– ప్రాణప్రతిష్ఠ ముగిసిన వారం రోజుల్లో దర్శనం
– శ్రీరామ జన్మభూమి తీర్థ క్షేత్ర ట్రస్ట్ నిర్మాణ కమిటీ ఛైర్మన్ నృపేంద్ర మిశ్రా వెల్లడి
అయోధ్యలో జూన్ 5వ తేదీ నాటికి ఆలయ నిర్మాణ పనులు పూర్తవుతాయని శ్రీరామ జన్మభూమి తీర్థ క్షేత్ర ట్రస్ట్ నిర్మాణ కమిటీ ఛైర్మన్ నృపేంద్ర మిశ్రా వెల్లడించారు. ఈ చారిత్రక ఘట్టానికి గుర్తుగా, జూన్ 3 నుంచి 5వ తేదీ వరకు ఆలయ ప్రాంగణంలో రామ్దర్బార్ విగ్రహాల ప్రాణప్రతిష్ఠ మహోత్సవాన్ని నిర్వహించనున్నట్లు ఆయన తెలిపారు.
జూన్ 5న జరిగే ఈ పవిత్రమైన ప్రతిష్ఠాపన కార్యక్రమానికి వివిధ విశ్వాసాలకు చెందిన ఆధ్యాత్మికవేత్తలను, మత పెద్దలను ఆహ్వానించనున్నట్లు ఆయన పేర్కొన్నారు. అయితే, ఈ వేడుకకు కేంద్ర, రాష్ట్ర ప్రభుత్వాలకు చెందిన వీఐపీలను ఆహ్వానించడం లేదని వెల్లడించారు. సుమారు ఐదు వందల సంవత్సరాల సుదీర్ఘ పోరాటం, నిరీక్షణ అనంతరం ఈ మహత్తర క్షణం ఆసన్నమైందని వ్యాఖ్యానించారు.
ప్రాణప్రతిష్ఠ కార్యక్రమం ముగిసిన తర్వాత, వారం రోజుల్లో ఆలయంలో నూతనంగా నిర్మించిన భాగాలను భక్తుల దర్శనార్థం అందుబాటులోకి తీసుకురానున్నట్లు వెల్లడించారు.
