– ఎన్టీఆర్ ఆత్మ చంద్రబాబును దీవిస్తుంది
– చంద్రబాబు విజన్ ఉన్న నాయకుడు
– చంద్రబాబు ఘనత దేశ విదేశీ నాయకులకు కూడా తెలుసు
– బాబు గొప్పతనం మీకంటే బయటవారికే తెలుసని చురకలు
– హైదరాబాద్ ను హైటెక్ నగరంగా చంద్రబాబు మార్చారు
– ఎన్టీఆర్ యుగపురుషుడు
– ఎన్టీఆర్ ప్రభావం నాపై చాలా ఉంది
– సూపర్‌స్టార్ రజనీకాంత్
విజయవాడ వేదికగా సూపర్‌స్టార్ రజనీకాంత్ చాలాకాలం తర్వాత చేసిన రాజకీయ వ్యాఖ్యలు సంచలనం సృష్టించాయి. చంద్రబాబు నాయుడు మళ్లీ ముఖ్యమంత్రి అయితే, ఆంధ్రప్రదేశ్ దేశంలోనే నెంబర్ వన్ అవుతుందని జోస్యం చెప్పారు. హైదరాబాద్ అభివృద్ధి చూస్తే చంద్రబాబు అంటే ఏమిటన్నది అర్ధమవుతుందన్నారు. చంద్రబాబు గొప్పతనం ఇక్కడ మీకంటే బయట ప్రపంచానికి బాగా తెలుసని చురకలు అంటించారు. విజయవాడకు వచ్చిన రజనీకాంత్ ఇంకా ఏమన్నారంటే…
ఆరేడేళ్ల వయసులో పాతాళభైరవి సినిమా చూశా. లవకుశ సిల్వర్ జూబ్లీ వేడుకల్లో ఎన్టీఆర్ ను చూశా. శ్రీకృష్ణ పాండవీయంలో ఎన్టీఆర్ ను చూసి మైమరిచిపోయా. నేను కండక్టర్ అయ్యాక ఎన్టీఆర్ ను అనుకరించి నటించా . నా సన్నిహితులు సినీరంగంలోకి రావాలని ప్రోత్సహించారు. ఎన్టీఆర్ ప్రభావం నాపై చాలా ఉంది. నేను చూసిన తొలి సినిమా పాతాళభైరవి .
ఈ సభను చూస్తుంటే రాజకీయం మాట్లాడాలనిపిస్తుంది . రాజకీయం మాట్లాడవద్దని అనుభవం చెబుతోంది. చంద్రబాబు విజన్ ఉన్న నాయకుడు. చంద్రబాబు ఘనత దేశ విదేశీ నాయకులకు కూడా
తెలుసు . హైదరాబాద్ ను హైటెక్ నగరంగా చంద్రబాబు మార్చారు. ఇటీవల చాలాకాలం తర్వాత హైదరాబాద్ ను సందర్శించాను. నేను హైదరాబాద్ లో ఉన్నానా.. న్యూయార్క్ లోనా అనిపించింది. 2024లో చంద్రబాబు గెలిస్తే దేశంలో ఏపీ నెంబర్ వన్ అవుతుంది.
నాకు చంద్రబాబు 30 ఏళ్లుగా తెలుసు. నా మిత్రుడు మోహన్‌బాబు నన్ను చంద్రబాబుకు పరిచయం చేశాడు. గొప్ప నాయకుడవుతాడని చెప్పాడు. ఇప్పుడు మీ కంటే ఆయన గొప్పతనం గురించి బయట వారికే ఎక్కువ తెలుసు. చంద్రబాబు విజనరీ. మరో నలభై ఏళ్లకు ఇప్పుడే ప్రణాళిక రచించారు. ఆయన కోరిక నెరవేరాలని, ఆయన ఆరోగ్యంతో ఉండాలని ఆ భగవంతుడిని కోరుకుంటున్నా.
ఎన్టీఆర్ ఆత్మ చంద్రబాబును దీవిస్తుంది. ఎన్టీఆర్ క్రమశిక్షణ పాటించేవారు. దానవీర శూరకర్ణలో ఎన్టీఆర్ లా ఉండాలనుకున్నాను. ఎన్టీఆర్ లా మేకప్ వేసుకుని ఫొటో దిగి నా స్నేహితుడికి చూపించా. నేను కోతిలా ఉన్నానని నా స్నేహితుడు అన్నాడు.
