టిడిపి జాతీయ ప్రధాన కార్యదర్శి నారా లోకేష్
తేదీ 30-09-22
గౌరవనీయులైన
శ్రీ వైఎస్ జగన్మోహన్ రెడ్డి గారికి,
ఆంధ్రప్రదేశ్
విషయం- సుబాబుల్ పంట కొనుగోళ్లలో కూడా రైతుల కులం, ప్రాంతం, పార్టీలు చూసిన వారిపై కఠిన చర్యలు తీసుకోవాలి- వివక్ష లేకండా రైతులందరి పంటను కొనుగోలు చేయాలి.
రాష్ట్రంలో రైతులు తాము పండించిన పంట ఉత్పత్తులను మద్దతు ధరకు విక్రయించుకునేందుకు అనేక కష్టాలు పడుతున్నారు. ఆరుగాలం శ్రమంచి పండించిన పంటను సొమ్ము చేసుకోవాలంటే అధికార పార్టీకి చెందిన వారికే విక్రయించాలనే నూతన సంస్కృతి రాష్ట్రంలో రావడం దురదృష్టకరం. అసలే మద్దతు ధర లేక రైతులు నష్టపోతుండగా, వచ్చిన పంటను విక్రయించాలంటే.. అధికార పార్టీ నేతలకో, లేక వారి సూచించిన దళారులకే అమ్మాలని హుకూం జారీ చేయడం అన్నదాతల దయనీయ పరిస్థితికి అద్దం పడుతోంది. ఒకవేళ అధికార పార్టీ సిఫార్సులతో దళారులకు విక్రయించినా ధరలో కోత పెడుతున్నారు. తమ ఆదేశాలు ధిక్కరించి ఇతరులు ఆ పంటను తరలించే లారీలపై అక్రమ కేసులు బనాయిస్తున్నారు. అధికారమున్న దళారులకే పంట కొనే హక్కు ఉందంటూ పోలీసులు సైతం వారికి వంత పాడటం దుర్మార్గం.
మూడున్నరేళ్లుగా గిట్టుబాటు ధరలేక సుబాబుల్ రైతులు తీవ్ర నష్టాల్లో ఉన్నారు. పేపర్ తయారీ పరిశ్రమలు నామమాత్రంగానే సుబాబుల్ కర్ర కొన్నాయి. దీంతో పంట విక్రయించుకునేందుకు నిరీక్షిస్తున్నారు. గత కొద్ది రోజులుగా పరిశ్రమలు సుబాబుల్ కర్ర కొనేందుకు ఆసక్తి చూపిస్తున్నాయి. అయితే రైతులు తాము పండించిన పంటను మద్దతు ధరకు, తమకు నచ్చిన వారికి విక్రయించుకోవాలనుకున్నా వారి ఆశలు అడియాశలు అవుతున్నాయి. అధికార పార్టీ నేతలకు, లేదా వారి సూచించిన దళారులకే పంట అమ్మాలనే బెదిరింపులతో రైతులు తీవ్ర ఆందోళనలో ఉన్నారు. గత ఎన్నికల్లో అధికార పార్టీకి ఓటువేయని వారి పంటను కొనబోమని చెప్పడం ఎంతవరకు సమంజసం? తమ పంటను విక్రయించేందుకు గుంటూరు జిల్లా చిలకలూరిపేట పోలీస్ స్టేషన్ లో రైతులు పడిగాపులు కాయడం పరిస్థితి తీవ్రతకు అద్దం పడుతోంది.
రైతులు తమ వ్యవసాయ ఉత్పత్తులను ఎక్కడైనా విక్రయించుకునే హక్కు ఉంది. సుబాబుల్ పంట కొనుగోలు విషయంలో రాజకీయ జోక్యాన్ని నివారించాల్సిన అవసరం ఉంది. రైతుల కులం, ప్రాంతం, పార్టీలు చూసిన వారిపై కఠిన చర్యలు తీసుకోవాలి. వివక్ష లేకండా రైతులందరి పంటను కొనుగోలు చేయాలి. పోలీసుల బెదిరింపులను నియంత్రించాలి. కష్టాల్లో ఉన్న రైతులకు అండగా నిలవాలని విజ్ఞప్తి చేస్తున్నాం.
