సత్యవేడు వేదికగా రాయల్ ఎన్ఫీల్డ్ సరికొత్త అధ్యాయం.. పక్క రాష్ట్రంలో మొదలైన ఆందోళన.. ఏపీకి దక్కిన భారీ విజయం!
దశాబ్దాల కాలంగా ఆటోమొబైల్ రంగానికి చిరునామాగా మారిన పొరుగు రాష్ట్రం తమిళనాడుకు ఇప్పుడు గట్టి పోటీ ఎదురవుతోంది. బుల్లెట్ అంటేనే చెన్నై, చెన్నై అంటేనే రాయల్ ఎన్ఫీల్డ్ అనే ముద్రను చెరిపేస్తూ, ఆ దిగ్గజ సంస్థ 1955 నాటి తన భారత ఉత్పత్తి ప్రారంభం తర్వాత తొలిసారిగా తమిళనాడు దాటి ఆంధ్రప్రదేశ్లో అడుగుపెట్టాలని నిర్ణయించుకోవడం ఇప్పుడు దేశవ్యాప్తంగా చర్చనీయాంశమైంది. తిరుపతి జిల్లా సత్యవేడు మండలంలోని వనెల్లూరు–రాళ్ళకుప్పం గ్రామాల కేంద్రంగా రెండు దశల్లో ₹2,200 కోట్ల పెట్టుబడితో భారీ ప్లాంట్ను ఏర్పాటు చేసేందుకు రాష్ట్ర ప్రభుత్వం ఆమోదం తెలపడం ఏపీ పారిశ్రామిక ముఖచిత్రాన్ని మార్చేసే పరిణామం.
తమిళనాడులో కలవరం.. ఏపీలో సంబరం!
రాయల్ ఎన్ఫీల్డ్ తన చరిత్రలోనే తొలిసారి బయటి రాష్ట్రానికి వెళ్లడం తమిళనాడు పెనుదుమారాన్నే రేపుతోంది. “మా రాష్ట్ర బ్రాండ్ చేజారిపోతోందా?” అని అక్కడి సోషల్ మీడియాలలో, మీడియాలలో ఇదొక “ఇండస్ట్రియల్ వార్”గా మారుతోంది. ఒరగాడం–హోసూర్ బెల్ట్కు వెళ్లాల్సిన పెట్టుబడి సత్యవేడు–శ్రీ సిటీ కారిడార్కు మళ్లుతోందని TN పరిశ్రమ వర్గాలు ఆందోళన చెందుతున్నాయి.
చెన్నైకి అత్యంత సమీపంలో — కేవలం 50 కి.మీ. దూరంలో — సత్యవేడును ఎంచుకోవడం ద్వారా రాయల్ ఎన్ఫీల్డ్ చతురమైన వ్యూహం పన్నింది. అటు చెన్నైలోని పాత సప్లై చైన్ మరియు ఓడరేవులను వాడుకుంటూనే, ఇటు ఆంధ్రప్రదేశ్ అందిస్తున్న భూ కేటాయింపులు, పన్ను రాయితీలు, వేగవంతమైన అనుమతులను అందిపుచ్చుకుంటోంది. ది హిందూ, ఎకనామిక్ టైమ్స్ పత్రికలు దీన్ని “జియోగ్రాఫికల్ ఆర్బిట్రేజ్” అని పిలుస్తున్నాయి. ఇది ఆంధ్రప్రదేశ్ ప్రభుత్వం అనుసరిస్తున్న “స్పీడ్ ఆఫ్ డూయింగ్ బిజినెస్”కు నిదర్శనం.
పెట్టుబడి ఒక్కటే కాదు.. ఒక ‘ఎకోసిస్టమ్’ వస్తోంది!
ఈ ప్రాజెక్టు సంఖ్యలు చూస్తే పరిమాణం అర్థమవుతుంది — వార్షిక ఉత్పత్తి సామర్థ్యంలో 9 లక్షల యూనిట్ల అదనపు వృద్ధి, మరియు 5,000 ప్రత్యక్ష–పరోక్ష ఉద్యోగాలు.
అయితే, ఇవన్నీ కంటే అసలైన గేమ్ చేంజర్ ఏమిటంటే — రాయల్ ఎన్ఫీల్డ్ ఇక్కడ నిర్మించబోతున్న సమగ్ర వెండర్ పార్క్. ఒక బైక్ తయారీకి కావాల్సిన వందలాది స్పేర్ పార్ట్స్ తయారీ యూనిట్లు కూడా ఏపీకి తరలివస్తాయి. తమిళనాడులో వేళ్ళూనుకున్న ఆంసిల్లరీ పరిశ్రమ క్రమంగా విభజనకు లేదా తరలింపుకు గురవుతుందని TN పరిశ్రమ వర్గాలు ఆందోళన చెందడం అతిశయోక్తి కాదు.
