November 17, 2026

గ్లోబల్ స్థాయికి తెలుగు సినీ పరిశ్రమ

  • ఇండియా జాయ్‌ 2026కు భారీ ఏర్పాట్లు
  • భారత్ ఫ్యూచర్ సిటీలో డిసెంబర్ 7 నుంచి 13 వరకు ఇండియా జాయ్ వేడుకలు
  • సినీ, యానిమేషన్, వీఎఫ్ఎక్స్, గేమింగ్ రంగాలకు అంతర్జాతీయ వేదిక

హైదరాబాద్: తెలంగాణలో సినీ, మీడియా, వినోద రంగాలను అంతర్జాతీయ స్థాయికి తీసుకెళ్లే లక్ష్యంతో రాష్ట్ర ప్రభుత్వం ప్రతిష్ఠాత్మకంగా నిర్వహించనున్న ఇండియా జాయ్‌–2026కు సన్నాహాలు ముమ్మరమయ్యాయి. ఈ నేపథ్యంలో డాక్టర్ బీఆర్ అంబేద్కర్ తెలంగాణ సచివాలయంలో ప్రభుత్వం ఇండియా జాయ్‌–ఫిల్మ్ సెక్టార్ ఎగ్జిక్యూటివ్ కమిటీ సమావేశాన్ని నిర్వహించింది.

డిసెంబర్ 7 నుంచి 13 వరకు హైదరాబాద్‌లోని భారత్ ఫ్యూచర్ సిటీలో జరగనున్న ఇన్వెస్ట్ తెలంగాణ గ్లోబల్ సమ్మిట్‌–2026లో భాగంగా ఇండియా జాయ్ కార్యక్రమాలు నిర్వహించనున్నారు. ఈ సమావేశంలో తెలుగు సినీ పరిశ్రమ ప్రముఖులు, యానిమేషన్, విజువల్ ఎఫెక్ట్స్, గేమింగ్ రంగాల ప్రతినిధులు పాల్గొని తమ అభిప్రాయాలను వెల్లడించారు.

గ్లోబల్ స్థాయికి హైదరాబాద్ సృజనాత్మక రంగం

ఈ సందర్భంగా ఐటీఈ అండ్ సీ శాఖ జాయింట్ సెక్రటరీ అనుదీప్ దురిశెట్టి మాట్లాడుతూ.. ఆరెంజ్ ఎకానమీని అంతర్జాతీయ స్థాయికి తీసుకెళ్లేందుకు హైదరాబాద్‌కు అనుకూలమైన అవకాశాలు ఉన్నాయని తెలిపారు. సినీ, సృజనాత్మక పరిశ్రమల అభివృద్ధికి ప్రభుత్వం ప్రత్యేక చర్యలు చేపడుతోందని పేర్కొన్నారు. ఏవీజీసీ పాలసీ, ఇమేజ్ టవర్స్ అభివృద్ధి, ఇప్పటికే ఉన్న సృజనాత్మక పరిశ్రమలకు అందిస్తున్న సహకారాన్ని వివరించారు. ఇండియా జాయ్‌–2026 ద్వారా ప్రభుత్వం రూపొందించిన విస్తృత ప్రణాళికను సమావేశంలో వివరించారు.

పరిశ్రమ భాగస్వామ్యానికి సినీ ప్రముఖుల హామీ

తెలుగు సినీ పరిశ్రమ ప్రతినిధులు ప్రభుత్వ చొరవను స్వాగతిస్తూ ఇండియా జాయ్‌–2026 విజయవంతానికి పూర్తి సహకారం అందిస్తామని హామీ ఇచ్చారు.

తెలంగాణ ఫిల్మ్ డెవలప్‌మెంట్ కార్పొరేషన్ (టీజీఎఫ్‌డీసీ) చైర్మన్ దిల్ రాజు మాట్లాడుతూ.. తెలుగు సినీ పరిశ్రమను ప్రపంచ స్థాయికి తీసుకెళ్లేందుకు ప్రభుత్వం చేస్తున్న ప్రయత్నాలను అభినందించారు. సమ్మిట్ విజయవంతానికి యావత్ సినీ పరిశ్రమ భాగస్వామిగా నిలిచి పెద్ద ఎత్తున సహకరిస్తుందని తెలిపారు.

ఫిల్మ్ ఛాంబర్ అధ్యక్షుడు డి. సురేష్ బాబు మాట్లాడుతూ.. సినీ, సృజనాత్మక రంగాల ప్రయోజనాల కోసం ప్రభుత్వం నిరంతరం చేస్తున్న కృషి స్వాగతించదగినదని పేర్కొన్నారు.

ప్రొడ్యూసర్స్ కౌన్సిల్ అధ్యక్షుడు సి. కల్యాణ్, డైరెక్టర్స్ అసోసియేషన్ అధ్యక్షుడు వి.ఎన్. ఆదిత్య, మూవీ ఆర్టిస్ట్స్ అసోసియేషన్ (మా) ఉపాధ్యక్షుడు డాక్టర్ మాదాల రవి తదితరులు సమావేశంలో పాల్గొని ఇండియా జాయ్‌కు మద్దతు తెలిపారు. దర్శకుడు హరీశ్ శంకర్, సాయి రాజేష్, నటుడు-దర్శకుడు రాహుల్ రవీంద్ర కూడా హాజరయ్యారు.

