విజయసాయిరెడ్డి ట్వీట్.. ఒక విశ్లేషణ
వైఎస్సార్‌సీపీలో అంతర్గత కుమ్ములాటలు పతాక స్థాయికి చేరాయనడానికి విజయసాయి రెడ్డి చేసిన ట్వీట్ నిదర్శనం. ఈ ట్వీట్‌లో ఆయన పార్టీలోని ఒక ‘కోటరీ’ తనను లక్ష్యంగా చేసుకుని పనిచేస్తోందని, తనపై తప్పుడు ప్రచారం చేస్తోందని తీవ్ర ఆరోపణలు చేశారు. ఇది కేవలం వ్యక్తిగత విమర్శలకు మించి, పార్టీలోని అధికార పోరును, వర్గ పోరును బయటపెడుతోంది.
కోటరీపై విజయసాయి రెడ్డి ఆరోపణలు
విజయసాయి రెడ్డి తన ట్వీట్‌లో “నేను మౌనంగా ఉండడం వైయస్సార్ సీపీలో కోటరీకి సచ్చటం లేదు. అందుకే నాపై వైఎస్సీపీ సోషల్ మీడియాలో అబద్దపు పోస్టులు పెట్టారు” అని పేర్కొన్నారు. తనను రెచ్చగొట్టడం ద్వారా తాను స్పందించి, తద్వారా జగన్‌కు నష్టం కలిగించాలని ఆ కోటరీ కోరుకుంటుందని ఆయన అభిప్రాయపడ్డారు.
ఈ చర్యలు “పార్టీలో నంబర్ 2 ప్రాధాన్యత కావాలనుకుంటున్న వారికి ప్రయోజనం ఉండవచ్చేమో కానీ జగన్ గారికి ఎలాంటి ప్రయోజనం ఉండదు” అని వ్యాఖ్యానించడం ద్వారా, ఈ అంతర్గత పోరులో కీలకమైన ఇతర నాయకుల పాత్రను ఆయన పరోక్షంగా ప్రస్తావించారు.
‘బలి పశువు’ ఆరోపణలు, వెన్నుపోటు ప్రస్తావన
తనకు సంబంధం లేని స్కాముల్లో తనను మరోసారి “బలి పశువును” చేద్దామని కోటరీ నిర్ణయించుకుందని విజయసాయి రెడ్డి ఆరోపించారు. గత నాలుగేళ్లుగా తనను అవమానిస్తున్నారని, లేని అభాండాలు తనపై వేసుకోలేక బయటకు వచ్చానని వివరించారు. “3 తరాలుగా అ కుటుంబానికి సేవచేసిన నన్ను కోటరీ మాటలు నమ్మి జగన్ గారు పక్కన పెట్టారు” అని పేర్కొనడం ద్వారా తన సుదీర్ఘ అనుబంధాన్ని, విశ్వసనీయతను గుర్తు చేస్తూనే, జగన్ తనను దూరం చేశారని పరోక్షంగా విమర్శించారు.
టీడీపీతో సంబంధాలపై వివరణ
తాను ఘట్టమనేని ఆదిశేషగిరిరావు ఇంటికి వెళ్లిన విషయాన్ని విజయసాయి రెడ్డి ధృవీకరించారు. కృష్ణ కుటుంబంతో తనకు రెండు దశాబ్దాల అనుబంధం ఉందని, తన కుమార్తె వివాహానికి వారంతా వచ్చారని తెలిపారు. అయితే, అదే సమయంలో టీడీ జనార్దన్ అక్కడకు వస్తున్న విషయం తనకు తెలియదని, ఇద్దరి మధ్య ఎలాంటి రాజకీయ చర్చలు జరగలేదని స్పష్టం చేశారు.
“నేను ఈ జన్మకు టీడీపీలో చేరటం లేదని ముందే చెప్పా” అని పునరుద్ఘాటించారు. ఒకవేళ టీడీపీ నాయకులను కలవాలనుకుంటే బహిరంగంగానే చంద్రబాబునాయుడును, నారా లోకేష్‌ను కలుస్తానని, వేరే వాళ్లతో ఎందుకు చర్చిస్తానని ప్రశ్నించారు.
