పెనుమూరు: భూమి కోసం ఓ రైతు ప్రాణాలొదిలిన ఘటన శనివారం చిత్తూరు జిల్లా పెనుమూరు తహశీల్దార్ కార్యాలయం వద్ద చోటు చేసుకుంది. పెనుమూరు మండలం రామకృష్ణాపురం పంచాయతీ రాజాఇండ్లు గ్రామానికి చెందిన రత్నం (55) అనే రైతుకు సర్వే నెంబర్‌ 918/4లోని భూమికి 1974లో లీజు పట్టా ఇచ్చారు.రైతుకు భూమి చెందకూడదనే ఉద్దేశంతో తిమ్మరాజు కండ్రిగ గ్రామస్థులు తరచూ అభ్యంతరం వ్యక్తం చేస్తున్నారు. ఈ విషయంపై రత్నం.. 2009లో చిత్తూరు న్యాయస్థానాన్ని ఆశ్రయించగా.. ఆ భూమి అతనిదేనని న్యాయస్థానం పర్మినెంట్‌ ఇంజంక్షన్‌ ఆర్డర్‌ ఇచ్చింది. ఆ తర్వాత తిమ్మరాజు కండ్రిగ గ్రామస్థులు కొన్ని అభ్యంతరాలు వ్యక్తం చేశారు.
ఇటీవల రత్నానికి చెందిన భూమిలో కొందరు పక్కా ఇళ్లు నిర్మించుకున్నారు. ఈ విషయంలోనూ రత్నం కోర్టుకు వెళ్లారు. నాలుగు రోజుల క్రితం మిగిలిన భూమిని చదును చేసేందుకు ప్రయత్నించారు. వీఆర్వో వెళ్లి పనులు చేయకూడదని అభ్యంతరం వ్యక్తం చేశారు. ఈ విషయంపై అదేరోజు రత్నం తహశీల్దార్ రమణిని కలిసి సమస్య వివరించారు. అక్కడే ఉన్న స్థానిక ప్రజాప్రతినిధితో రత్నానికి గొడవ జరిగింది. దీంతో మనస్తాపం చెందిన రైతు అనారోగ్యం పాలయ్యాడు. ఆసుపత్రిలో చికిత్స పొంది ఆరోగ్యం కుదుట పడిన తర్వాత శుక్రవారం నుంచి తహశీల్దార్ కార్యాలయం వద్ద నిరసన దీక్ష చేపట్టాడు. ఈక్రమంలో శనివారం మధ్యాహ్నం కార్యాలయంలో అధికారులతో మాట్లాడుతూ… ఒక్కసారిగా కుప్పకూలాడు. కార్యాలయ సిబ్బంది ఆసుపత్రికి తీసుకెళ్లగా అప్పటికే మృతి చెందినట్లు వైద్యులు ధ్రువీకరించారు. విషయం తెలుసుకున్న మృతుడి కుమారులు, కుమార్తె తహశీల్దార్‌తో వాగ్వాదానికి దిగారు. ఉద్దేశపూర్వకంగానే రాజకీయ నాయకుల అండతో తమ తండ్రిని హత్య చేసి ఆసుపత్రికి తరలించారని ఆరోపించారు.
