పోలీస్ స్టేషన్లో ఆర్ఎస్ఎస్ ప్రచారక్‌ను వివస్త్రుడిని చేసి కొట్టారు
- ఆరుగురు పోలీసులు సస్పెండ్…. పోలీస్ స్టేషన్ ముట్టడి
జైపూర్ గ్రామీణ ప్రాంతంలోని నరేనా పోలీస్ స్టేషన్లో, పోలీస్ కస్టడీలో ఉన్న ఒక ఆర్ఎస్ఎస్ జిల్లా ప్రచారక్‌పై దాడి జరిగిందన్న ఆరోపణల నేపథ్యంలో రాజస్థాన్‌లో ఆరుగురు పోలీసు సిబ్బందిని సస్పెండ్ చేశారు. తన ఫిర్యాదులో, ఆర్ఎస్ఎస్ ప్రచారక్ కృష్ణ అవతార్ పోలీస్ కస్టడీలో ఉన్నప్పుడు తన బట్టలు తొలగించి, తన జననేంద్రియాలపై దాడి చేశారని, శారీరక హింసకు గురిచేశారని ఆరోపించారు.
ఈ ఘటనతో ఆగ్రహించిన సంఘ్ ప్రతినిధులు, కార్యకర్తలు, గ్రామస్తులు ఆరు గంటల పాటు పోలీస్ స్టేషన్‌ను ముట్టడించారు. దుకాణాలు కూడా మూసివేశారు. జైపూర్ రూరల్ ఎస్పీ హనుమాన్ సహాయ్ ఘటనా స్థలానికి చేరుకుని ప్రజలను శాంతింపజేశారు. స్టేషన్ హౌస్ ఆఫీసర్ ఉమ్రావ్ సింగ్ తో సహా ఆరుగురు పోలీసు సిబ్బందిని సస్పెండ్ చేశారు. దాడి, ఇతర నేరాలకు సంబంధించిన సెక్షన్ల కింద నిందితులపై కేసు నమోదు చేశారు.
నమోదైన ఎఫ్‌ఐఆర్ ప్రకారం, పోలీసులు అవతార్ కుటుంబం, ఆర్‌ఎస్‌ఎస్‌తో ఆయనకున్న అనుబంధం గురించి అవమానకరమైన వ్యాఖ్యలు చేస్తూ, “సంఘ్ దేశాన్ని నాశనం చేసింది” అని అన్నట్లు కూడా ఆరోపణలు ఉన్నాయి. ఆర్ఎస్ఎస్ అధికారిక మీడియా విభాగమైన ‘విశ్వ సంవాద్ కేంద్ర’ (జోధ్‌పూర్ ప్రాంత్) ఈ ఘటనను “అత్యంత సిగ్గుచేటు” అని అభివర్ణించింది.
‘ఎక్స్’ వేదికగా స్పందిస్తూ, ఆర్ఎస్ఎస్ ప్రచారక్‌పై జరిగినట్లు చెబుతున్న ఈ దాడి “ప్రతి స్వయంసేవక్ చెంపపై కొట్టిన బలమైన దెబ్బ” అని పేర్కొంది. “ప్రస్తుతం ఉన్నత పదవుల్లో ఉన్న నాయకులను తయారు చేసిన అదే ఆర్‌ఎస్‌ఎస్‌కు చెందిన ఒక నిబద్ధత కలిగిన ప్రచారక్, రక్తసిక్తమైన స్థితిలో ఎస్ఎంఎస్ ఆసుపత్రిలో చేరారు,” అని ఆ సంస్థ పేర్కొంది.
సంభార్ జిల్లాలో సంఘ్ కార్యకలాపాలకు సంఘ్ ప్రచారక్ కృష్ణావతార్ ఇన్‌చార్జిగా ఉన్నారు. శనివారం రాత్రి, ఆయన ఫులేరాకు ప్రయాణిస్తుండగా, నారాయణ పోలీస్ స్టేషన్‌కు చెందిన ఒక పోలీసు ఆయనను బలవంతంగా అదుపులోకి తీసుకుని స్టేషన్‌కు తీసుకెళ్లాడు. కృష్ణావతార్ తనను తాను ఎస్.హెచ్.ఓ ఉమ్రావ్ సింగ్‌కు పరిచయం చేసుకుని, తాను సంఘ్ ప్రచారక్‌నని చెప్పాడు. ఇది విన్న ఎస్.హెచ్.ఓ ఆగ్రహానికి గురైనట్లు ఆరోపణలు ఉన్నాయి.
స్టేషన్ హౌస్ ఆఫీసర్ ఉమ్రావ్ సిం అదే రోజు అతని ప్రచారక్ హోదాను తొలగించమని పోలీసు సిబ్బందిని ఆదేశించినట్లు ఆరోపణలు ఉన్నాయి. ఏ.ఎస్.ఐ ఓంకార్ సింగ్, అజయ్, రమేష్, కుల్దీప్, మహిపాల్, వినోద్‌లపై సంఘ్, దాని ప్రచారక్ కుటుంబం గురించి అసభ్యకరమైన వ్యాఖ్యలు చేసినట్లు ఆరోపణలు ఉన్నాయి. ఓంకార్ సింగ్, అజయ్ కృష్ణావతార్ చేతులు, కాళ్లు పట్టుకోగా, మహిపాల్, వినోద్ అతని మర్మాంగాలపై దాడి చేశారు.