లిక్కర్ స్కాం లేదని జగన్ అంటుంటే, ఆ స్కాం రహస్యాలు టీడీపీతో మాట్లాడటానికి తాను వారి నాయకులను కలిశానని జగన్ కోటరీ అంటుందని విజయసాయి రెడ్డి ప్రశ్నించారు. “మరి, స్కామ్ లేనప్పుడు, నేను ఏం చర్చిస్తాను” అని నిలదీయడం ద్వారా, తనపై వస్తున్న ఆరోపణల్లోని సంగతిని ఎత్తి చూపారు.
విజయసాయి రెడ్డి ట్వీట్ వైఎస్సార్‌సీపీలో నెలకొన్న తీవ్రమైన అంతర్గత సంక్షోభాన్ని వెల్లడిస్తోంది. ఒక సీనియర్ నాయకుడు, పార్టీ అధినేతకు అత్యంత సన్నిహితుడిగా పేరున్న వ్యక్తి ఈ స్థాయిలో బహిరంగంగా ఆరోపణలు చేయడం అరుదైన పరిణామం.
ఈ ట్వీట్ పార్టీలో జరుగుతున్న ఆధిపత్య పోరును, కీలక పదవుల కోసం జరుగుతున్న ప్రయత్నాలను స్పష్టం చేస్తోంది. విజయసాయి రెడ్డిని పక్కన పెట్టడం ద్వారా ఎవరో ‘నంబర్ 2’ స్థానాన్ని ఆశిస్తున్నారని ఆయన చెప్పడం దీనికి నిదర్శనం.
ఈ అంతర్గత కలహాలు వైఎస్సార్‌సీపీ ప్రతిష్టను పదకొండు నుండి పాతాళంలోకి పడేలా దెబ్బతీస్తాయి. నాయకుల మధ్య సమన్వయం లేకపోవడం, ఒకరిపై ఒకరు ఆరోపణలు చేసుకోవడం పార్టీ శ్రేణుల్లో అయోమయాన్ని సృష్టిస్తుంది.
విజయసాయి రెడ్డి నేరుగా జగన్‌ను విమర్శించనప్పటికీ, ‘కోటరీ మాటలు నమ్మి జగన్ తనను పక్కన పెట్టారు’ అని పేర్కొనడం ద్వారా, పార్టీ అధినేత నిర్ణయాలపై ఆ కోటరీ ప్రభావం ఉందని పరోక్షంగా సూచిస్తున్నారు.
విజయసాయి రెడ్డి భవిష్యత్తు రాజకీయ అడుగులు ఏమిటనేది ఇప్పుడు ఆసక్తికరంగా మారింది. ‘ప్రస్తుతం రాజకీయాల్లో లేను’ అని ఆయన పేర్కొనడం వ్యూహాత్మక విరామమా, లేక భవిష్యత్తులో స్వతంత్ర నిర్ణయాలకు సంకేతమా అనేది చూడాలి.
మొత్తంగా, విజయసాయి రెడ్డి ట్వీట్ వైఎస్సార్‌సీపీలో లోతైన అంతర్గత సంక్షోభాన్ని, పార్టీలోని కీలక నాయకుల మధ్య పెరిగిన దూరాన్ని సూచిస్తోంది. ఇంకా లిక్కర్ కుంభకోణంలో ఏ1 వరకే చెప్పి నోరుకట్టేసుకుని వున్నాను, నా జోలికి వస్తే అందరినీ తగిలిస్తాను అని విధేయతతో కూడా పరోక్ష హెచ్చరికలు వున్నాయి.
మూడు తరాలుగా వైఎస్ రాజారెడ్డి నుండి సంధింటికి చేసిన ఊడిగంకు దక్కిన అవమానం ఇది అని ఇంకా నమ్ముకున్న వారిలో అనుమాన నీలి మేఘాలు కమ్ముకొనేలా ముదిరిన ఈ పరిణామాలు రాబోయే రోజుల్లో పార్టీపై ఎలాంటి ప్రభావాన్ని చూపుతాయో చూడాలి.
1/2: నేను మౌనంగా ఉండడం వైయస్సార్ సీపీలో కోటరీకి సచ్చటం లేదు. అందుకే నాపై వైఎస్సీపీ సోషల్ మీడియాలో అబద్దపు పోస్టులు పెట్టారు. నన్ను కెలకటం మరియు ఇరిటేట్ చేయటం వల్ల నేను తప్పనిసరి పరిస్థితుల్లో రియాక్ట్ అవుతున్నాను. నా రియాక్షన్ వల్ల జగన్ గారికి నష్టం కలగాలని నమ్ముతున్నవారే నన్ను…
— Vijayasai Reddy V (@VSReddy_MP) May 26, 2025
