కాశీబుగ్గ ఆలయం వద్ద జరిగిన ఘోర తొక్కిసలాట ఉదంతం రాష్ట్రంలో విషాద ఛాయలు నింపింది. గుండెలు పగిలే ఆ ఆర్తనాదాల మధ్య, పలాస కమ్యూనిటీ హెల్త్ సెంటర్ (CHC) ప్రాంగణం తీవ్రమైన శోకంలో మునిగిపోయింది. సరిగ్గా ఆ కష్ట సమయంలో, రాష్ట్ర మంత్రి నారా లోకేష్ , మానవత్వం మూర్తీభవించినట్లు ఆసుపత్రికి చేరుకున్నారు.
ఆయన వెంట కేంద్ర మంత్రి రామ్మోహన్ నాయుడు , మంత్రులు అనిత , అచ్చెన్నాయుడు కూడా తోడుగా రావడం, బాధితులకు ప్రభుత్వ అండ ఎంత బలంగా ఉందో చాటి చెప్పింది.
ఆసుపత్రి వార్డుల్లో… గాయాలతో, అంతకంటే ఎక్కువ మానసిక వేదనతో విలవిలలాడుతున్న క్షతగాత్రులను చూసి మంత్రి లోకేష్ గుండె తరుక్కుపోయింది. ప్రతి పడక దగ్గరకు వెళ్లి, ఆత్మీయుడిలా వారిని పరామర్శించారు. వారి గాయాలు, నష్టం వివరాలు తెలుసుకుంటూ, డాక్టర్లతో మాట్లాడి అందుతున్న వైద్యం నాణ్యత గురించి కూలంకషంగా అడిగి తెలుసుకున్నారు.
“మీరు చాలా పెద్ద కష్టం నుంచి బయటపడ్డారు. ధైర్యంగా ఉండండి! ఆ దురదృష్టకర సంఘటన మనందరినీ కలిచివేసింది. ఈ బాధలో మేము మీకు అండగా ఉంటాం. మీ చికిత్సకయ్యే ఖర్చు, ఇతర సహాయం… ప్రతీది ప్రభుత్వం చూసుకుంటుంది. దయచేసి ధైర్యం కోల్పోవద్దు. మేము అన్ని విధాలా మీకు అండగా నిలబడతాం,” అంటూ లోకేష్ వారికి వ్యక్తిగతమైన భరోసాను, ధైర్యాన్ని ఇచ్చారు.
ఆయన మాటల్లోని కరుణ, ఆప్యాయత తొక్కిసలాట భయం నుండి తేరుకోలేని బాధితులకు, వారి కుటుంబాలకు గొప్ప సాంత్వన కలిగించింది.
About the Author
