– యోగా పుట్టింది మన భారతదేశంలోనే
– అంతర్జాతీయ యోగా దినోత్సవం సందర్భంగా వికారాబాద్ పట్టణంలోని బ్లాక్ గ్రౌండ్లో జరిగిన యోగా డే కార్యక్రమంలో పాల్గొని ఆసనాలు వేసిన తెలంగాణ రాష్ట్ర శాసన సభాపతి, వికారాబాద్ నియోజకవర్గ శాసనసభ్యులు గడ్డం ప్రసాద్ కుమార్
– పాల్గొన్న జిల్లా కలెక్టర్ ప్రతీక్ జైన్, అధికారులు, ప్రజాప్రతినిధులు, నాయకులు, ప్రజలు, విద్యార్థులు
వికారాబాద్: అంతర్జాతీయ యోగా దినోత్సవం సందర్భంగా మీ అంద‌రికీ యోగా దినోత్స‌వ శుభాకాంక్షలు. యోగా అనేది శారీరక వ్యాయామమే కాదు, ఒక జీవన విధానం కూడా. నేను రోజు యోగా చేస్తాను. యోగా వల్ల కలిగే శారీరక, మానసిక, ఆధ్యాత్మిక, ఆరోగ్య ప్రయోజనాల గురించి ప్రతి ఒక్కరు తెలుసుకోవాలి, ఆచరించాలి.
యోగాను నిత్యం సాధన చేయడం ద్వారా మనిషిలో ఒత్తిడి, ఆందోళనను తగ్గించి మానసికంగా ప్రశాంతంగా ఉండవచ్చు. శారీరకంగా కూడా ఆరోగ్యంగా ఉంటారు. ఇటీవల కాలంలో యోగా పట్ల ప్రజలలో ఆసక్తి బాగా పెరిగింది. ఎక్కువ మంది యోగాను చేస్తున్నారు.
యోగా పుట్టింది మన భారతదేశంలోనే . 2500 సంవత్సరాల క్రితం పతంజలి మహర్షి ద్వారా వెలుగులోకి వచ్చింది. ఐక్యరాజ్యసమితి సమితి యోగా ప్రాముఖ్యాన్ని గుర్తించి ప్రతి సంవత్సరం జూన్ 21 ని అంతర్జాతీయ యోగా దినోత్సవంగా ప్రకటించింది. యోగా అనేది అందరిదీ. అందరూ చక్కగా చేయవచ్చు.
అన్ని వయసుల వారు యోగాను చేయవచ్చు. స్వంతంగా కంటే గురువుల మార్గదర్శకంలో చేస్తే ఎక్కువ ఫలితాలు ఉంటాయి. యోగాను మీ దైనందిన జీవితంలో ఒక భాగంగా చేసుకోండి, సంపూర్ణ ఆరోగ్యంగా, మానసికంగా ప్రశాంతంగా జీవిస్తారు.
