– తెలంగాణలో బుల్డోజర్ రాజ్ పై లోక్ సభ ప్రతిపక్ష నేత, కాంగ్రెస్ జాతీయ నాయకులు రాహుల్ గాంధీకి మాజీ మంత్రి హరీశ్ రావు బహిరంగ లేఖ
హైదరాబాద్: బీజేపీ పాలిత రాష్ట్రాల్లో బుల్డోజర్ పాలన సాగుతోందని ఆరోపిస్తున్న మీరు.. మీ పార్టీ పాలిత తెలంగాణలో సాగుతున్న, అదే బుల్డోజర్ పాలనపై దృష్టి పెడితే మంచిదని కాంగ్రెస్ యువనేత రాహుల్‌గాంధీకి బీఆర్‌ఎస్ సీనియర్ నేత, మాజీ మంత్రి హరీష్‌రావు హితవు పలికారు. ఆ మేరకు ఆయన రేవంత్‌కు బహిరంగలేఖ రాశారు. లేఖ పూర్తి పాఠం ఇదీ..
తెలంగాణలో డాక్టర్ బాబా సాహెబ్ అంబేద్కర్ రచించిన రాజ్యాంగం ఆధారంగా కాదు, అధికార దుర్వినియోగంతో దుర్మార్గ, దుష్ట పాలన నడుస్తున్నది. తెలంగాణ కాంగ్రెస్ ప్రభుత్వం మానవత్వాన్ని, న్యాయాన్ని బుల్డోజర్ కింద తొక్కి అణచివేస్తూ, రాజ్యాంగ విరుద్ధ చర్యలకు పాల్పడుతున్నది.
మూసీ రివర్ ఫ్రంట్ మరియు హైడ్రా ప్రాజెక్టుల విషయంలో నేడు హైకోర్టు చేసిన వ్యాఖ్యలే దీనికి నిదర్శనం. మీ పార్టీ ముఖ్యమంత్రి రేవంత్ రెడ్డి ఆధ్వర్యంలో నడుస్తున్న నిరంకుశ పాలనకు బుల్డోజర్ ప్రతీకగా మారింది. అది తెలంగాణలో పౌరహక్కులను నిరంతరం ధిక్కరిస్తోంది.
హైడ్రా, మూసి రివర్ ఫ్రంట్ ప్రాజెక్టుల పేరుతో పేద, మధ్యతరగతి కుటుంబాలను రోడ్డున పడేస్తున్నారు. ఏళ్లుగా అన్ని చట్టపరమైన పత్రాలతో నివసిస్తున్న వారి ఇళ్లను టార్గెట్ చేస్తూ, భయబ్రాంతులకు గురి చేస్తూ బుల్డోజర్ పాలన నడుపుతున్నారు.
బుల్డోజర్ విధానం తెలంగాణ కాంగ్రెస్ ప్రభుత్వ క్రూరత్వానికి ప్రతిరూపంగా మారింది. అడుగడుగునా చట్టాలను తుంగలో తొక్కుతూ, సహజ న్యాయ సూత్రాలను కాలరాస్తూ మీ పార్టీ ముఖ్యమంత్రి పాలన కొనసాగుతుంది.
బుల్డోజర్లు 100 ఏళ్ల క్రితం నుంచి ఇళ్లను, కార్యాలయాలను, రహదారులను మరియు ఇతర నిర్మాణాలను నిర్మించడానికి ఉపయోగించారు. కానీ ఇప్పుడు జాతీయ పార్టీలైన బిజేపీ, కాంగ్రెస్ లు నిర్మాణాలను కూల్చేందుకు ఉపయోగించడం దుర్మార్గం.
ఉత్తరప్రదేశ్, ఢిల్లీ, మధ్యప్రదేశ్, గుజరాత్, అస్సాం, మహారాష్ట్ర రాష్ట్రాల్లో పేదలు, మధ్య తరగతిపై బీజేపీ బుల్డోజర్లను ఎలా ఉపయోగించిందో, కాంగ్రెస్ కూడా తెలంగాణలో అదే విధంగా ఉపయోగిస్తున్నది. ఈ విషయంలో బిజేపీ దారిలోనే కాంగ్రెస్ నడుస్తున్నది.
బుల్డోజర్ కూల్చివేతల మీద సుప్రీం కోర్టు తాజా తీర్పు ఉన్నప్పటికీ, తగిన సర్వేలు నిర్వహించకుండా, సరైన విధానాలను అనుసరించకుండా, కాంగ్రెస్ ప్రభుత్వం తెలంగాణలో పేదల ఇండ్లను బుల్డోజ్ చేస్తూ, వారిని కన్నీరు పెట్టిస్తున్నది.
భారత రాజ్యాంగంలో పొందుపరచిన సహజ న్యాయ సూత్రాలను మరియు చట్టాలను గౌరవించే విధంగా మీ ముఖ్యమంత్రికి సలహా ఇవ్వమని, తద్వారా రాష్ట్రంలో ఖూనీ అవుతున్న ప్రజాస్వామ్యాన్ని కాపాడాలని మిమ్మల్ని ఈ లేఖ ద్వారా కోరుతున్నాను.
