయం అందుబాటులోకి వచ్చింది. ఇంతకుముందు యూనివర్సల్ అకౌంట్ నంబర్ (యూఏఎన్) ఉన్నప్పటికీ పీఎఫ్ బదిలీ కోసం ఉద్యోగులు రిక్వెస్ట్‌ను సమర్పించాల్సి ఉండగా, ఇప్పుడు అలాంటిదేమి లేదు. దీంతో ఉద్యోగులకు మరింత సులభతరమైంది.

ఇప్పుడు ఉద్యోగస్తులు ఈ ఇబ్బందులను ఎదుర్కోవాల్సిన అవసరం ఉండకుండా కొత్త ఉద్యోగం కోసం వెతకవచ్చు. కొత్త ఉద్యోగం మారినప్పుడు ఈపీఎఫ్‌ ఖాతాలోని డబ్బు స్వయంచాలకంగా బదిలీ అవుతుంది. అయితే ఇక్కడ ఓ విషయం గుర్తించుకోవాలి. పీఎఫ్‌ అకౌంట్‌ బదిలీ కావాలంటే ఉద్యోగులు, తమ జీతంలో 12 శాతాన్ని ఈపీఎఫ్‌లో ఉంచాల్సి ఉంటుంది. అంతేకాకుండా, యజమాని కూడా ఉద్యోగి తరపున సమాన మొత్తాన్ని ఈపీఎఫ్‌ ఖాతాలో డిపాజిట్ చేయాలి.

యూనివర్సల్ అకౌంట్ నంబర్ (UAN) అనేది ఒక వ్యక్తికి పీఎఫ్‌ నుంచి ఇచ్చే అకౌంట్‌ నంబర్‌. ఈ ఐడీ ఒకసారి తీసుకుంటే ఎన్ని ఉద్యోగాలు మారినా ఇదే ఉంటుంది. ఎక్కువ ఈపీఎఫ్‌ ఖాతాలను ఒకే సభ్యునికి లింక్ చేసే సదుపాయాన్ని అందిస్తుంది.

Leave a Reply