ఒక సంస్థ వస్తే మరికొన్ని వస్తాయి — ఇది పరిశ్రమ ఆర్థిక శాస్త్రం. దక్షిణ ఆంధ్రప్రదేశ్ త్వరలోనే మరో స్వతంత్ర ‘ఆటోమొబైల్ హబ్’గా అవతరించబోతోంది. ఐటి శాఖ మంత్రి నారా లోకేశ్ నేతృత్వంలో సాగుతున్న ఈ పారిశ్రామిక వేట, భోగాపురం నుంచి మచిలీపట్నం వరకు సాగుతున్న మౌలిక సదుపాయాల కల్పన ఇప్పుడు ఫలితాలను ఇస్తోంది.
ఇది ఆరంభం మాత్రమే!
గతంలో కియా మోటార్స్ అనంతపురాన్ని ప్రపంచ పటంలో నిలబెడితే, ఇప్పుడు రాయల్ ఎన్ఫీల్డ్ గర్జన సత్యవేడు సరిహద్దుల్లో వినిపించబోతోంది. ఇది కేవలం ఒక పరిశ్రమ రాక మాత్రమే కాదు — గత ఐదేళ్లలో ఏపీ “పెట్టుబడులు రాని రాష్ట్రం” అనే పాత ముద్రను తుడిచిపెట్టేస్తోంది.
పెట్టుబడిదారులకు నమ్మకాన్ని కలిగించడంలో ఆంధ్రప్రదేశ్ ముందంజలో ఉందని ఈ పరిణామం స్పష్టం చేస్తోంది. ఆ నమ్మకాన్ని నిలబెట్టుకోవడమే ఇప్పుడు నిజమైన పరీక్ష.
“బుల్లెట్” గర్జన ఇక మన నేల మీద — అభివృద్ధి బాటలో ఏపీ మరో మైలురాయి!
వెండర్ పార్క్ — సరిహద్దు దాటుతోంది అనే బాధ!
ఒక్క ప్లాంట్ కదలిక కాదు ఇది. Whalesbook Tamil బిజినెస్ పోర్టల్ వెలువరించిన నివేదిక యావత్ తమిళనాడును ఉలిక్కిపడేలా చేసింది — రాయల్ ఎన్ఫీల్డ్ తన ప్రధాన ప్లాంట్తో పాటు ఒక భారీ “వెండర్ పార్క్” మొత్తాన్ని ఆంధ్రప్రదేశ్కు తరలిస్తోందని! బైక్లో ప్రతి బోల్టూ, ప్రతి విడిభాగమూ సరఫరా చేసే వందలాది MSMEలు ఇప్పుడు సరిహద్దు దాటాల్సిన పరిస్థితి ఏర్పడింది.
పుతియ తలైమురై మరియు తంతి టీవీ విశ్లేషణల ప్రకారం — సత్యవేడు ఎంపిక వెనుక గొప్ప వ్యూహం దాగుంది. ఆంధ్రప్రదేశ్ రాయితీలు అనుభవిస్తూనే, చెన్నై పోర్ట్ మరియు సప్లయ్ చైన్ యథావిధిగా వాడుకోవడం — ఇది నిజంగా ఒక “జియో-ఎకనామిక్ మాస్టర్ స్ట్రోక్”!
దినమలర్ మరియు దినతంతి పత్రికలు మాత్రం ఇది తమిళనాడు ప్రభుత్వానికి తీవ్రమైన హెచ్చరికగా అభివర్ణించాయి. పెరుగుతున్న భూముల ధరలు, విద్యుత్ భారం, అనుమతుల జాప్యం — ఇవే కంపెనీని పక్క రాష్ట్రానికి నెట్టాయని స్పష్టంగా రాశాయి.
మరోవైపు చంద్రబాబు నాయుడు మరియు నారా లోకేశ్ నేతృత్వంలో ఆంధ్రప్రదేశ్ చూపిస్తున్న “Speed of Doing Business” తమిళనాడుకు నిద్రలేపే సవాలుగా మారింది.
70 సంవత్సరాల బుల్లెట్ థంప్ ఇప్పుడు ఆంధ్రప్రదేశ్ గాలిలో మోగుతోంది — చెన్నై “డెట్రాయిట్ ఆఫ్ ఏషియా” కిరీటాన్ని నిలబెట్టుకోగలదా? అనే ఆందోళన మొదలైంది.
ఆ బాధను మనం అర్థం చేసుకోగలం. ఎందుకంటే లోదుస్తుల జాకీ కూడా పోగొట్టుకుని గత ఐదేళ్లు మనం అనుభవించాము కాబట్టి.
About the Author
