రూ. 2.15 కోట్లతో అధికారుల ప్రతిపాదనలు
రాష్ట్ర పౌరసరఫరాల శాఖ మంత్రి కొడాలి నాని
గుడివాడ పట్టణంలో సమ్మర్ యాక్షన్ ప్లాన్ అమలుకు చర్యలు తీసుకుంటున్నట్టు రాష్ట్ర పౌరసరఫరాలు, వినియోగదారుల వ్యవహారాల శాఖ మంత్రి కొడాలి శ్రీవెంకటేశ్వరరావు ( నాని ) చెప్పారు . గుడివాడ పట్టణంలో తాగునీటి పరిస్థితిపై క్యాంప్ కార్యాలయంలో మున్సిపల్ కమిషనర్ పీజే సంపత్ కుమార్ తో మంత్రి కొడాలి నాని సమీక్షించారు .ఈ సందర్భంగా కమిషనర్ సంపత్ కుమార్ మాట్లాడుతూ పట్టణంలోని 36 వార్డుల్లో ప్రతిరోజూ ఉదయం మంచినీటిని సరఫరా చేస్తున్నామన్నారు . కొన్ని ఏరియాల్లో మంచినీటి సమస్యలు ఎదురవుతున్నాయని చెప్పారు . గుడ్ మెన్ పేటలో మంచినీటి రిజర్వాయర్ నిర్మాణ దశలో ఉందని , ఈ రిజర్వాయర్ పరిసర ప్రాంతాల్లో ట్యాంకర్ల ద్వారా మంచినీటిని అందజేస్తున్నామని చెప్పారు . పట్టణ ప్రజలకు తాగునీటిని అందించే సమ్మర్ స్టోరేజ్ ట్యాంక్ ఒకవైపు జారిపోయిందని , దీన్ని ఇటీవల ఎక్స్పర్ట్ కమిటీ పరిశీలించి వెళ్ళిందన్నారు . ఈ బ్యాంక్ లో మూడు మీటర్ల మేర తగ్గించి నీటిని నిల్వ చేసుకోవాలని సూచించారన్నారు . రిజర్వాయర్ల ద్వారా జరుగుతున్న మంచినీటి సరఫరాలో ఎటువంటి ఇబ్బందులు రాకుండా చూస్తున్నామని కమిషనర్ సంపత్ కుమార్ తెలిపారు .
అనంతరం మంత్రి కొడాలి నాని మాట్లాడుతూ పట్టణంలోని 36 వార్డుల్లో వేసవిలో తాగునీటి సమస్య రాకుండా అధికారులు అన్ని చర్యలూ తీసుకోవాలని ఆదేశించారు . ఎటువంటి సమస్య వచ్చినా వెంటనే తన దృష్టికి తీసుకురావాలన్నారు . గుడ్ మెన్ పేట రిజర్వాయర్ నిర్మాణ దశలో ఉండడం , సమ్మర్ స్టోరేజ్ ట్యాంక్ కు సమస్యలు తలెత్తడాన్ని దృష్టిలో పెట్టుకుని ప్రజల రోజువారీ అవసరాలకు ఎటువంటి ఇబ్బందులు రాకుండా ముందస్తు జాగ్రత్తలు తీసుకోవాలన్నారు . మంచినీటి బోర్లను పరిశీలించాలన్నారు . పనిచేయని బోర్లకు యుద్ధ ప్రాతిపదికన మరమ్మతులు చేపట్టాలన్నారు .
అవసరమైన ప్రాంతాల్లో మంచినీటి బోర్లను ఏర్పాటు చేయాలన్నారు . పలు ప్రాంతాల్లో అమృత్ పథకంలో భాగంగా మంచినీటి పైప్ లైన్లను ఏర్పాటు చేయడం జరిగిందని , ఈ పైప్ లైన్ల ద్వారా కూడా మంచినీరు సక్రమంగా జరిగేలా చూడాలన్నారు . మంచినీటి పైప్ లైన్లకు లీకేజీలు లేకుండా జాగ్రత్తలు తీసుకోవాలన్నారు . ఎప్పటికపుడు పైలైన్ వ్యవస్థను పర్యవేక్షించడంతో పాటు లీకేజీలు ఏర్పడిన వెంటనే మరమ్మతులు జరపాలని సూచించారు . కొన్ని ప్రాంతాల్లో పైప్ లైన్ల ద్వారా కూడా మంచినీటిని సరఫరా జరగడం లేదనే ఫిర్యాదులు వస్తున్నాయని , అటువంటి ప్రాంతాల్లో మంచినీటి ట్యాంకర్ల ద్వారా తాగునీటిని అందించాలన్నారు . వేసవిలో ప్రజలకు పూర్తిస్థాయిలో తాగునీటిని అందించేందుకు అవసరమైన మంచినీటి ట్యాంకర్లను కూడా సమకూర్చుకోవాలన్నారు . సమ్మర్ యాక్షన్ ప్లాన్ అమల్లో భాగంగా బోర్ల మరమ్మతులు , నూతన బోర్ల ఏర్పాటు , పైప్ లైన్లకు మరమ్మతులు , మంచినీటి ట్యాంకర్ల ఏర్పాటు తదితరాలకు అధికారులు రూ .2.15 కోట్లతో అంచనాలను రూపొందించారని , వీటిని ప్రభుత్వం దృష్టికి తీసుకువెళ్తానని మంత్రి కొడాలి నాని చెప్పారు . ఈ సమావేశంలో వైసీపీ రాష్ట్ర నేత దుక్కిపాటి శశిభూషణ్ , వైసీపీ పట్టణ అధ్యక్షుడు గొర్ల శ్రీను , మండల తహసీల్దార్ శ్రీనివాస్ తదితరులు పాల్గొన్నారు