ఏవీజీసీ, వీఎఫ్ఎక్స్, గేమింగ్ రంగాలకు ప్రోత్సాహం

యానిమేషన్, విజువల్ ఎఫెక్ట్స్, గేమింగ్ పరిశ్రమలకు చెందిన ప్రముఖులు కూడా సమావేశంలో పాల్గొన్నారు. సినీ నిర్మాణంలో ఆధునిక సాంకేతిక పరిజ్ఞానం వినియోగం, అంతర్జాతీయ ప్రమాణాలకు అనుగుణంగా పరిశ్రమ అభివృద్ధి, ఈ రంగాలకు ప్రభుత్వం అందించాల్సిన ప్రోత్సాహంపై తమ అభిప్రాయాలను పంచుకున్నారు. ఫైర్‌ఫ్లై సంస్థకు చెందిన సనత్, ఫాంటమ్‌కు చెందిన బాసిరెడ్డి సునీల్ తదితరులు పాల్గొన్నారు.

ఇన్వెస్ట్ తెలంగాణ గ్లోబల్ సమ్మిట్ వ్యూహాత్మక సలహాదారు అచల్ మల్హోత్రా మాట్లాడుతూ.. ఇండియా జాయ్‌–2026ను గతంతో పోలిస్తే పదిరెట్ల విస్తృత స్థాయిలో నిర్వహించాలనే లక్ష్యంతో ప్రణాళికలు రూపొందిస్తున్నట్లు తెలిపారు. తెలంగాణ సృజనాత్మక ఆర్థిక వ్యవస్థను అంతర్జాతీయ పెట్టుబడిదారులు, స్టూడియోలతో అనుసంధానించే వేదికగా ఇండియా జాయ్ నిలుస్తుందని చెప్పారు. ఆర్ఆర్ఆర్ వంటి విజయవంతమైన చిత్రాలతో ప్రపంచ దృష్టిని ఆకర్షించిన హైదరాబాద్, ఇప్పుడు మరింత పెద్ద లక్ష్యాలతో ముందుకు సాగాల్సిన సమయం ఆసన్నమైందని పేర్కొంటూ సినీ పరిశ్రమ భాగస్వామ్యం కావాలని ఆహ్వానించారు.

లక్ష మందికి పైగా సందర్శకులు.. 200కు పైగా ఎగ్జిబిటర్లు

తెలంగాణ ప్రభుత్వ మీడియా, వినోద రంగాల ప్రధాన కార్యక్రమమైన ఇండియా జాయ్‌లో సినిమాలు, ఏవీజీసీ-ఎక్స్‌ఆర్, కచేరీలు, గేమింగ్, ప్రముఖులు, డిజిటల్ ఇన్‌ఫ్లుయెన్సర్లకు సంబంధించిన విభాగాలు ఉండనున్నాయి. సుమారు 15 ఎకరాల విస్తీర్ణంలో ఈ కార్యక్రమాలను నిర్వహించనున్నారు.

ఈ కార్యక్రమానికి సంబంధించి ప్రభుత్వం అంచనా వేసిన ముఖ్యాంశాలు:

  • లక్ష మందికి పైగా పాల్గొనేవారు, సందర్శకులు.
  • నెట్‌ఫ్లిక్స్, డిస్నీ, సోనీ, అడోబ్, డీఎన్‌ఈజీ, ఈఏ స్పోర్ట్స్, యూబిసాఫ్ట్, అన్నపూర్ణ స్టూడియోస్, రామోజీ ఫిల్మ్ సిటీ వంటి సంస్థలతో కలిపి 200కు పైగా ఎగ్జిబిటర్లు.
  • వందకు పైగా అంతర్జాతీయ పెట్టుబడిదారులు, కొనుగోలుదారులు, ఓటీటీ వేదికలు, అంతర్జాతీయ స్టూడియోలు.
  • వీఎఫ్ఎక్స్ సమ్మిట్, కామిక్ కాన్, ఇండీ గేమ్ ఉత్సవ్, ఓటీటీ పల్స్, ఇండీవుడ్ ఫిల్మ్ మార్కెట్, ఇండియన్ ఫిల్మ్ కాన్‌క్లేవ్, హైదరాబాద్ ఏఐ ఫిల్మ్ ఫెస్టివల్ (HAIFF) సహా 15కు పైగా ఉప కార్యక్రమాలు.
    డిసెంబర్ 8న రెడ్ కార్పెట్.. 9న కచేరీ వేదిక ప్రారంభం
    డిసెంబర్ 8న రెడ్ కార్పెట్ కార్యక్రమం ఇండియా జాయ్‌లో ప్రత్యేక ఆకర్షణగా నిలవనుంది. డిసెంబర్ 9న ఆస్కార్ విజేత, పద్మశ్రీ ఎం.ఎం. కీరవాణి చేతుల మీదుగా కచేరీ వేదిక ప్రారంభం కానుంది.
    సమావేశంలో ఐటీఈ అండ్ సీ శాఖ, తెలంగాణ ప్రభుత్వానికి చెందిన పలువురు అధికారులు కూడా పాల్గొన్నారు. ఇండియా జాయ్‌–2026 ద్వారా తెలంగాణను అంతర్జాతీయ మీడియా, వినోద, సృజనాత్మక పరిశ్రమల కేంద్రంగా నిలబెట్టేందుకు ప్రభుత్వం లక్ష్యంగా పెట్టుకుంది.
Total Visitors: 3,461,848