ఈ దేశం వచ్చిన కొత్తలో, అంటే పదహారేళ్ళ క్రితం, ఒక ముస్లిం అనుకున్న అమ్మాయి, యహూది (యూదులు) అమ్మాయి అని తెలిసి షాక్ అయ్యాను. జోర్డాన్ దేశస్తురాలు.
ఆ అమ్మాయి పేరు మాలో చాలా సాధారణం.
అలాగే ఒక అబ్బాయి పేరు చూసి కూడా. అతను క్రిస్టియన్. ఆఫ్రికన్.
మన తెలుగు రాష్ట్రాల్లో ఉన్న తెలుగు పేర్ల విషయంలో కన్వర్టెడ్ క్రిస్టియన్స్ వల్ల కాసింత అయోమయానికి గురవటం సహజం కానీ, ఇలా యూదుల, క్రిస్టియన్ల పేర్లు ముస్లిం పేర్లతో కలవటం చిత్రం అనిపించింది. దేశం దాటి వచ్చినపుడు చాలా విషయాలు నాకు తెలియవు. వచ్చాక తెలిసినవాటిల్లో ఇదోకటి.
ఇంతకుముందు ఒక సమాధానంలో చెప్పినట్టు – ఆదం (అలైహిస్సలాం) (బైబిల్ పేరు ఆడమ్) కాలం నుండి మహా ప్రవక్త ముహమ్మద్ (సల్లల్లాహు అలైహిస్సల్లం) వరకు వచ్చిన ప్రవక్తల సంఖ్య లక్షా ఇరవై నాలుగు వేలు. అందులో నలుగురు ప్రవక్తల కాలంలో గ్రంథాలు అవతరించాయి.
మూసాహ్(అలైహిస్సలాం) (బైబిల్ పేరు మోషే) కాలంలో తౌరాహ్. దీన్ని అనుసరించే వారు యూదులు.
దావూద్ (అలైహిస్సలాం) (బైబిల్ పేరు డేవిడ్/తెలుగులో దావీదు) కాలంలో జబూర్. ఈ గ్రంధం తీసివేయబడింది.
ఈసాహ్ (అలైహిస్సలాం) (బైబిల్ పేరు జీసస్/తెలుగులో యేసు) కాలంలో ఇంజీల్ (బైబిల్). ఈ గ్రంధం అనుసరించేవారు క్రిస్టియన్లు.
ముహమ్మద్ (సల్లల్లాహు అలైహి వసల్లం) కాలంలో కురాన్/ఖురాన్. ఈ గ్రంధం అనుసరించేవారు ముస్లింలు.
అయితే మొత్తం చరిత్ర ఒకటే అయినందున, పెట్టే పేర్లకు మతగ్రంధాలను అనుసరించే విధానం ఉండటం వల్ల ఆయా పూర్వికుల, మహనీయుల పేర్లనే పెట్టడం జరుగుతుంది. మొత్తంగా అవే పేర్లు కాబట్టి, యూదులు ఎవరో, ముస్లిములు ఎవరో, క్రిస్టియన్స్ ఎవరో కొన్ని సందర్భాలలో అర్ధం కాదు.
ఈ సమాధానం ఇస్లామిక్ దృష్టికోణం నుండి వ్రాయబడింది.
– షేక్ షఫీ