ఆ తర్వాత వారు అతని బట్టలు విప్పి, దారుణంగా కొట్టడంతో అతను స్పృహ కోల్పోయాడు. పోలీసు సిబ్బంది అతన్ని కమ్యూనిటీ హెల్త్ సెంటర్‌కు తీసుకెళ్లారు. అతనికి స్పృహ వచ్చిన తర్వాత, కృష్ణావతార్‌పై మళ్లీ దాడి జరిగింది. అతని పరిస్థితి విషమంగా ఉండటంతో, జైపూర్‌లోని ఎస్ఎంఎస్ ఆసుపత్రికి తరలించారు.
ఇప్పుడే దర్యాప్తు ప్రారంభం
ఈ దాడి ఆరోపణల గురించి అడిగినప్పుడు, ఈ కేసును దర్యాప్తు చేస్తున్న అధికారి అనుపమ్ మిశ్రా మాట్లాడుతూ, దర్యాప్తు ఇప్పుడే ప్రారంభమైందని, అవతార్ వాంగ్మూలాన్ని నమోదు చేస్తున్నామని తెలిపారు. అనురాగ్ ఆగివాల్ ఇచ్చిన ఫిర్యాదు ఆధారంగా నమోదైన ఎఫ్‌ఐఆర్ ప్రకారం, అక్టోబర్ 10న రాత్రి 9 గంటల సమయంలో ఈ ఘటన జరిగింది. అప్పుడు అవతార్‌ను “ఎటువంటి కారణం లేకుండా” నరేనా పోలీస్ స్టేషన్‌కు తీసుకెళ్లారని ఆరోపణలు ఉన్నాయి.
“ఆయనను ఏ చట్టపరమైన ప్రాతిపదికన అడ్డుకున్నారు? అరెస్టు చేశారా?మరియు అరెస్టుకు గల కారణాలు ఏమిటి?” అని ఆగివాల్ ప్రశ్నించారు. ఫిర్యాదు ప్రకారం, తాను ప్రచారక్‌నని అవతార్ పోలీసులకు చెప్పినప్పుడు, వారు దాడిని కొనసాగిస్తూ “ఈ రోజు ఇతని ప్రచారక్ హోదాను దింపేయండి” అని అన్నట్లు ఆరోపణలు ఉన్నాయి. అవతార్‌ను నిర్బంధించిన పరిస్థితులు, ఆరోపిత దాడి, ఇందులో పాలుపంచుకున్న పోలీసు సిబ్బంది ప్రవర్తనపై విచారణ జరపాలని ఆగీవాల్, ఇతరులు కోరారు.
నిరసనగా బీజేపీ నాయకులు ధర్నా
బీజేపీ రాష్ట్ర ప్రధాన అధికార ప్రతినిధి రామ్‌లాల్ శర్మ, మాజీ ఎమ్మెల్యే నిర్మల్ కుమావత్, బీజేపీ జైపూర్ జిల్లా రూరల్ సౌత్ అధ్యక్షుడు రాజేష్ గుర్జర్ పోలీసు సిబ్బందిపై చర్యలు తీసుకోవాలని డిమాండ్ చేస్తూ పోలీస్ స్టేషన్ వద్ద ధర్నా నిర్వహించారు. స్టేషన్ హౌస్ ఆఫీసర్ ఉమ్రావ్ సింగ్, ఏఎస్ఐ ఓంకార్, రమేష్, మరో ముగ్గురు సిబ్బందిని ఎస్పీ హనుమాన్ సహాయ్ సస్పెండ్ చేశారు. ఈ మొత్తం విషయంపై ఎస్పీ దర్యాప్తు చేస్తున్నారు.
చట్టవిరుద్ధంగా గుమిగూడటం, స్వచ్ఛందంగా గాయపరచడం, అక్రమ నిర్బంధం, అక్రమ బంధనం, శాంతిభంగాన్ని రెచ్చగొట్టే ఉద్దేశ్యంతో ఉద్దేశపూర్వకంగా అవమానించడం, నేరపూరిత బెదిరింపులకు సంబంధించిన భారతీయ న్యాయ సంహిత నిబంధనలను ఈ ఎఫ్‌ఐఆర్ ప్రస్తావిస్తుంది.
పోలీస్ స్టేషన్ సీసీటీవీ ఫుటేజ్, ఇతర రికార్డులు, వైద్య పత్రాలను స్వాధీనం చేసుకుని పరిశీలించాలని బిజెపి నేతలు డిమాండ్ చేశారు. ఆరోపిత దాడిని నివారించడానికి, సకాలంలో వైద్య సహాయం అందించడానికి చర్యలు తీసుకున్నారా లేదా అనే విషయంతో సహా, ఆ సమయంలో అక్కడ ఉన్న ఎస్‌హెచ్‌ఓ, ఇతర సిబ్బంది పాత్రను కూడా పరిశీలించాలని ఫిర్యాదులో కోరారు.