– గన్నవరం ‘ఎన్ఐడీఎం’లో మూడ్రోజుల శిక్షణ సదస్సును ప్రారంభించిన హోంమంత్రి వంగలపూడి అనిత
– జాతీయ విపత్తు నిర్వహణ సంస్థ సౌత్ క్యాంపస్ సందర్శన
– ఎన్డీఆర్ఎఫ్ ఉపయోగించే అత్యాధునిక పరికరాల పరిశీలన
– విపత్తు నిధులకు కూటమి ప్రభుత్వంలో ఏ డోకా లేదు
అమరావతి: ముఖ్యమంత్రి చంద్రబాబు నాయుడు నాయకత్వంలో విపత్తు ఏదొచ్చినా ఎదుర్కొనేందుకు సిద్ధంగా ఉన్నట్లు హోం, విపత్తుల నిర్వహణ శాఖ మంత్రి వంగలపూడి అనిత వెల్లడించారు. విపత్తు నిధులకు కూటమి ప్రభుత్వంలో ఏ డోకా లేదని ఆమె స్పష్టం చేశారు. గన్నవరంలోని ఎన్ఐడీఎం క్యాంపస్ వేదికగా ఏపీలో తొలిసారిగా నిర్వహిస్తోన్న విపత్తు ముప్పు తగ్గింపుపై మూడ్రోజుల శిక్షణ సదస్సును తొలిరోజు ముఖ్య అతిథిగా హాజరై హోంమంత్రి ప్రారంభించారు.
ఈ సందర్భంగా హోంమంత్రి మాట్లాడుతూ ..రాష్ట్రంలో ఎటువంటి విపత్తు వచ్చినా ఎదుర్కొనేలా సీఎం చంద్రబాబు ఆదేశాలతో అన్ని శాఖల అధికారులకు ప్రత్యేక శిక్షణ ఇవ్వడం అభినందనీయమన్నారు.
ఎన్ఐడీఎమ్ వంటి సంస్థలు ఇస్తున్న శిక్షణను అన్ని శాఖల అధికారులు సద్వినియోగం చేసుకోవాలన్నారు. ప్రమాద అంచనా, ముందస్తు అవగాహన, విపత్తులు సంభవించినప్పుడు స్పందనపై అధికారులు పూర్తి అవగాహన కలిగి ఉండాలని హోంమంత్రి పేర్కొన్నారు.
ఎన్డీఆర్ఎఫ్ తరహాలో ఎస్డీఆర్ఎఫ్ కూడా శిక్షణ కార్యక్రమాలు నిర్వహించే అంశాన్ని పరిశీలించాలని హోంమంత్రి కోరారు. 1300 మంది రాష్ట్ర అధికారులు, 34,000 మంది జిల్లాలలోని క్షేత్రస్థాయి స్థాయి అధికారులతో విడతల వారీగా శిక్షణ అందించి విపత్తు నిర్వహణ వ్యవస్థను పటిష్టం చేస్తామని హోంమంత్రి వెల్లడించారు.
ప్రకృతి విపత్తులు సంభవించినప్పుడు ఏ విధంగా ఎదుర్కోవాలనే అంశంపై వివిధ శాఖల అధికారులకు మూడ్రోజులపాటు అవగాహన కల్పించుతున్నట్లు హోంమంత్రి అనిత స్పష్టం చేశారు. బుడమేరు వరదలు, హుద్ హుద్ తుపాను, ఇతర విపత్తులను సీఎం చంద్రబాబు సారథ్యంలో సమర్థవంతంగా ఎదుర్కొన్నామని తెలిపారు.
విజయవాడలో వరదలు ముంచెత్తినప్పుడు ఎన్ఐడీఎమ్, ఎన్టీఆర్ఎఫ్ బృందాల పనితీరు ఆదర్శంగా నిలిచిందని హోంమంత్రి ప్రశంసించారు. సముద్రంలో వేటగాళ్లను అప్రమత్తం చేసే సాంకేతిక పరికరాలను గత వైసీపీ ప్రభుత్వం మూలన పడేసిందని హోంమంత్రి ఆగ్రహం వ్యక్తం చేశారు. అలా చేయడం ద్వారా మత్స్యకారుల ప్రాణాలకు పొంచి ఉన్న హానిని సైతం లెక్కచేయలేదన్నారు.
కృష్ణా జిల్లా గన్నవరం మండలం కొండపావులూరులోని జాతీయ విపత్తు నిర్వహణ సంస్థ సౌత్ క్యాంపస్‌ను హోంమంత్రి అనిత సందర్శించారు. నేషనల్ ఇన్స్టిట్యూట్ ఆఫ్ డిజాస్టర్ మేనేజ్ మెంట్ (ఎన్ఐఎండీ) క్యాంపస్ బావుందని హోంమంత్రి మెచ్చుకున్నారు. తుపాను, వరదల వంటి అత్యవసర పరిస్థితుల్లో క్షణాల్లో స్పందించి సహాయక చర్యలు చేపట్టే బలగాల సంసిద్ధత గురించి ఆరా తీశారు. విపత్తును బట్టి ఎన్డీఆర్ఎఫ్ ఉపయోగించే అత్యాధునిక పరికరాల ప్రదర్శనను తిలకించారు.
కొన్ని ప్రత్యేక పరిస్థితుల్లో ప్రమాదానికి ఎదురీదే ఎన్డీఆర్ఎఫ్ బలగాల భద్రత గురించి కూడా హోంమంత్రి ప్రత్యేకంగా అడిగి తెలుసుకున్నారు. ఈ కార్యక్రమంలో ప్రభుత్వ ప్రత్యేక ప్రధాన కార్యదర్శి ఆర్పి సిసోడియా, ఏపీఎస్డీఎంఏ మేనేజింగ్ డైరెక్టర్ కూర్మనాథ్,కల్నల్ పి.ఎస్.రెడ్డి, ఎన్ఐడీఎం సౌత్ క్యాంపస్ జాయింట్ డైరెక్టర్ తదితరులు పాల్గొన్నారు.
