విశాఖకు హెచ్ సీఎల్ గ్లోబల్ సెంటర్.. గన్నవరంలో 20 వేల కొలువులు!

స్విట్జర్లాండ్ మంచు కొండల్లో ఆంధ్రప్రదేశ్ భవిష్యత్తుకు బంగారు బాటలు పడుతున్నాయి. దావోస్ సదస్సులో భాగంగా హెచ్ సీఎల్ టెక్నాలజీస్ సీఈవో & ఎండీ సి. విజయకుమార్‌తో మంత్రి నారా లోకేష్ భేటీ అయ్యారు. కేవలం మర్యాదపూర్వక భేటీగా కాకుండా, స్పష్టమైన లక్ష్యాలతో, భారీ ప్రతిపాదనలను లోకేష్ వారి ముందుంచారు.

హెచ్ సీఎల్ ముందు లోకేష్ పెట్టిన ‘మెగా’ ప్రపోజల్స్:

విశాఖలో 10 వేల మందితో డెలివరీ సెంటర్: సాగరతీరం విశాఖపట్నంలో గ్లోబల్ డెలివరీ, మేనేజ్డ్ సర్వీసుల కోసం కనీసం 10,000 మంది ఉద్యోగుల సామర్థ్యంతో కొత్త సెంటర్‌ను ఏర్పాటు చేయాలని లోకేష్ కోరారు.

గన్నవరం ‘ఐటీ హబ్’గా మార్పు: ఇప్పటికే ఉన్న గన్నవరం క్యాంపస్‌ను రాబోయే 3-5 ఏళ్లలో 20,000 మంది ఉద్యోగులకు విస్తరించాలని, దీన్ని ఏపీలోనే అతిపెద్ద డిజిటల్ ఇంజనీరింగ్ హబ్‌గా తీర్చిదిద్దాలని విజ్ఞప్తి చేశారు.

రతన్ టాటా ఇన్నోవేషన్ హబ్ – 100 స్టార్టప్‌లకు అండ: ఏపీ ప్రభుత్వం ప్రతిష్టాత్మకంగా చేపట్టిన ‘రతన్ టాటా ఇన్నోవేషన్ హబ్’ ద్వారా 100 స్టార్టప్‌లకు హెచ్ సీఎల్ సాంకేతిక మద్దతు, మార్కెట్ యాక్సెస్ అందించాలని కోరారు.

ఏఐ ఇన్నోవేషన్ & ఎడ్‌టెక్ ల్యాబ్: రాష్ట్రంలోని ఐఐటీలు, యూనివర్సిటీలతో కలిసి ఉమ్మడిగా ఆర్టిఫిషియల్ ఇంటెలిజెన్స్ (AI) మరియు ఎడ్‌టెక్ ల్యాబ్‌లను ఏర్పాటు చేయాలని ప్రతిపాదించారు.

గ్రామీణ యువతకు స్కిల్ డెవలప్‌మెంట్: టైర్-2 నగరాలు, గ్రామీణ యువత కోసం ఏపీఎస్ఎస్ డీసీ (APSSDC) భాగస్వామ్యంతో ప్రత్యేక నైపుణ్యాభివృద్ధి కార్యక్రమాలకు పిలుపునిచ్చారు.

“స్పీడ్ ఆఫ్ డూయింగ్ బిజినెస్.. ఇదే మా నినాదం! పెట్టుబడులకు ఆంధ్రప్రదేశ్ ఇప్పుడు కేరాఫ్ అడ్రస్.”— మంత్రి నారా లోకేష్

సానుకూలంగా స్పందించిన హెచ్ సీఎల్:

మంత్రి లోకేష్ విజన్‌ను, ఆంధ్రప్రదేశ్ ప్రభుత్వం చూపుతున్న చొరవను హెచ్ సీఎల్ సీఈవో విజయకుమార్ అభినందించారు. రాష్ట్ర ప్రభుత్వం అందించిన ఈ ప్రతిపాదనలను సానుకూలంగా పరిశీలించి, త్వరలోనే నిర్ణయం తీసుకుంటామని హామీ ఇచ్చారు.

ఒకప్పుడు గన్నవరానికి హెచ్ సీఎల్ రావడంలో కీలక పాత్ర పోషించిన లోకేష్, ఇప్పుడు అదే సంస్థను విశాఖకు కూడా తీసుకురావాలని పట్టుదలతో ఉన్నారు. ఈ చర్చలు గనుక కార్యరూపం దాల్చితే ఏపీ ఐటీ రంగంలో కొత్త శకం మొదలైనట్టే!