ఏపి భవిష్యత్తుపై దిగులు లేదిక!

– చంద్రబాబు, లోకేష్‌ని మెచ్చుకోకుండా ఉండలేకపోతున్నాను

చంద్రబాబు నాయుడు గారు.. ఆయనెక్కడెక్కడో తిరుగుతూ ఉంటారు.. ఏం చేస్తున్నాడో ఎవరికీ అర్థం కాడు. మీటింగ్స్, ఫొటోలు మాత్రమే కనిపిస్తుంటాయి. అవీ పెద్దగా సామాన్యులకు అర్థం కావు.

రాజకీయాలు, రాజకీయ నాయకులు నాకు సరిపడని మెంటాలిటీ! అందుకే రెండు మూడేళ్లకు ఓ పోస్ట్ ఉంటుంది.. అదీ నా హృదయం ఉప్పొంగితేనే!
ఒకప్పుడు హైటెక్ సిటీ ఎవరికీ అర్థం కాలేదు.. అదేదో పెద్ద బిల్డింగ్… అంతవరకే అర్థమైన వాళ్లు చాలామంది! కానీ అది తెలుగు వారి చరిత్రను మలుపు తిప్పింది. ఈరోజు వైజాగ్‌లో గూగుల్ డేటా సెంటర్ దానికి పదిరెట్లు శక్తివంతమైనది అని అర్థమయ్యే వాళ్లు అతి కొద్దిమందే! ఏదో గూగుల్ ఆఫీస్ పెడుతోంది అనుకుంటారు గానీ.. ఇప్పుడు ప్రపంచం మొత్తంలో AI ఇన్‌ఫ్రాస్ట్రక్చర్ అత్యంత కీలకమైన రంగం.

ఒకప్పుడు కంప్యూటర్లు రాజ్యం ఏలబోయే ముందు చంద్రబాబు గారు ఎలాగైతే దాని నాడిని పట్టుకుని ముందుకు సాగారో.. ఇప్పుడు ఏం చేశారో, ఎలా ఒప్పించారో తెలీదు గానీ.. సరైన రాజధాని లేదని చాలామంది ఎగతాళిగా మాట్లాడే రాష్ట్రానికి అంత పెద్ద ప్రాజెక్ట్ తీసుకు రావడం మామూలు విషయం కాదు. రాష్ట్రాన్ని ఎగతాళి చేసే వాళ్లకీ, వెనక్కి లాగాలని చూసే వాళ్లకి ఇది కొన్నేళ్ళ పాటు కలత నిద్రని మిగుల్చే ప్రాజెక్ట్.

AI ఆపరేషన్స్‌కి చాలా భారీ రిసోర్సెస్ కావాలి. ముఖ్యంగా గూగుల్ లాంటి ప్రతిష్టాత్మక సంస్థ మిగతా వాటి కంటే ఎత్తుకు పైఎత్తులు వేస్తూ టెక్నాలజీ రంగాన్ని శాసిస్తూ ఉంటుంది. అలాంటి సంస్థ US బయట ఇంత భారీ డేటా సెంటర్ నెలకొల్పడం ఏదో కాజువల్ న్యూస్‌లా చూసే మామూలు విషయం కాదు. ఓ పదేళ్ల నాటికి US వెళ్లే వాళ్లు తగ్గిపోయి, టాలెంట్ ఉన్న వాళ్లకీ, లెర్నింగ్ కర్వ్ ఉన్న వాళ్లకీ ఇక్కడే మన దగ్గరే పూర్తి స్థాయి అవకాశాలు వస్తాయనడంలో సందేహం లేదు.

ఇది కేవలం గూగుల్ ఒక్క దాని వల్ల వస్తుందని అనుకోకండి.. గూగుల్ వచ్చిందంటే ఎకో సిస్టమ్ డెవలప్ అవుతుంది. ఎన్నో మధ్య స్థాయి, చిన్న సంస్థలు ఆపరేషన్స్ మొదలుపెడతాయి. మొదటి భారీ పెట్టుబడి తీసుకు రావడమే అత్యంత కష్టం. కానీ ఒకప్పుడు బిల్ గేట్స్‌ని ఒప్పించిన చంద్రబాబుకి, ఐ.టి. రంగంలో ఎంతో విజన్‌తో పనిచేస్తున్న లోకేష్‌కీ ఇది పెద్ద విషయం కాదు.

2000 ప్రాంతంలో నేను కంప్యూటర్ ఎరా పత్రిక ఎడిటర్‌గా పనిచేస్తుంటే.. మన వాళ్లు BCA, MCA కోర్సులు చేస్తుంటే భలే అనిపించేది. అప్పట్లో మిగతా వాళ్లంతా సివిల్స్, బ్యాంక్ ఎగ్జామ్స్ మాత్రమే రాసేవాళ్లు. సరిగ్గా ఇప్పుడు మన రాష్ట్ర యువత భవిష్యత్ మరింత విస్తరించబోతోంది. గూగుల్ డేటా సెంటర్ తెచ్చిన చంద్రబాబు, ఇక్కడ స్థానిక స్కిల్ డెవలప్మెంట్ మీద మరింత దృష్టి పెట్టడం ఖాయం.

భవిష్యత్‌ని నిర్మించే వాడే నాయకుడు.. భవిష్యత్‌ని అగాధం చేసేవాడు ఎప్పటికీ నాయకుడు కాలేదు. భవిష్యత్‌ని నిర్మించాలంటే దూరదృష్టి ఉండాలి.. తెగువ ఉండాలి, అహోరాత్రాలు కష్టపడాలి.. నిజానికి గూగుల్ డేటా సెంటర్ ఇప్పటికిప్పుడు చాలామందికి అర్థమయ్యే విషయం కాదు!
ఇప్పుడు ఆంధ్రప్రదేశ్ భవిష్యత్ గురించి ఎవరికీ దిగులు అవసరం లేదు!!

– నల్లమోతు శ్రీధర్