నేను

నా నుంచి నేను బయటకొస్తాను;
నేను నేనవడానికి ముందుకొస్తాను.
నా మస్తిష్కానికి మనసునిస్తాను;
నా మనసుకు మస్తిష్కాన్నిస్తాను.
నిగ్గు తేల్చుకుంటూ ప్రయాణిస్తాను;
నింగిలో నికేతనం నిర్మించుకుంటాను.
సత్యాల తత్త్వాలతో
నిత్యానుష్ఠానం చేస్తాను;
సర్వథా సన్మయుడినై
సర్వదా తన్మయుడినౌతాను.
ప్రజ్ఞను యజ్ఞోపవీతంగా ధరిస్తాను;
విజ్ఞతా ప్రకరణాలను వివృతం చేస్తాను.
ప్రయోజనాల కోసం ప్రయత్నిస్తాను;
పరుల కోసమూ పరిమళిస్తాను.
మునుసాగే మునినౌతాను;
కనిపించే ధ్వనినౌతాను.
స్వభావాన్ని ఖడ్గం చేసుకుని
కాలాన్ని కోసుకుంటూ నడుస్తాను;
శరీరం అన్న స్యందనంతో
చేరుకోవలసిన తీరాలను చేరుకుంటాను.
కుశలాల మిసమిసల మసలుతాను;
రస వశమై దశ దిశలా వసిస్తాను.
జననం పల్లవికి
జీవనం చరణాన్ని సంధిస్తాను;
జీవం ఉన్న గీతమై
భావ సంపదతో రవళిస్తాను.
మంత్రంగా మెఱుస్తూంటాను;
నేను మనిషిగా పోతాను!
రోచిష్మాన్
9444012279
